مصر مبتهزرش وسينا مش هنسيبها لحد.. سر زيارة رئيس الحكومة لأرض الفيروز

من أول يوم اتطرحت فيه فكرة تهجير الفلسطينين من قطاع غزة الى سيناء مصر أعلنت موقفها بشكل واضح ورفضت كل الضغوط اللى اتمارست عليها لقبول المخطط الاسرائيلي.. والرئيس السيسي بنفسه وفى أكتر من لقاء ومقابلة مع زعماء وقيادات دول غربية قالها بوضوح ان تصفية القضية الفلسطينية مش هيكون ابدا على حساب مصر.. والرئيس قال كمان ان اهل فلسطين مرحب بيهم على ارض مصر كضيوف لكن فكرة تهجيرهم قسريا ده بيعنى تصفية القضية وأمر مرفوض تماما.. وبسبب تزايد الضغوط على مصر ومحاولات تمرير المخطط مصر ردت على أرض الواقع وفى الساعات الأخيرة كان فيه زيارة مهمة لرئيس الوزراء لسيناء .. فيا ترى ايه سر الزيارة دي فى التوقيت ده بالذات؟ وايه الرسايل اللى مصر عاوزة توصلها للداخل والخارج ؟ وايه المشروعات المهمة اللى الدولة هتنفذها فى سيناء الفترة الجاية ضمن خطط تنمية أرض الفيروز؟

واضح ان الأمريكان ومعاهم دول الغرب كلها ما يعرفوش قيمة سينا بالنسبة لمصر وللمصيين وما يعرفوش كمان اننا استردينا أرضها وحافظنا على ترابها بدماء شهدائنا فى حروب 67 والاستنزاف وفى نصر اكتوبر المجيد.. وما يعرفوش ان سينا تحديدا قطعة مهمة فى جسد مصر لا يمكن التفريط فيها مهما كان التمن.. ودي الرسالة اللى وصلها الرئيس السيسي لقادة العالم كله فى قمة القاهرة للسلام واللى جدد فيها الرئيس التأكيد على ان القية الفلسطينية مش هيتم تصفيتها بأى حال من الأحوال عن طريق نقل اهعالى قطاع غزة الى أرض سيناء.

وفى اطار حرص الدولة على مواصلة تنمية  سيناء وتعميرها رئيس الحكومة الدكتور مصطفى مدبولى راح سينا ومعاه عدد كبير من الوزراء وكبار المسئولين بالاضافة الى مثقفين وفنانين وده لاطلاق المرحلة التانية من تنمية سيناء.

وخلال الزيارة رئيس الوزراغء وجه رسائل ساخنة بتجدد رفض مصر لمخططات الصهاينة والامريكان فيما يتعلق بتهجير الفلسطينين الى سيناء وقال ان أن مصر مش هتسمح بحل أو تصفية قضايا إقليمية على حسابها أبدا.. وقال احنا  مستعدين كمصريين للدفاع عن كل ذرة رمل في شمال سيناء وان دي رسالة واضحة باننا مش هنسمح لحد يقرب من تراب سينا.

رئيس الحكومة اتكلم عن ماذا تعني سينا بالنسبة للمصريين وقال مفيش  أسرة في مصر مفيهاش أب أو أخ أو عم مخدمش في قواتنا المسلحة ولا في الشرطة وخدم في شمال سيناء وبذل روحه، سواء استشهد، أو أصيب، أو شارك في العمليات.

مدبولى قال كمان انه على المستوى الشخصي يشرفه أن والده رجل من رجال القوات المسلحة، وان والده منذ نعومة أظفاره بيحكي له حكايات وقصص عن بطولات حروب 56 و67، و73، وأبطال مصر في الحروب دي اللي  قدموا أرواحهم في سبيل الوطن وحماية الأرض الغالية .. وأكد ان كل ذرة رمل من أرض سيناء مستعدين كلنا نقدم ملايين الأرواح فداء ليها " بس محدش يقرب منها".

واستعرض  رئيس مجلس الوزراء تفاصيل المشروعات التنموية اللي نفذتها الدولة خلال الفترة اللى فاتت في إطار خطة تنمية سيناء، وأكد انه تم تنفيذ مشروعات على أرض سيناء بتكلفة أكثر من 600 مليار جنيه.. وقال ان الحكومة بدأت بالجزء الصعب وهو وضع البنية الأساسية الكبيرة اللى بتحتاجها سيناء لتنفيذ عملية التنمية زي الكهرباء والمياه والصرف الصحي والتحلية وشبكات الطرق والأنفاق اللى بتربط دالمنطقة بمصر بصورة كاملة.

وأكد مدبولى ان الدولة طول الوقت كانت بتتكلم عن تنمية وتعمير سيناء لكن على ارض الواقع الاهتمام بارض الفيروز بدأ فعليا بعد قيادة الرئيس عبد الفتاح السيسي بدءا من 2014، وقال انه فى البداية الحكومة كانت بتشتغل فى ظروف غير طبيعية ووقتها  كان أهالي شمال سيناء بيعانوا من ويلات الإرهاب وتقريبا مكنش بيمر اسبوع الا وفيه حادث او هجوم ارهابي يستهدف الجيش والشرطة أو أبناء سيناء.