نصيحة الرئيس اللي هتنقذ الاقتصاد.. محدش صدقها وقتها ودلوقتي الكل بيشيد بيها

من حوالى 4 سنين وتحديدا فى مارس سنة 2019 وخلال الاحتفال بيوم المرأة وتكريم الأمهات المثاليات الرئيس السيسي وقتها فتح قلبه مع المصريين على الهواء مباشرة واتكلم عن الأزمات الاقتصادية اللى بتعيشها مصر والتاس اغللى بتشتكي من غلاء الأسعار ووجه كلامه للمصريين وقال:"الأسعار لو عاوزين تسيطروا عليها .. الحاجة اللى سعرها يغلا ما تشتريوهاش"، وقال ان اى تاجر هيحس ان السلعة اللى بيبعها فيها مغالاة وان الناس امتنعت عن شرائها هينزل سعرها على طول لأنه عاوز يبيع ويكسب".. النصيحة دي وقتها ناس كتير ما اتعاملتش معاها بجدية وناس كتير قالت يعنى لما نبطل نشترى الحاجة هترخص.. وناس تانية خالص استغلتها للهجوم على الرئيس..  لكن محدش وقف عندها ولا فكر فيها بعقلانية وازاى فعلا ممكن نستفيد منها لوقف جشع التجار.. وتدور الأيام وتلف وكل الناس دلوقتى بتتكلم عن النصيحة دي وان ازاى لو نفذناها كنا أنقذنا الاقتصاد ووفرنا مليارات الجنيهات اللى اتحطت فى جيوب حيتان الأسواق.

من يوم 7 اكتوبر اللى فات ومع استمرار العدوان الاسرائيلي على اهلنا واخواتنا فى غزة واعلان أكتر من شركة عالمية دعمها للكيان الصهيوني ظهرت حملات قوية لمقاطعة منتجات الشركات دي لأن كل جنيه بتدفعوا فى سلعة بيروح جزء منه لتمويل اسرائيل ومساعدتها على شراء أسلحة وذخيرة بتقتل بيهم الأطفال والنساء والاف المدنين يوميا في غزة .. و مع مشاهد الموت والدمار اللى بتعرضها وكالات الأنباء والقنوات الفضائية على مدار ال 24 ساعة حققت حملات المقاطعة نجاح منقطع النظير.. وبنظرة بسيطة على أرفف السوبرماركات والهايبرات وحتى محال البقالة الصغيرة هتعرف ان سلع مهمة زي بيبسي وكوكاكولا واريال وشيبسي وغيرهم سلع كتير بقا محدش بيشتريهم تقريبا والناس دلوقتى اول حاجة بتسال عنها هل المنتج مصري ولا مستورد وما بتشتريش غير المصري.
طب ايه اللى حصل بعد تجاح حملات المقاطعة ؟ 
كل الشركات الكبيرة بدأت تخفض سعر منتجاتها واسعار السلع نزلت بنسب متفاوتة من 25 الى 50 % تقريبا وفيه شركات تانية بتدلل على بضاعتها وعاملة عروض وتخفيضات محصلتش قبل كده.. يعنى كلام الريس كان صح لما قال الحاجة اللى تغلا ما تشتريوهاش .. لأن التاجر او المصنع لما يلاقي نفسه هيخسر وبضاعته هتتراكم عند التجار وهترجعلوا بعد كده هيقلل هامش الربح الكبير بتاعه عشان يحافظ على حصته فى السوق.. تخيل بقا ايه اللى كان  ممكن يحصل لو طبقنا القاعدة دي من 4 سنين وازاى اسعار كتير من السلع مكنتش هتوصل للمستويات اللى وصلتلها دلوقتي 
طب هل نكتفى بالمقاطعة وبس ؟ 
لا طبعا المقاطعة واجب وطنى عشان دم اخواتنا فى غزة لكن كمان مهم اننا نستمر فى دعم المنتجات المصرية ونشترى اى منتج عليه شعار "صنع فى مصر" .. وكل جنيه هندفعوا فى منتج مصري هنمنع وصوله لشركات بتساهم فى قتل اطفال غزة وكمان هنوفر بيه فرصة عمل لشاب او هنحط طوبة فى مصنع جديد هيفتح ابواب رزق لعشرات المصريين وكل ده هيساهم فى نهضة قوية جدا للاقتصاد الوطنى وهيقضى على التضخم وارتفاع الاسعار غير المبرر لكتير من السلع وكمان هيوفر لمصر مليارات الدولارات بيتم استخدامها فى استيراد سلع ممكن بسهولة الاستغناء عنها ببدايل مصرية 
على الجانب التانى لازم التجار والمصنعين يهتموا بجودة المنتج المصري وبلاش بقا شغل الهلوة ومحاولة تحقيق ارباح خيالية بمنتجات جودتها منخفضة وبعد شوية محدش هيهتم يشترى منها .. كلنا قدامنا فرصة تاريخية نقدر من خلالها نخلى بلدنا تتقدم خطوات كبيرة لقدام ويقدر اقتصادنا يسترد عافيته ونخفف الضغط على العملة.