حالات التصالح على مخالفات البناء.. وموقف خارج الحيز العمراني
لجنة الإدارة المحلية بمجلس النواب وافقت على قانون التصالح على مخالفات البناء.. اية الحالات اللي هايتم التصالح عليها؟؟ وخاصة اللي هي خارج الحيز العمراني.
رسميا.. لجنة الإدارة المحلية بمجلس النواب المصري وافقت على تعديل الحكومة بشأن التصالح على مخالفات البناء.. وياريت كوباية الشاي الجميلة وتركز معانا اوي علشان في كلام مهم هاتسمعه.
لو حضراتكم متابعين فالحكومة كانت أرسلت قانون التصالح على مخالفات البناء لمجلس النواب بعد التعديل ودا لمناقشته ومن ثم إقراره.. وبالفعل تمت مرحلة المناقشة داخل لجنة الإدارة المحلية وسيتم طرح القانون للمناقشة والموافقة أو الرفض عليه داخل الجلسة العامة بمجلس النواب.
طيب السؤال الأهم هنا.. اية هي الحالات اللي مسموح بيها التصالح على مخالفات البناء
بص يا فندم. علشان تطمن فمن المؤكد أنه سيتم التصالح على كافة مخالفات البناء ودا ها يغلق الباب تماما أمام أي تعديات جديدة.
أول الحالات اللي هايتم التصالح عليها هي حالات تغيير الاستخدام من سكني إلى تجاري ومن تجاري إلى سكني.. يعني لو كان عندك الدول الأول تجاري وحولته سكني أو كان سكني وحولته تجاري فدلوقتي عادي دا تقدر تتصالح عليه.
وبرضوا هايتم التصالح على المباني اللي بتلاصق أو بتواجه الوجهات المعمارية القديمة أو الوجهات المعمارية
ذات الطراز المعماري الفريد.
كمان هايتم التصالح مع من تجاوز قيود الارتفاع المحددة بمعنى أن العمارة اللي انت بنيتها مفروض ترخيصها دورين وأنت بنى التالت أو ترخيص العمارة كان ٣ أدوار وأنت بنيت الرابع فدا برضوا هايتم التصالح معاه.
كمان هايتم التصالح على التعديات الواقعة على خطوط التنظيم والشوارع التخطيطية.. ودا معناه أن مثلا لو حد بنى على شارع قبل تنفيذه يعني الحكومة مثلا مخططة أنها تعمل شارع في المنطقة الفلانية ولسه الشارع دا محل تخطيط لسه مش محل تنفيذ.. يبقى على طول الدولة هاتتصالح مع صاحب المبنى في حالة أن الشارع ماكنش اتنفذ لكن لو اتنفذ وحد جه بنى على الشارع فهيتم إزالته.
ومن ضمن الحالات اللي هايتم التصالح عليها برضوا هي المباني اللي اتبنت على أراضي الدولة ولكن بعد موافقة الجهات المختصة برضوا.
نيجي بقى لأهم جزئية . وهو ملف التصالح خارج الاحوزة العمرانية ودا بيمثل أهمية بالغة بالنسبة لناس كتير
طبعا مسألة خارج الحيز العمراني دي مسألة صعبة وفضلت محل جدال طويل والمقصود بيها هو البناء في أراضي زراعية أو فيما معناه بعيدة عن كردون البنا.
فدي الفترة الجاية هاتكون الموافقة على التصالح عليها تقديرية من قبل الحكومة.. يعني الحالات اللي من غير الممكن استيفاء الأوراق اللازمة ليها.. الناس المخالفة هاتقدم للسلطة المختصة المعنية بالتصالح إمكانية التصالح على المنطقة الفلانية والحكومة بقى ممثلة في الوزراء المعنيين ورئيس مجلس الوزراء ليهم الحق في اتخاذ الإجراء اللازم سواء بالتصالح أو لأ.
كمان الناس اللي واخده نموذج ١٠ وعملت عمدان وماصبتش السقف أو ماكملتش بناء.. القانون حل الموضوع دا في المادة ٣ .. واللي سمحت لهم بأنهم يصبوا السقف على ذات المساحة وعلى ذات الارتفاع .
خلي بالكم كل الحالات دي هايتم التصالح عليها بالسنبة للمباني اللي اتبنت قبل ١٥ / ١٠ / ٢٠٢٣.. اللي بعد كدا هايتم إزالتها.
