لا خليج ولا أوروبا.. بالأرقام مصر تنين اقتصادي وهي اللي جاية

هو فعلا مصر هتخرج من أزمتها دي وسط حالة الفوضى اللي حولينا والأزمة الداخلية في الدولار والاسعار والتضخم والاقتراض وصعوبة المعيشة وهل ممكن يكون فيه انفراجة كبيرة وانطلاقة تكسر الحلقة الصعبة اللي احنا عايشينها من سنتين دي.. وازاي مصر جاية واحنا مش عارفة تحل أزماتها .

في وقت عندك أزمة دولار وارتفاع غير مسبوق في الأسعار والتضخم وبتعتمد على جزء كبير في توفير الاحتياجات للمواطنين على الاستيراد والاقتراض وعليك ديون 164 مليار دولار..دا غير أعداء كتير متربصين بيك وقنوات بتشوه في كل إنجاز ولو قلت لحد إن الاقتصاد المصري هيبقي السابع عالميا هيعاملك كأنك حالم أو مختل أو منفصل عن الواقع.. حتى لو قلتله إن دي توقعات لأكبر وحدات الأبحاث الاقتصادية في اهم بنوك العالم واللي توصلت أن اقتصاد مصر هيوازي تلت اقتصاد أوروبا كلها بعد سنين مش كتيرة... طبعا مهما كان اللي قاله البنك العالمي عن تطور اقتصاديات العالم ومن بينها مصر محدش يقدر يستوعب ازاي مصر هتوصل لكده في ظل الظروف الحالية والصعوبات الاقتصادية.

ياعم احنا بتتخانق عشان نجيب 3 مليار دولار من صندوق النقد تقولي سابع وتامن اقوى اقتصاد في العالم ومن بين العشرة الكبار كمان وإن اقتصادك هيعدي ألمانيا ودول النفط والخليج..ايوا حضرتك دا هيحصل ولازم تستوعب دا والموضوع مش خناقة.. وتعالي نشوف ليه مصر هتتوحش.
اقتصاديا... خلينا نفكركم بس الاول باللي قاله  بنك الاستثمار الأميركي "جلدمان ساكس" وعشان تطمن بردو جلد مان دي مش أي بنك دي مؤسّسة خدمات مالية وإستثمارية أمريكة متعددة الجنسيات وهي من أشهر المؤسسات المصرفيه في الولايات المتحدة والعالم، وشغالة في أكتر من 30 دولة وعندها 6 فروع إقليمية وأكتر من 100 مكتب و 35,000 موظف، وأكتر من 850 مليار دولار أمريكي من إجمالي الأصول يعني مؤسسة ضخمة جدا على مستوى العالم ومش هتسيب اللي وراها وتجاملك وكمان تقريرها كان تقرير عام عن الاقتصاديات الصاعدة في العالم يعني مكانش عامل تقرير مخصوص عن مصر علشان محدش يقولك الموضوع فيه إن وكان.

تقرير ساكس قال إن العالم هيشهد إعادة ترتيبات الاقتصاديات والتجارة والثروات  وإن الاقتصاد المصري هيصعد الى المرتبة السابعة عالمياً، متقدما على كل اقتصادات أوروبا مع ناتج محلي إجمالي يتجاوز 10 تريليونات دولار، والرقم دا هيوازي تلت الناتج المحلي لاوروبا كلها واللي هيوصل الي 33 ترليون دولار وإن إندونيسيا، ونيجيريا، وباكستان، هيحتلوا المراكز من الرابع إلى السادس في الترتيب العالمي، وإن "ألمانيا" صاحبة أكبر اقتصاد أوروبي هتكون في المركز التاسع عالمياً خلف البرازيل ودا على سنة 2075.

وتوصلت نتائج دراسة البنك الأمريكي إن  الاقتصاد المصري هيبقي الـ 12 عالمياً بحلول 2050 مع ناتج محلي إجمالي بالقرب من 3.5 تريليون دولار، والدراسة جابت أدلة ومؤشرات كتيرة على توقعاتها لكل اقتصاد.. لكن خلينا في اقتصادنا المصري ونسأل نفسنا هل فعلا احنا نقدر نعملها ونتقدم كده.. خلينا أرد عليك هو حضرتك كنت تتوقع أن مصر تحفر قناة سويس جديدة في سنة واحدة وهل كنت تتوقع إنك تلف القاهرة كلها شمالها وجنوبها وشرقها وغربها في ربع ساعة من غير زحام بعد ما كنت تنام بالساعات في إشارة روكسي وهل كنت تتوقع إنك تصرف 10 آلاف مليار جنيه في 9 سنين بس عشان تعمل بنية أساسية تخليك أسطورة اقتصادية وتنطلق في البناء والتعمير وتأسس لاقتصاد عالمي بشبكة طرق حديثة ومتنوعة وباكبر شبكة لوجستية في العالم من طرق دولية وسكك حديدية وموانئ عالمية ولو جستيات واهم طريق ملاحي في العالم وطرق وممرات دولية للمال والأسواق .

عارفين مشكلة كتير من المصريين ايه.. أنهم مش مستوعبين حجم اللي اتحقق في مصر خلال سنين قليلة شايفين الأمور من منظور الأزمة الاقتصادية اللي احنا فيها دلوقتي لكن مايعرفوش إنها أزمة مؤقتة ليها ظروفها وقبل كورونا مصر حققت أعلى معدل نمو في العالم وكانت طايرة بصاروخ في عالم المال والاقتصاد والاستثمار وانطلقت تاني قبل المشكلة الروسية لكن الظروف العالمية جت على الكل وأزمة وهتعدي وترجع مصر تنور تاني في المنطقة لأنها البلد الوحيد اللي عندها مقومات تخليها عملاق اقتصادي عالمي زي تنوع فرص الاقتصاد المصري من قطاع سياحي ضخم هيكون الأكبر عالميا لانه عندك كل حاجة السائح بيدور عليها آثار وحضارة وشواطئ ومتاحف وصحراء واستشفاء وعلمين جديدة وكان عندك محور قناة السويس الجديد واللي بيحصل في اقتصادية القناة لوحده قادر يخلي مصر في حتة تانية اقتصاديا وعندك صناعات وتعدين وطاقة نظيفة وعندك أسواق مفتوحة وداخل في تجمعات دولية ضخمة زي البريكس والكوميسا وطريق الحرير وانت مركزي تجاري هام في كل تجمع فيها.

احنا جايين وقادمون لأننا عندنا كل مقومات انك تبقي دولة عظمي الشعب وملايين الشباب اللي تقدر تبني وتعمر وأراضي واسعة ومشروعات في كل حتة وطموح قيادة ملهوش اخر  وفرص ذهبية للاستثمار الأجنبي عندك وكل المؤشرات وكل اللي اتحقق بيقول انك هتكون مركز المنطقة بفضل امكانياتها الاقتصادية والسياسية وموقعها الجغرافي الفريد والتغير اللي بيحصل في خريطة التجارة العالمية اللي انت في القلب منها.