الجنيه راجع بقوة.. نهاية أزمة الدولار في مصر
ليه رئيس الحكومة الدكتور مصطفى مدبولي قال ان أزمة الدولار عابرة وهتنتهي في أقرب وقت؟ وهل فعلا الجنيه المصري راجع وهيسترد قوته قدام الدولار وباقي العملات الجنبية التانية؟ ومصر هتجيب منين دولارات تسد بيها العجز بتاع الموازنة العامة ؟ وهل كلام رئيس الحكومة ليه علاقة بقرار الاتحاد الاوروبي منح مصر حوالى 10 مليار دولار؟ وامتى تحديدا بعثة صندوق النقد هتوصل مصر لاجراء مراجعة لبرنامج التمويل اللى اتفقت عليه مع مصر فى شهر ديسمبر اللى فات ؟ وايه حقيقة رفع قيمة القرض من 3 الى 5 مليار دولار؟
فى الساعات الأخيرة الدكتور مصطفى مدبولى رئيس مجلس الوزراء أدلى بتصريحات مهمة عن أزمة شح العملة اللى بتعانى منها مصر وقال ان أزمة الدولار عابرة وهنتهتي في وقت قريب وان الهم واللى بتفكر فيه الحكومة حاليا هو ايه اللى هيحصل بعد نهاية أزمة العملة.
مدبولى أكد ان الحكومة بتجهز نفسها من دلوقتى لمرحلة ما بعد نهاية ازمة الدولار من خلال توسيع مشاركة القطاع الخاص فى الناج المحلي وقال كمان ان الاهتمام بملف الصناعة بيأتى على رأس أولويات عمل الحكومة في المرحلة الجاية.
رئيس الحكومة اتكلم عن الدروس المستفادة من الأزمة الحالية وقال أهم درس اتعلمناه من الأزمة الاقتصادية العالمية هو ضرورة امتلاكنا لمقدراتنا ومنتجاتنا بأكبر قدر ممكن وأكد على ان مصر لسه جاذبة للاستثمار الأجنبي المباشر من خلال ضخ مئات الملايين من الدولارات في إقامة مصانع واستثمارت متنوعة لمستثمرين عرب وأجانب وقال ان ده بيؤكد ثقة المستثمر الأجنبي فى الاقتصاد المصري.
مدبولى شاور على أهمية متابعة المسؤولين لملف الاستثمارات الأجنبية وقال انه بيتابع بنفسه ملف الاستثمار من خلال عقد اجتماعات أسبوعية مع عدد من المستثمرين وكمان اجتماعات تتعلق بزيادة الحوافز المُقدَّمة للصناعة والقضاء على المعوقات اللى بتعطل قطاع مهم بيمثل 17% من حجم الاقتصاد المصري
كلام رئيس الوزراء المتفائل عن مستقبل الجنيه وعن حل أزمة الدولار جاي بالتزامن مع انتعاشة فى مصادر مصر الدولارية ومن أيام قليلة الاتحاد الأوربي أعلن عن خطة لدعم مصر بقيمة 10 مليار دولار بتتضمن استثمارات في عدة قطاعات.. ومن خلال الخطة دي بيحاول الاتحاد الأوروبي تسريع جهوده لتعميق علاقته مع مصر ومساعدتها على معالجة التداعيات المتزايدة اللى نتجت عن العدوان الإسرائيلي على غزة.
وبتخطط رئيسة المفوضية الأوروبية أورسولا فون دير لاين تخطط لزيارة القاهرة خلال أيام لتعزيز الجهود المبذولة لدعم التنمية الاقتصادية في مصر وتخفيف تأثير الأزمة المستمرة في غزة.
وهتتضمن خطة الاتحاد الأوروبي لدعم مصر 6 أولويات تتراوح بين الاقتصاد والاستثمارات والهجرة والأمن.
ووزارة المالية أعلنت من فترة قريبة انها بتتوقع جمع حوالى 12 مليار دولار من تدفقات الاستثمارات الأجنبية اللى بلغت خلال العام المالي الماضي ١٠ مليار دولار، ومن المتوقع ارتفاع الاستثمارات دي مع التوسع في تنفيذ برنامج «الطروحات الحكومية».
وفيه كمان 2 مليار دولار هييجوا من صندوق النقد الدولى اللى أعلن في الساعات الأخيرة انه بيدرس بجدية رفع القرض الوجه لمصر من 3 الى 5 مليار دولار .. وفيه مليار دولار هتدخل مصر الفترة الجاية من شركاء دوليين
طب هل ده هيكون ليه تاثير على سعر الدولار فى السوق السودا ؟
طبعا اى كلام ايجابي عن الجنيه وعن قدرة مصر على جذب استثمارات اجنبية وتوفير سيولة دولارية بينعكس بشكل ايجابي على السوق السودا للدولار وسعر العملة الامريكية بيتراجع بقوة وبنسبة كبيرة 2024 هتكون اخر السنين الصعبة ومع بداية 2025 مصر هتبدأ تجنى ثمار الاصلاح وثمار المشروعات القومية اللى اتنفذت فى السنين الأخيرة ومعاها الجنيه هيسترد هيبته وهيقدر يقف فى وش الدولار وغيره من العملات الجنبية التانية
