البنك المركزي ينجح في المهمة الصعبة.. أخبار حلوة عن الجنيه والدولار
أكتر حاجة شاغلة المسئولين فى البنك المركزي خلال الكام شهر الأخيرة هي أزمة الدولار اللى عاملة مشاكل كبيرة جدا فى اسعار السلع الأساسية واحتياجات المصريين اليومية وعشان كده كل تفكير المسئولين وصناع السياسة النقدية ازاى يوفروا أكبر كمية من الدولار وازاى يلبوا احتياجات المستوردين والشركات من العملة الأمريكية وسط شائعات بتطلع كل شوية عن تخفيض قادم فى سعر الجنيه كان اخرها تقرير لبنك سوستيه جنرال الفرنسي توقع اجراء التعويم الجديد بعد انتخابات الرئاسة يعنى فى شهر يناير على أقصى تقدير.. والشائعات دي طبعا بتخلى ادراة البنك المركزي تفكر فى طرق مبتكرة لتوفير العملة الصعبة وتدبير سيولة دولارية تقدر تساعد الحكومة فى ادارة تحرير سعر الصرف لو قررت فعلا تعمل كده .. لأن التعويم من غير غطاء دولاري كبير ممكن يعمل مشاكل أكبر ويخلى سعر الدولار يخرج عن السيطرة بشكل كامل.. فيا ترى البنك المركزي هينج فى المهمة الصعبة دي ولا هيقدر هيوفر السيولة المطلوبة؟ والأهم ايه الأوضاع على الارض دلوقتى يعنى هل البنوك بتقدر توفر دولار للمستوردين والشركات؟
الأيام الأخيرة شهدت ارتفاع ملحوظ في السيولة الدولارية فى فروع البنوك الحكومية وتم السماح للفروع التابعة للبنوك الحكومية بالاحتفاظ بالسيولة الدولارية بأرقام تتخطى في بعض الأيام 2 مليون دولار وده عكس اللى كان بيحصل قبل كده ومكنش مسموح خالص لأى فرع بالاحتفاظ بأي مبالغ من العملات الصعبة.
وبتوفر البنوك لفروعها أي مبالغ تطلبها من الدولار وتم إلغاء الحجز المسبق لسحب أي مبالغ أكتر من 10 آلاف سواء بالنسبة للدولار أو العملات الأجنبية التانية وزادت كمان الموافقات الخاصة بالإفراجات الجمركية للمستودين بنسبة تتخطى الـ 30%.
طب الكلام ده معناه ايه ؟
معناه ان بقا فيه وفرة كبيرة جدا فى النقد الأجنبي داخل البنوك بشكل يخليها توفى باحتياجات اللى المستوردين والشركات وده وضح جدا فى حجم الافراج عن البضايع من الموانيء المصرية وبلغت قيمة البضائع المُفرج عنها خلال الفترة من 1 يناير 2023 وحتى 30 سبتمبر 2023 حوالى 53.7 مليار دولار
وخد بالك دي أرقام كبيرة جدا خصوصا فى ظل أزمة شح العملة اللى مصر بتعانى منها فى الفترة الأخيرة مع أزمة اقتصادية عالمية بتشتكى منها حتى دول العالم المتقدم.
وشهدت الأيام الأخيرة كمان زيادة الإيداعات الدولارية الخاصة بالعملاء سواء لشراء شهادات أو لإيداعها في الحسابات الخاصة
ومن أيام قليلة أعلن البنك المركزي المصري تسجيل صافي الاحتياطيات الأجنبية 34.97 مليار دولار بنهاية شهر سبتمبر 2023 مقارنة بنحو 34.92 مليار دولار في نهاية أغسطس 2023. وكانت الاحتياطات في حدود 33.197 مليار دولار بنهاية سبتمبر 2022 مع ارتفاع المعروض النقدي بأكتر من 20% إلى حوالي تريليوني جنيه.
وارتفع النقد المتداول خارج الجهاز المصرفي 19.37% إلى 991.930 مليار جنيه. وارتفعت الودائع تحت الطلب بالعملة المحلية الى 21.65% وبلغت 1.105 تريليون جنيه بنهاية يوليو 2023، مقابل 908.3 مليار جنيه بنهاية ديسمبر 2022.
ورغم ان البنوك ما اعلنت رقم رسمي عن حصيلة الشهادات الدولارية الا ان يحي ابوالفتوح نائب رئيس البنك الأهلي المصري قال فى تصريحات ليه يوليو اللى فات بأن حصيلة الشهادات الدولارية اللي طرحها البنك في أكتوبر بلغت حوالي 3.5 مليار دولار.
وتحت ضغط شح الدولار بتجري الحكومة المصرية مفاوضات مع صندوق النقد الدولي بشأن زيادة برنامج التمويل اللي وافق عليه الصندوق في ديسمبر اللى فات ، من 3 إلى 5 مليارات دولار ووفقا للتصريحات اللى طالعة من مسئولين في الصندوق فالمفاوضات ماشية كويس واحتمال نسمع خلال ايام عن اتفاق جديد لزيادة برنامج الحكومة المصرية مع الصندوق
