لية التجارة أحسن من الوظيفة مليون مرة؟
هل التجارة أحسن من الوظيفة؟..وأية المميزات بين الاتنين؟ وامتى تتتحول..من موظف ل تاجر؟
طول ما أنت موظف.. هايبقى اللي جاي على قد اللي رايح.. حتى لو بتاخد مبلغ كبير.. لأن الوظيفة عقلية وثقافة إنما البحث خارج الصندوق هي عقلية استثمار وربح.
أولا الموضوع دا بيتحدد حسب ظروفك الخاصة.. يعني القياس هنا هو مدى قدرتك على الاستثمار وعلاقاتك الشخصية، ووضعك العائلي وموقفك من المخاطر.
لأن التجارة يعني مخاطرة.. وفكر خارج الصندوق.. إنما الوظيفة فأنت مش محتاج تفكر برة الصندوق.. أنت طول الوقت مستني الشهر يخلص علشان تاخد مرتبك.
في التجارة أنت رئيس نفسك.. يعني مافيش مدير قاعد يحددلك الموعد النهائي لإنجاز المهام و طريقة إنجازها.
إنما الوظيفة لازم يكون في مدير يقولك تعمل اية وماتعملش اية.
في الوظيفة أنت عارف دخلك الثابت كام وهاتصرفه فى اية أما العمل الحر ممكن يتسببب فى أن دخلك يكون أكبر بكتير لكنه متغير حسب السوق اللى أنت شغال فيه وحسب نوع العمل أو الخدمة اللى بتقدمها.
التجارة فيها أنشطة كتير ممكن تحط فيها فلوسك.. استثمار في شهادات.. في دهب.. في مشروع.
الجنيه هايجبلك جنيه.. إنما الوظيفة هاتاخد منك الجنيه.
لو أنت معاك فلوس وأهم حاجة عقلية تجارية.. يبقى التجارة الأفضل بشرط أنك تحط فيها كامل تركيزك.
طيب لو نويت تتاجر.. تتاجر في اية؟
تتاجر في أقرب حاجة أنت بتفهم فيها.. في سيارات في عقارات في بضائع.. المهم اللي أنت بتفهم فيه تتاجر فيه.
والتجارة عايزة نفس طووويل.. يعني ماتتسرعش وتاخد قرارات غير مدروسة.. أعرف السوق عايز اية وانت مقدرتك اية وأبدأ.
التجارة عايزاك تكون صاحي.. وواخد بالك من كل صغيرة وكبيرة وماتبذرش.
لو دورت على أي حد غني.. هاتلاقيه تاجر.. باع واشترى.
أهم حاجة أن عقليتك تكون تجارية.. أهم حاجة يكون عندك شبكة علاقات وتبدأ في حاجة أنت فاهم فيها.
ومن مميزات العمل الحر أن الوقت ملكك.. بمعنى لو كنت شغال فى عمل حر فأنت طبعًا بتختار الوقت اللى بتشتغل فيه.. ومقدار ساعات العمل فى اليوم... وهل دا الصبح ولا بالليل.. لكن دا طبعًا مش متوفر فى العمل الحكومي والوظائف الخاصة.
لازم بس تاخد بالك إن من مشكلات العمل الحر واللى لازم تاخد بالك منها.. هو أن العمل الحر مش ثابت وبيتعرض دايما لتقلبات السوق والأحوال الاقتصادية.. لكن فى الوظيفة بتكون عارف دخلك كام فى الشهر بشكل محدد وثابت .. والأفضل أنك تشتغل فى مكان يجبلك دخل وبشكل ثابت خلال الفترة الأولى للعمل الحر.
