ليه البنك المركزي بيسحب السيولة من البنوك.. إيه اللي بيحصل؟

يا ترى ليه البنك المركزي بيسحب سيولة نقدية بمليارات الجنيهات من البنوك المصرية؟ وهل الاجراء ده معناه ان فيه مشكلة او حاجة كبيرة هتحصل الفترة الجاية؟ والبنك اتلمركزي بيودي السيولة اللى بيسحبها دي فين ؟ وايه آلية السوق المفتوح اللى بيطبقها صناع السياسة النقدية فى مصر؟ وايه علاقة اللى بيحصل من البنك المركزي بمعدلات التضخم اللى سجلت مستويات قياسية محصلتش قبل كده؟ وهل ده هيكون ليه تأثير على سعر الدولار فى السوق السودا ؟ 

من ساعات البنك المركزى أعلن عن سحب 150 مليار جنيه سيولة نقدية من 24 بنك لمدة 7 ايام .. وطرح السيولة دي كودائع ثابتة العائد بمتوسط فائدة %19.750 .. فيا ترى ليه البنك المركزي عمل كده؟ 
بص يا سيدي سحب السيولة من البنوك واحدة من الآليات اللى بيستخدمها البنك المركزي وبتعد تعد أحد الأدوات في يد السياسة النقدية لتحفيز البنوك على جذب مدخرات من العملاء بعائد مجزي وده بيزيد من شهية الادخار في الجنيه أكثر الإنفاق وده بينعكس على تراجع التضخم بشكل غير مباشر
وآلية الودائع المربوطة واحدة من أدوات السوق المفتوحة لإدارة حجم السيولة، وامتصاص الفائض  لدى الجهاز المصرفى من أجل السيطرة على السيولة فى السوق، وبتستهدف بشكل أساسي خفض حجم المعروض النقدى من الجنيه، بالإضافة إلى تحجيم التضخم.. والموضوع بشرح مبسط ان كل ما السيولة فى السوق بتزيد الطلب على المنتجات والسلع بيزيد ومعاه التضخم بيرتفع فلازم البنك المركزي يتدخل ويقدم حوافز للادخار تخلى الناس بدل ما فلوسها تكون معاها وتنزل تشترى أكتر لا تحط الفلوس فى اوعية ادخارية وتحقق ارباح كبيرة. 
ومن ضمن أهداف سحب المركزي للسيولة سد فجوة السيولة في التدفقات الداخلة والخارجة وكمان تلبية احتياجات وزارة المالية خارج نطاق أذون الخزانة أو توفير السيولة لبعض القطاعات في الدولة 
كمان سحب المركزي للسيولة بيساهم في خفض معدل التضخم من خلال تحفيز البنوك بسحب سيولة من العملاء وإتاحة عائد مرتفع على المدخرات وده بيزيد من شهية الاستثمار في الجنيه المصري داخل الجهاز المصرفي وبيقلل من الاتجاه للاستثمار في القطاعات التانية  زي الدهب أو العقارات وخلافه.
وفى العطاء الأخير أعلن البنك المركزى عن طرح ودائع ثابتة العائد خلال بقيمة 150 مليار جنيه لأجل 7 أيام، واتقدمت البنوك بـ 24 عرض بقيمة 281.950 مليار جنيه قبلت وزارة  المالية 150 مليار فقط بمتوسط فائدة %19.750.
المركزي أعلن كمان عن طرح ودائع مرتبطة بالكوريدور بقيمة 100 مليار جنيه لأجل 28 يوم واتقدمت البنوك بـ 34 عرض بقيمة 132.050 مليار وقبلت المالية منها الـ 100 مليار المطلوبة فقط، بمتوسط عائد %19.785.
والكلام ده معناه ان فيه حجم سيولة كبيرة جدا فى البنوك والسيولة دي لو اتفكت ونزلت السوق هترفع حجم الطلب على كل السلع وهتؤدي الى ارتفاعات أكبر فى اسعار كتير من السلع وعشان كده لازم صناع السياسة النقدية طول الوقت يفكروا ازاى يعيدوا تدوير السيولة ويوفروا عناصر جذب للأفراد للاستثمار فى أدوات الدين الحكومية.

وبيطرح البنك المركزي من خلال السوق المفتوح 3 عطاءات أسبوعية الأولى عطاءات بمعدل فائدة ثابت أجال أسبوع فقط، كل يوم تلات ودي ودائع قصيرة المدة وبعد انتهائها بيحق للبنوك استردادها أو إعادة استثمارها مرة تانية.

-والتانية عطاء بنظام آلية السوق المفتوح من خلال طرح وديعة بمعدل فائدة مرتبط بسعر الكوريدور آجال 28 يوم كل يوم أربع، وهي أعلى فترة مقررة في النظام ده وبعد انتهاء آجالها بيسترد كل بنك حصته أو بيعيد استثمارها مرة تانية بحسب حجم العطاء المطروح من المركزي مجددا.
والتالتة وديعة بمعدل فائدة متغير آجال 28 يوم ودي متوقفة من 2018 .. وبيسمح للبنوك العاملة فى السوق المحلية، بالتقدم بعروضها مع الحرية فى تحديد العائد المطلوب، على أن يكون قبول الطلبات ذات العائد الأقل، زي ما بيحصل فى عطاءات أذون الخزانة المحلية.