الصفقة تمت.. مصر تبيع 30% من الشركة للدخان لصالح الإمارات.. يا ترى استفادنا اية
من شوية.. مصر بالفعل باعت نسبة من حصتها في الشركة الشرقية للدخان (إيسترن كومباني) اللي بتبلغ 30% لشركة "جلوبال" الإماراتية..
ودي تعتبر أول عملية بيع خارجية لأصول كبرى مملوكة للدولة بداية من إطلاق برنامج الخصخصة.. يا ترى اية التفاصيل.. وبكدا سوق السجائر مصيره اية؟؟ هانعرف كل دا في الفيديو دا
الحكومة من وقت إعلانها عن برنامج الخصخصة في ديسمبر من العام الماضي.. وهي حريصة على حاجة مهمة جدًا.. وهي إنها تطرح نسب من حصص الشركات الكبرى مش خصخصة كاملة.. علشان تفضل مستفيدة من أرباح الشركات اللي طرحاها في البورصة أو لمستثمر استراتيجي وفي نفس الوقت تستفاد من المقابل المادي اللي محتاجاه في الوقت الحالي علشان تسدد ديونها.
والنهاردة تعتبر أول صفقة تتم بشكل رسمي لشركة كبرى زي الشركة للدخان واللي الحكومة باعت نسبة من حصتها فيها لشركة جلوبال الإماراتية... والنسبة دي بتبلغ 30% زي ما قولنا.
وبكدا مصر يكون دخل خزانتها مبلغ مقداره 16.40 مليار جنيه.. ودا نتيجة بيع أسهمها في الشرقية للدخان واللي بيبلغوا 669 مليون سهم لشركة جلوبال الإماراتية.
يعني نقدر نقول إن السهم المباع من جانب الحكومة لشركة جلوبال الإماراتية يبلغ 24.51 جنيه للسهم.
وبكدا حصة الحكومة اللي كانت بتملكها من خلال الشركة القابضة للصناعات الكيماوية المملوكة للدولة بنسبة 50.95 بالمئة من أسهم الشرقية للدخان نزل لـ 20.95 بالمئة.
وبشكل واضح وصريح.. فالصفقة دي أدت ما أطلقت عليه الدولة برنامج الخصصخة دفعة للأمام ودي لأنها الصفقة الأولى اللي تمت بالفعل من سنة تقريبًا.. طبعًا تمت صفقات تانية لكن ماكنتش بقيمة ومقدار الشركة دي باعتبارها من الأصول الكبرى المملوكة للدولة.
كمان الصفقة دي بتعتبر إيفاء بوعد مصر لصندوق النقد الدولي.. واللي مطلوب منها تقليص مشاركتها في الاقتصاد والسماح للشركات الخاصة بدور أكبر.. وفي المقابل الحصول على حزمة دعم مالي بقيمة ثلاثة مليارات دولار على 46 شهرا.
ومصر بتعتمد من خلال صفقات بيع الحصص لمستثمرين عرب وأجانب.. أنها توفر بيئة عمل أفضل للقطاع الخاص والاستفادة من خبراته في تطوير وتنمية مستوى الشركات دي.. وتحسين جودة المنتجات المقدمة وفي نفس الوقت مابتبيعش بيع كامل للشركة أو المصنع.. لأ هي بتبيع حصص من الشركات دي علشان تفضل مستفيدة من أرباحها بعد تطويرها من جانب الشركات صاحبة النسب الأكبر.
وبكدا.. الإمارات هاتكون صاحبة النصيب الأكبر من ملكية وإدارة شركة الشرقية للدخان.. الشركة المسئولة عن صناعة وتجارة الأدخنة ومنتجاتها ومستلزماتها.
مسألة تحديد أسعار السجائر بتحكمه عدة عوامل.. لكن بشراء شركة جلوبال للنسبة الأكبر من حصة شركة الشرقية للدخان.. نقدر نقول إن في احتمالية كبيرة لزيادة الإنتاج الفترة اللي فاتت مع احتمالية انخفاض الأسعار نسبيًا.
