مصر داخلة على اقتصاد التريليون دولار.. دماغ السيسي فيها إيه

ازاي مصر هتقفز فوق الجميع بالمنطقة وهيكون ليها اليد العليا في كل الاقتصاديات الكبرى وليه السيسي كان مخبي اللي بيحصل في سيناء وايه هي مشروعات القرن فيارض الفيروز وهل نبؤة جولدمان ساكس هتتحقق فعلا
 

داهية ومش ساهل ومحدش يعرف مخه بيفكر ازاي وعنده ثقة غريبة جدا.. دا الكلام اللي بيقولوه المصريين عن السيسي وهما على القهوة أو في المواصلات والشغل ودلوقتي الموضوع عدى الكلام ووصل إن الناس بتدعيله ربنا يوفقه بعد ما شافوا إن كل كلمة وكل مشروع عمله كان سابق عصره وإنه لو متعملش في وقته كان زمان مصر في كارثة حقيقية..يعني لو متعملش مشروعات التنمية والزراعة والكهرباء والمصانع كنا بقينا في وضع صعب جدا بعد أزمة روسيا وتوقف حركة الاستيراد والتجارة وكنا حرفيا مش هتلاقي سلع نشتريها بالغالي أو بالرخيص.. السيسي لو مطورش الجيش المصري بالشكل اللي كلنا شفناه دا كان زمانا بجد في موقف صعب وسط مؤامرات حولين وحرب على الحدود وكنا مطمع لاي مخطط عاوز ياخد حتة من سيناء أو يهجر الفلسطينيين ولا كان قدر يجيب حق الأقباط في ليبيا ولا يوقف التدخل التركي في دول الجوار ولاكانت مصر  فرضت نفسها قوة إقليمية في جنوب المتوسط وأوروبا كلها تعملها حساب.

السيسي عمل حاجة مصر والتاريخ مش هينساها ابدا وهي إنه قدر يكتشف ثروات البلد ويشتغل عليها بأفكار مختلفة وجرأة في القرار وقدر يصنع امل جديد لبلد خدت على عقدة الخواجة وإننا فاشلين دائما في كل حاجة وكلام تكسير المقادير دا.. السيسي اشتغل على الأرض وقال للمصريين انتوا تقدروا تعملوا المستحيل وسيبكم من كلام غسيل المخ دا إننا ضعفاء وكانت البداية مشروع قناة السويس الجديدة اللي تم في بداية حكم الرئيس السيسي وكان متعمد عشان يقول للمصريين نقدر نعمل المستحيل بالثقة في الله اولا وفي نفسنا ثانيا، وبعدها بدأت مصر تعرف المشاريع العملاقة وتشتغل حسب رؤية واضحة ومعروفة باليوم والساعة وامتي هنعمل ايه وازاي ..هي الدول بتتقدم كده إنه يكون عندك رؤية  متبصش تحت رجليك ولأول مرة مصر بيكون عندها رؤية طويلة الأجل 2030 و2050 و2075 وكل فترة ليها مشورعاته ورؤيتها.. هو دا اللي اختلف في مصر خلاص مفيش عشوائية مفيش حاجه هتتعمل من غير تخطيط ومفيش مشروع هيتعمل من غير دراسة جدوى.

النهاردة الدكتور مصطفى مدبولي رئيس الحكومة كان في زيارة لشمال سيناء ليها معنى ومغزى مهم جدا بيأكد على علاقة سيناء  بالمصريين وأنها اغلى حتة في الوطن لقلوبهم  والحقيقة الزيارة في التوقيت دا بالشكل دا دلوقتي ضربة معلم وبتقول إن اللي بيدير البلد حد فاهم جدا وعميق وداهية سياسية وليه أحلام كبيرة في بلده بيخطط يحققها.. والنهاردة رئيس الحكومة وهو بيتجول في سيناء الآمنة اتكلم في أرقام كتير ومشروعات عملاقة بتتكلف 600 مليار جنيه ودا رقم مهول عشان تصرفه في محافظة واحدة لكن هي دي مصر كل مشروعاتها بقت عملاقة وكلها مشروعات ليها جدوى ومردود اقتصادي ضخم جدا وهتجيب مليارات الدولارات في السنين اللي جاية..

تعالوا نشوف الدكتور مدبولي اتكلم في ايه.. رئيس الحكومة وهو في مقر الكتيبة 101 صاحبة البطولات العظيمة في سيناء اتكلم على مشروعات لوجوستية وتعليمية وعن موانئ دولية وشبكة سكة حديد وطرق عالمية لربط نقل التجارة من آسيا باوروبا واتلكم عن تطوير الساحل الشمالي لمحافظة شمال سيناء وعن مشروعات ضخمة في السياحة والتعدين والتنمية البشرية وإعادة تسكين أهالي المحافظة في مناطق حضرية وخلق فرص استثمارية عملاقة للشركات الأجنبية والعربية للاستثمار في المشروعات اللي ملهاش اخر في سيناء واستغلال موقعها الجغرافي والاستراتيجي على أهم موانئ ونواصي العالم وإن مشروعات شمال سيناء اللي قال عليها مدبولي كفيلة تدخل اقتصاد مصر لمنطقة التريليون دولار ودي البداية بس.. فاكرين لما بنك عالمي وهو جولدمان ساكس الأمريكي  قال مصر هتبقي سابع اقوي اقتصاد في العالم وقبل ألمانيا والأكبر في المنطقة سنة 2075  بإجمالي اقتصاد 10 ترليون دولار.. الناس دي متابعة اكتر مننا وعارفين هما بيقولوا إيه ومش بيقولوا اي كلام .