جنون الليلة الكبيرة.. إيه اللي حصل في الصاغة النهاردة
اللي بيحصل دا جنون محدش فاهم حاجة.. دا لسان حال التجار والمواطنين في سوق الدهب والصاغة النهاردة بعد القفزة الجنونية في أسعار الدهب وكسر عيار 21 حاجز الـ2715 جنيه وعيار 24 لـ3102 جنيه لغاية الساعة السابعة والنصف مساء اليوم الأربعاء.. ايه الي بيحصل في الصاغة وايه علاقة الدهب بالدولار والسوق السودا للعملة وكل دا ليه.
في العادي وفي كل الدنيا الدولار لما بيزيد الدهب سعره بيقل لكن في مصر بس لما الدولار بيزيد كل حاجة بتولع بدليل الدهب النهاردة واللي أسعاره ضربت في العالي ومحدش عارف يسيطر عليه.. طيب اللي حصل.. شوف ياسيدي الدهب في مصر ليه علاقة بالدولار بس علاقة خاصة جدا وهي إن السوقين بيشدوا بعض لفوق رغم إنهم عكس بعض والبداية كانت من ارتفاع غير طبعيي في سعر الدولار في السوق الموازية ووصل لـ50 جنيه.
بعد ارتفاع الدولار في السوق السودا ارتفع سعره في سوق الدهب إلى 52 جنيه للدولار والتجار سعروا الدهب على سعر الدولار 52 جنيه ومن هنا أسعار الدهب ولعت ولسه بتزيد.. طيب ايه اللي خلى الدولار في السوق السودا يزيد أصلا وكل المؤشرات بتقول إن أسعار الصرف مستقرة من شهور عند 31 جنيه وإن فيه وفرة في البنوك وتحسن المؤشرات والايرادات الدولارية..
اللغز حضرتك في الاشاعات اللي مالية البلد إن خلاص التعويم على الأبواب وإن فيه إجراءات قوية جاية والطلب هيزيد على العملة الأمريكية وعشان كدة تجار العملة حبسو الدولار عشان يشعللوا السعر وشفنا في ساعات زاد قد إيه، ودا بيحصل في وقت البنك المركزي شغال على إجراءات حاسمة للسيطرة على السوق الموازية لكن خلونا نعترف وإحنا شايفين بعنينا اللي بيحصل إنه فيه لعب على تقيل في الأسواق والكل شغال من تحت الترابيزة.
أي حد بيتابع الأسواق هيعرف إن التوقيت خبيث عشان يتم التلاعب في السلع واسعارها وبعدها يدخل على السوق السودا ويلم الدولارات ويرفع السعر وبعدها الدهب سعره يضرب عشان الناس بتصدق إن فيه حاجة هتحصل فاللي بيحصل إن الناس بتروح تشتري دهب عشان تحافظ على فلوسها وتتحوط ضد الخطر من التعويم أو قرارات للمركزي ودي كلها أخبار وتحليلات من وحي وتأليف وإخراج المنصات الالكترونية للسوق السودا واللي بيدورها واللي عاوزنها تولع قبل انتخابات الرئاسة في ديسمبر اللي جاي واللي مش مطلوب إنها تعدي على خير ودا غير الاحداث اللي في المنطقة وموقف مصر والضغوط اللي عليها.. ويارب يكون فهمنا الدهب رفع ليه.
