قفزة مرعبة في أسعار الدهب.. ايه اللي بيحصل فى سوق الصاغة؟

فى اخر 24 ساعة سعر الدهب عيار 21 زاد حوالى 70 جنيه مرة واحدة ودي قفزة مرعبة خصوصا ان مفيش سبب واضح للزيادة دي يعنى لا الطلب زاد ولا المعروض قل ولا حتى فيه حركة فى سعر الدولار فى السوق السودا بالعكس سعر الدولار النهاردة فى السوقف الموازية تراجع 2 جنيه.. فيا ترى ايه اللى بيحصل فى سوق الصاغة ؟ واسعار الدهب رايحة على فين الفترة الجاية؟ وهل سعر الجرام ممكن فعلا يوصل الى 3 الاف جنيه؟ 
 

 
زي ما كلنا متابعين وعارفين أسعار الدهب في مصر ارتفعت بشكل ملحوظ خلال الأسابيع اللى فاتت متأثرة بارتفاع الدولار بالسوق الموازية بجانب ارتفاع الأسعار على المستوى العالمي لكن الغريبة ان القفزات اللى بتحصل فى سعر الدهب بعيدة تماما عن الزيادات العالمية وحتى الزيادة فى سعر الدولار 
ولغاية نص اكتوبر اللى فات يعنى من حوالى شهر وكام يوم بس كان سعر عيار الدهب عيار 21 العيار الأكثر مبيعًا وانتشارًا في مصر، بيتحرك فى مستويات من 2100 إلى 2200 جنيه
وده قبل ارتفاع أسعار الدهب عالميًا وكمان قبل الصعود القياسي اللى حصل فى دولار السوق السوداء وحاليا بيقترب سعر الجرام من مستوى 2800 جنيه بدون المصنعية ومع إضافة المصنعية هيتجاوز سعر الجرام مستوى 2850 الى 2900 حسب الشغل ونوع الدهب  يعنى بحسبة بسيطة الدهب فى حوالى شهر ارتفع حوالى 700 جنيه فى الجرام الواحد 
وفى اللحظات اللى بنكلم حضراتكم فيها دلوقتي بيتحرك سعر الدولار في السوق السوداء حوالين  مستوى 48 جنيه وصعد دولار الصاغة إلى نحو 49.4 جنيه وفقًا للسعر العالمي للأوقية والبالغ 1986دولار
و فيه 3 عوامل بتأثر في سعر الدهب في مصر بتشمل آليات العرض والطلب وسعر الذدهب في البورصة العالمية وسعر الدولار.
وطبعا اللى بيحصل فى السوق السودا للدولار انعكس على سعر الدهب بشكل واضح وده يفسر ليه فى شهر واحد بس السعر زاد حوالى 700 جنية فى الجرام الواحد 
وطبعا معظم التوقعات بتقول ان الدهب هيواصل الارتفاع خلال الايام الجاية خصوصا فى ظل استمرار العدوان الاسرائيلي على غزة واحتمالية توسيع نطاق الحرب والمواجهات وده وقت بيتحول فيه الدهب الى ملاذ آمن لحفظ قيمة الأموال نظرا لسهولة تسييله واحتمالية ارتفاع اسعاره.