متلعبوش بالنار.. السيسي يغضب ويحذر من رد الفعل علي أي محاولة لاستهداف الحدود
الرئيس السيسي قال كلام خطير جدا النهاردة ووجه رسائل مهمة للجميع فيما يتعلق تحديدا بالأمن القومي المصري ومحاولات جر مصر للصراع الدائر في المنطقة وكمان حذر من الاندفاع وراء العواطف والغضب الغير محسوب.. السيسي قال ايه عن حادث طابا ونويبع ورد مصر عليه وايه التحذير الأخير اللي أطلقه الرئيس والرسالة الأخطر عن قوة الجيش المصري وتحذيره من اللعب بالنار
النهاردة الرئيس عبد الفتاح السيسي شهد افتتاح فعاليات المتلقى والمعرض الدولى السنوي للصناعات فى نسخته الثانية، واللي بيقام في مركز المنارة للمؤتمرات وكانت فرصة للرئيس إنه يحسم الجدل عن موضوعات كتيرة على الساحة بسبب الأحداث في المنطقة وحط النقط على الحروف وبعت رسائل خطيرة بين الكلام منها تحذيره الأخير من أن اتساع نطاق الصراع وانه مش في صالح المنطقة.
والرئيس علق على حادثي طابا ونويبع امبارح وقال إمبارح كان فيه طيارات مسيرة دخلت وتم إسقاطها أيا ما كان اللى جت منه .. وحذرت أن اتساع الصراع ليس في مصلحة المنطقة .. والمنطقة هتبقا قنبلة موقوته تؤذينا كلنا ومصر دولة ذات سيادة.. وأرجو كلنا احترام سيادتها و مصر دولة قوية جدا لا تمس وطبعا دي رسالة واضحة وصريحة إن مصر هترد على اي محاولة اعتداء على حدودها وإن مصر دولة قوية جد لاتمس كان بمثابة الانذار الاخير لاي طرف يحاول اللعب بالنار مع الدولة المصرية ودي رسالة لجميع الأطراف إن مصر محدش يقدر يمسها مش يهددها وفي نفس الوقت رسالة طمأنة للشعب المصري وبتأكد جاهزية القوات المسلحة المصرية للرد على محاولة للعبث بالحدود أو بالاجواء المصرية ودا بيفسر رد الفعل السريع من الجانب الإسرائيلي بخصوص حادثي طابا ونويبع وأنها مش مسؤولة عنه ودا بيفسر قد ايه الجانب الإسرائيلي بيخشي اي رد فعل مصري عليه.
الرئيس السيسي وجه رسالة مهمة جدا لعناصر لا تلعب اي دور في القضية الفلسطينية رغم أنها قضية كل العرب وقال إن مصر حريصة على لعب دور إيجابي في القضية الفلسطينية بمعني رغم كل ظروفنا الاقتصادية والضغوط الخارجية على مصر لكن عمرنا ما هنتخلى عن الشعب الفلسطيني وإن
سياسة مصر الخارجية لا تقوم على الغدر والتآمر وحريصون على بناء بلدنا ودي كانت رسالة تانية لأطراف بتحاول تستغل الأزمة الحالية ومعاناة الفلسطنيين لأهداف تانية.
الرئيس السيسي وجه رسالة شكر وتقدير للجمعية العامة للأمم المتحدة بعد صدور قرارها امبارح بضرورة وقف إطلاق النار وعقد هدنة وهو القرار اللي نجحت مصر مع دول عربية في انتزاعه رغم محاولة إسرائيل الحشد ضد القرار وازاي وزير خارجية الكيان المحتل اتعصب وغضب بعد نجاح المساعيد المصري في إصدار قرار الأمم المتحدة ودا بيأكد إن الدولة المصرية قوية على كافة المستويات.
الرسالة الأخطر اللي وجهها الرئيس السيسي كانت للشعب المصري بخصوص حالة الغضب والاندفاع في رد الفعل وقال إننا ممكن نندم عليه بعد كده عندما تخرج الأمور عن السيطرة وبحذر منه والرئيس السيسي بيقصد أن الدولة المصرية كلها مع الجانب الفلسطيني من أول دقيقة لكن في نفس الوقت غضبنا مش لازم يجرنا في اتجاه الدخول في صراع شامل لأن دا ليه عواقب خطيرة وإن اتساع نطاق الصراع في المنطقة هيكون ليه عواقب وخيمة.
ملخص كلام الرئيس السيسي إن أي محاولة لاستهداف الدولة المصرية هيكون ليها رد فعل مباشر وسريع وكلنا شفنا امبارح بعد اللي حصل في طابا مصدر سيادي قال لقناة القاهره الاخباريه إن كل الخيارات متاحة للتعامل مع الحادثتين، بمجرد تحديد جهة إطلاق الصاروخ وإن مصر عندها من الإمكانيات على الرد على اي طرف أيا كان مصدره ومكانه ودا التحذير اللي أربك الإسرائيليين خلاهم يتعاملوا مع مصر بحرص شديد جدا.
