توقعات مفاجئة عن مستقبل الفائدة الأمريكية.. إيه اللي هيحصل في 2024 ؟
مفيش كلام حاليا داخل البنوك الأمريكية ومؤسسات المال والأعمال غير عن مصير أسعار الفايدة خلال الفترة الجاية، وكل الناس سواء فى أمريكا أو في باقي بلدان العالم منتظرة تشوف الفيدرالى الأمريكي هيعمل ايه فى اخر اجتماع ليه فى 2023 وكمان خططه للعام الجديد فى 2024 .. ويا ترى هيستمر فى سياسته التشددية وهيواصل رفع اسعار الفايدة اللى وصلت لمستويات قياسية ؟ ولا هيدي الاسواق فرصة جديدة لالتقاط النفاس بعد ما ثبت اسعار الفايدة فى اجتماعه الأخير؟ وايه تاثير قراره على الاسعار وموازنات الدول النامية ؟ وهل الدهب ممكن يستفيد من اللى بيحصل ولا الدولار هو اللى هيفضل مسيطر ومستحوذ على الاهتمام الأكبر من المستثمرين؟
خلاص باقي أقل من شهر وهيعقد الفيدرالي الأمريكي اجتماعه الاخير فى 2023 للنظر فى اسعار الفايدة على الدولار.. وده بعد ما اخد قرار بتثبيتها فى الاجتماع الأخير ليه من حوالى شهر تقريبا .. فيا ترى ايه اللى هيحصل فى الاجتماع الجاي؟ وهل هيثبت للمرة التانية على التوالى ولا ممكن يفاجيء الأسواق ويرفع اسعار الفايدة ؟
وشهدت توقعات المستثمرين بشأن مستقبل أسعار الفائدة الأمريكية تغيرات ملحوظة بعد ما أظهرت بيانات تم الافصاح عنها مؤخرا تباطؤ نمو الوظائف في الولايات المتحدة في أكتوبر فى الوقت اللى كانت فيه الزيادة في الأجور السنوية هي الأقل خلال آخر سنتين وده بيشير إلى انحسار ظروف سوق العمل.
ورغم ان تقرير الوظائف جدد التوقعات بأن بنك الاحتياطي الفيدرالي انتهى من حملته لرفع أسعار الفائدة وان ده أدى إلى انخفاض الدولار لأدنى مستوى ليه من ستة أسابيع..فجر بنك يو اس بي الاستثماري وقال انه من المتوقع أن يخفض بنك الاحتياطي الفيدرالي أسعار الفائدة بمقدار 275 نقطة أساس في 2024 وده بيوازي ما يقرب من 4 أضعاف ما تقوم الأسواق بتسعيره حاليا.
وهيمكن الانخفاض المستمر في التضخم البنك الفيدرالي من البدء في سياسة التيسير في أقرب وقت في شهر مارس الجاي مع احتمال خفض أسعار الفائدة بنسب كبيرة.
وبيتوقع الخبراء انخفاض سعر الفائدة القياسي على الأموال الفيدرالية إلى ما بين 2.5% و2.75% بحلول نهاية 2024، ويتوقعوا كمان وصول المعدل النهائي إلى 1.25% بحلول أوائل 2025 وبيتستندوا فى وجهة نظرهم على توقع انزلاق الاقتصاد الأمريكي إلى الركود بحلول الربع التاني .
وفى الساعات الأخيرة بيتوقع المتداولين احتمال بنسبة 95% أن البنك المركزي الأمريكي يسيب أسعار الفائدة دون تغيير في اجتماع ديسمبر وانه هيبدا التخفيض في السنة الجديدة.
وأظهر تقرير الوظائف علامات ضعف بسوق العمل في بعض الجوانب وده بعد ما انخفض متوسط ساعات العمل الأسبوعية إلى 34.3 ساعة، وده عادة بيكون مؤشر على تراجع طلبات أصحاب العمل. وتراجعت نسبة المشاركة في السوق إلى 62.7%. وارتفع معدل البطالة إلى 3.9%، وهو أعلى مستوى من يناير 2022.
وأضاف الاقتصاد الأمريكي 150 ألف وظيفة عن شهر أكتوبر وبيتوقع الخبراء إضافة 180 ألف وتم تعديل القراءة السابقة لتسجل 297 ألف بدلاً من 336 ألف.
وأضاف القطاع الخاص غير الزراعي 99 ألف وظيفة في أكتوبر، وكانت التوقعات بتشير إلى إضافة 158 ألف، وتم تعديل القراءة السابقة لتسجل 246 ألف بدلاً من 263 ألف.. و سجل معدل البطالة الأمريكية 3.9% في أكتوبر. فيما توقع الخبراء أن يسجل 3.8% كالقراءة السابقة.
وبعد نشر بيانات الوظائف لشهر أكتوبر واللى جت أقل من التوقعات قدّم المستثمرين تقديراتهم بشأن إمكانية حدوث أول خفض لأسعار الفائدة في الولايات المتحدة إلى مايو أو يونيو بدلاً من يوليو.
طب الكلام ده معناه ايه وايه تأثيراته على اسعار الفايدة على الدولار؟
بص يا سيدي .. الفيدرالى الأمريكي فى اجتماعاته الدورية بخصوص مصير اسعار الفايدة بيعتمد على مجموعة تقارير وبيانات ليها علاقة بسوق العمل وبحجم الوظايف اللى بتتوفر وكمان نسب البطالة وبالتالى اى تغيير فى البيانات دي بيكون ليه تاثير على صناع السياسة النقدية فى الولايات المتحدة وبنسبة كبيرة وفقا للتقارير الأخيرة الفيدرالى هيثبت اسعار الفايدة فى اخر اجتامعات 2023 لكن لسه مش واضح لغاية دلوقتي مصير الفايدة فى 2024
