تقرير خطير عن مستقبل الدهب.. مفاجأة هتقلب الموازين في سوق الصاغة

 
في الأيام الأخيرة الدهب رجع يسترد جزء من قوته المفقودة قدم الدولار وعلى المستوى العالمي وكمان المحلي أسعار المعدن النفيس بتحقق قفزات كبيرة وسعر الجرام زاد بأكتر من 400 جنيه مرة واحدة خلال آخر شهر.. فيا ترى ايه اللى بيحصل فى سوق الدهب ؟ وليه الأسعار رجعت تزيد تانى ؟ وايه حكاية التقرير اللى بيتوقع مفاجأة كبيرة جدا فى سوق المعدن النفيس خلال الشهور الجاية؟ وليه البنوك المركزية فى العالم كل بتتسابق على حيازة أكبر كميات من الدهب؟ 
 

من ساعات صدر تقرير مجلس الذهب العالمي عن  اتجاهات الطلب على الدهب للربع التالت من 2023 ،وكشف التقرير استمرار البنوك المركزية في الحفاظ على وتيرة شرائية تاريخية للمعدن الأصفر وبلغ الطلب ربع السنوي على الدهب باستثناء التداول خارج البورصة 1147 طن ودي أعلى بنسبة 8% من متوسط الطلب خلال الخمس سنين اللى فاتت.  
ووفقًا لبيانات المجلس الذهب العالمي شهدت البنوك المركزية تالت أقوى ربع سنوي من حيث صافي المشتريات واللى وصلت إلى 337 طن في الربع التالت من 2023 على الرغم من عدم تحطيم الرقم القياسي اللي سُجل في الربع التالت  من 2022، ووصل الطلب من بداية العام لغاية دلوقتي إلى 800 طن، وده رقم قياسي جديد محصلش قبل كده خالص. 
و من المتوقع وفقا لمجلس الذهب العالمي استمرار السلسلة القوية من عمليات الشراء من قبل البنوك المركزية في مسارها لنهاية العالم وده بيشير إلى تحقيق إجمالي سنوي تاريخي في نهاية  2023.
ورفعت الدول  احتياطياتها من السبائك بمقدار 337 طن في الأشهر الأخيرة حتى نهاية سبتمبر وده بعد زيادة قدرها 175 طن في الربع التاني وده أكبر من التقدير السابق للمجلس البالغ 103 طن. 
وأدت قوة السوق إلى انفصال الدهب بشكل متزايد عن عوائد سندات الخزانة المعدلة حسب التضخم، واللى عادة بتكون المحرك الرئيسي للسبائك اللى مبتحملش أى فائدة.. وارتفعت أسعار الأونصة عالميا الى مستويات فوق ال 2000 دولار بعد سلسلة من التراجعات فى اسعار المعدن الأصفر وصلت الى 1800 دولار للأونصة.
وعن مستقبل أسعار الذهب ومعدلات الطلب على المعند النفيس قال مجلس الذهب العالمي انه فى ظل تزايد التوترات الجيوسياسية والتوقعات بالاستمرار في عمليات الشراء القوية من قبل البنوك المركزية هيكون فيه تصاعد في الطلب على الدهب بشكل هيفاجئ الجميع
وارتفعت أسعار الدهب بعد اندلاع الحرب بين حركة المقاومة حماس وإسرائيل، بشكل ساهم  في تأجيج التوترات في منطقة الشرق الأوسط اللى بتعتبر ذات أهمية حيوية لإمدادات الطاقة العالمية، وده عزز الطلب على الدهب باعتباره الملاذ الآمن و أدى إلى صعود الذهب الفوري من 1810 دولار يوم 6 أكتوبر كأدنى سعر قبل يوم واحد من بدء الحرب إلى مستوى 2009 دولار وفق آخر معدلات سعرية. 
وتوقع مجلس الذهب العالمي استمرار شهية الصين تجاه الدهب حتى نهاية 2023 وقال ان فيه طلب متزايد على المعدن النفيس فى الصين بصورة غير مسبوقة.
وكشف المجلس في توقعاته الأخيرة أن الطلب على السبائك والعملات الدهبية في الصين ارتفع بنسبة 16% على أساس سنوي خلال الربع التالت، ومن المتوقع أن الطلب يفضل قوي خلال الشهور التلاتة الأخيرة من 2023.