أنت فييييين؟؟ يا ترى «السكر» اختفى لية؟؟ ولية سعره عدى الحدود؟؟

السكر في الأسواق تحس إنه داب أو غطس.. كلاهما واحد يعني.. فجأة وبدون سابق إنذار.. مافيش في المحلات "سكر" مافيش في الماركات الكبيرة "سكر".. يا راجل دا حتى القهاوي بتعاني من قلة السكر..يا ترى اية السبب؟؟ ولية لو لقينا كيس السكر فسعره غالي اوي.. يلا بينا نعرف السببببب

مؤخرًا، الأسواق المصرية بتعاني بشكل كبير من اختفاء "كيس السكر".. وخلال اليومين اللي فاتو بس بدأ يظهر لكن بأسعار كبيرة.. والسبب هو اتفاق عصابة من التجار على تخزين المنتج لفترة.. علشان يتم بيعه بأسعار مرتفعة.. يعني بمبدأ "عطش" السوق علشان السعر يزيد.

ولو حد من المشاهدين الفترة اللي فاتت.. كان خد جولة على محلات البقالة أو حتى الماركات الكبيرة هاتلاقي ردهم دايمًا مافيش سكر.. مافيش سكر.. ولو حد لقاه يروح فورًا مشتري بالـ 5 أكياس علشان يحصن نفسه من اللف بالساعات.

طيب المتوقع لما يحصل الموضوع دا.. هو أن المنتج يكون فيه عجز بمعنى عندنا بكمية قليلة.. والحقيقة دا مش صحيح.

لأن وزارة التموين والتجارة الداخلية .. أكدت في اكتر من مناسبة بأن البلاد بتمتلك مخزون استراتيجي يكفي ستة أشهر من الاستهلاك. وكمان التقديرات الرسمية أكدت أن مصر محققة اكتفاء من السلعة بنحو 90 في المئة تقريباً، والدولة بتوفر السكر لمستحقي الدعم بـ12.60 قرش.. وفي بعض منافذها بـ27 جنيه.

لكن الأزمة وبوضوح كدا.. فهي نتاج طمع التجار وغياب الرقابة على الأسواق.. ودا اللي أكد عليه عضو الشعبة العامة للمواد الغذائية باتحاد الغرف التجارية حازم المنوفي.. واللي قال إن أسعار السكر الحالية في مصر "غير مبررة".. لأن الدولة بتمتلك نسبة 90% اكتفاء ذاتي من المنتتج، وفي نفس الوقت طالب الأجهزة الرقابية بتشديد حملاتها على الأسواق، والعمل على وفرة المعروض من السكر في المنافذ المملوكة للدولة.

ولازم حضراتكم تكونوا عارفين أن أزمة السكر دي مش موجودة بس عند الماركات أو المستهلكين.. لأنها كمان موجودة عند الصناع.. ودا اللي أكد عليه رئيس شعبة السكر والحلوى بغرفة الصناعات الغذائية باتحاد الصناعات المصرية في تصريحات صحفية حسن الفندي.. واللي أكد أن الأزمة مش متعلقة بس بالمستهلك، لكنها كمان بتمتد آثارها لتشمل المنتجين والصناع، خاصة أن السكر يعتبر مكون رئيسي من مكونات إنتاج عديد من السلع الغذائية مثل العصائر والحلوى وغيرها.

وفي حين أن المنتج مختف.. وأسعار الموجود منه غالية جدًا فممكن المنتجات اللي داخل فيها "السكر" تتأثر هي كمان.. مع احتمالية زيادة سعرها في المستقبل القريب.

الموضوع محتاج تدخل حاسم من الحكومة في الملف دا.. والعمل بشكل سريع على ضخ كميات من السكر في منافذها.. مع تشديد الرقابة على  الأسواق.