خدمة بخدمة وسلعة قصاد سلعة.. تصرف غريب من الحكومة لتوفير الدولار

الحكومة في عرض دولار .. ومفيش اي فرصة لإهدار العملة الصعبة.. كل وزارة تفكر ازاي توفر الدولار في الفترة دي بالذات.. وزارة التموين فكرت والفكرة نجحت وقالت هنستورد بس مش هندفع ولا دولار .. ازاي طيب.. سهلة جدا انا هخد سلعة مهمة بالنسبة ليا وهديك قصادها سلعة ولو قدمت لي خدمة هقدملك قصادها خدمة ومفيش دولارات.

ومعروف أن مصر  من أكبر مستوردي الشاي في العالم لأننا مش بنزرعه وتاني اكبر مستورد للشاي من كينيا وعشان كده عرضت على كينيا استيراد الشاي مقابل اي سلعة الحكومة الكينية تكون محتجاها  وإن مصر مش هتدفع دولار تاني وعلى الأقل في الفترة دي.

الحكاية كشفها وزير الخزانة الكيني نجوجونا ندونجو،  بنفسه وقال إن مصر طلبت شراء الشاي وفقا لنظام المقايضة.
ونقل وزير الخزانة الكيني عن سفير مصر في نيروبي  إن مصر مستمرة في استيراد الشاي لكن هنغير نظام الدفع وهيبقي بالمقايضة بالسلع بدل الدفع نقدا بالدولار ودعا السفير المسؤولين الكينيين لزيارة مصر وتقرير استيراد اي سلعة مصرية مقابل الشاي.

وزي ماقلنا مصر بتعتبر تاني أكبر مشترٍي للشاي من كينيا بعد باكستان وانخفضت الصادرات إلى السوقين في الأشهر الثمانية الأولى من عام 2023 بنسبة 23% و13% على التوالي، وفقاً لبيانات مجلس الشاي الكيني وقال الوزير إن الرئيس وليام روتو أرسل وزير الزراعة للتفاوض على ترتيبات مقايضة مماثلة مع باكستان يعني موضوع المقايضة بقي هو الحل الأمثل ومصر ماخترعتهوش وبالعكس المقايضة هي النظام المالي اللي كان منتشر في العالم قبل اختراع الفلوس.

وبنفكركم إن مصر فكرت في أول أزمة الدولار في نظام المقايضة في السلع والعملات كمان وفي نهاية سبتمبر اللي فات وقع البنك المركزي المصري مع نظيره الإماراتي اتفاق لمقايضة العملة بقيمة 5 مليار درهم، والتفاوض على توقيع اتفاقيات مشابهة مع دول عدة.

نظام المقايضة هو فكر اقتصادي بره الصندوق للحفاظ على الاحتياطي النقدي من العملة الصعبة وخاصة في وقت الازمات لانه بيوفر مليارات من الدولارات وبيساعد على استقرار الأسواق.