فاتورة دعم غزة.. ازاي مصر وقفت في وش العواصف وايه اللي خسرته من أحداث غزة
محدش يقدر يزايد على مصر في مواقفها العروبية على مدار التاريخ وكانت الضهر والسند لاي دولة عربية في محنتها والتاريخ يشهد من مئات السنين وكانت ولازالت هي الدرع اللي بيحمي الأمة من التتار لغاية الإسرائيلين وآخرها موقفها من غزة.. أيا كانت خسائر مصر من غزة فمكسبها الكبير دفاعها عن الحق العربي وإنقاذ ما يمكن إنقاذه من الأطفال والشيوخ.. ايه اللي دفعته مصر عشان غزة وايه الفاتورة السياسية والاقتصادية اللي اتحملتها
مع بداية الصراع على الحدود المصرية الإسرائيلية والفلسطينية مع قطاع غزة ومصر هي اللي شايلة الليلة من اولها لغاية دلوقتي وتصدت لآلة الفتك والقتل الإسرائيلة ضد المدنيين في قطاع غزة وكان التمن غالي تقارير سلبية موجهة من وكالات التصنيف الدولية وتعنت صندوق النقد الدولي مع الحكومة المصرية في موضوع القرض وإطلاق شائعات مغرضة عن الاقتصاد المصري وانهياره.
ولأن تقارير وكالات التصنيف دي بتأثر تأثير مباشر على الاستثمارات الأجنبية المباشرة وبالتالي على مخططات التنمية وخطط الحكومة وبالتالي هتزود الضغط على الدولة في ذروة أزمة عملة خانقة وسوق سودا مش بترحم والقوى المعادية استغلت الوضع الاقتصادي الصعب في مصر. الناتج عن الأزمة الروسية الأوكرانية في النفخ في النار والضغط على العملة المصرية وكلنا عارفين طبعا إن وكالات التصنيف وصندوق النقد الدولي ادوات في ايدين الدول المسيطرة عليها زي الولايات المتحدة وأوروبا وكل التقارير اللي طلعت بعد أزمة غزة تقارير موجههة ضد الاستثمار والتنمية.
وبكده يبقي مصر خسرت مليارات الدولارات كانت هتيجي البلد لو تقارير الوكالات دي جت إيجابية لكل مصر ما استسلمتش حتى لما اتعرض عليها تصفير الديون ومليارات المنح والاستثمارات عشان توافق على أن سيناء تكون وطن لسكان غزة وبعدها مصر اتلقت اكتر من ضربة اقتصادية بسبب تخفيض علامة التصنيف الائتماني الدولي.
مفيش شك إن السياحة والسفر حساسة لاي توترات في أي منطقة وبتهرب منها فورا لأن السياحة مرادفة للأمن والاستقرار واللي بيحصل على الحدود حدث ضخم ويخوف أي شركة سياحية تجيب وفود سياحية في منطقة ممكن أمن السياح يكون في خطر واكيد السياحة في سيناء هتتأثر باللي بيحصل في غزة، دا غير تكلفة علاج الفلسطينيين وهي مهمة مقدسة وشريفة في المستشفيات المصرية وتحمل كل الفاتورة بالإضافة إلى جهود الإغاثة والمساعدات في غزة واللي مصر اتحملت الجانب الأعظم فيها .
مصر قدرت تقف قدام كل العواصف اللي هبت من الحدود الشمالية الشرقية واتعاملت مع الاحداث من منطلق انساني وخوف على حياة كل عربي وإن الأمور ما تخرجش عن السيطرة والصراع يوسع ويأثر على كل المنطقة بما فيهم مصر وساعتها الخساير محدش يقدر يستحملها.
