السوشيال ميديا أشد من الفتنة.. حملة إشاعات غامضة لدعم الدولار الحرام

انت بتسعى..// والدولار بتسعة.. وأربعين // ــــــ الدولار بطل المرحلة// ــــــــــ الدولار وصل 49 جنيه لازم نقدمله مكافأه تفوق// ـــــــــــ جائزة لاعب الشهر لـ الدولار قفز من 44 إلى 50 في ساعات// ـــــــــ البوستات دي وغيرها هتلاقيها منتشرة بشكل كبير على السوشيال ميديا وبص على التوقيت هتلاقيها بردوا منشورة في توقيت واحد أو قريب منه بعضه ودي الغلطة للي كشفت المليشيات الالكترونية اللي بتروج لإشاعات .

الملاحظ في البوستات دي إنها معمولة بحرفية ومن ناس فاهمة جدا ومذاكرة علم نفس وهي مش بتديك السم في كوباية بلاستيك لكن بتزوقه وتحطه وسط الجاتوه ودارسين نفسية المتلقي وإزاي بيحب يشوف المعلومة بشكل غير مباشر وارمهاله في مثل او نكتة وهو هيفهما ويصدقها .

اللي حصل واللي واضح كده من الحملة الجديدة على السوشيال والترويج لإشاعات عن سعر الدولار في السوق السودا من غير ماتجيب سيرتها عشان يخلق إيحاء إن الأسعار هناك كده وبالتالي الترويج إن فيه خراب جاي في الطريق، والبوستات دي موجهة بشكل أساسي عشان إثارة الفتن والقلاقل والفوضى وتسخين الشارع على الحكومة والرئاسة وإن اللي جاي انهيار وطوفان أسعار وفقر زي طوفان نوح.

ومش من الصدفة أبدا إن البوستات دي تنتشر بالشكل الغريب ده في الوقت الرئيس السيسي بقى زعيم المنطقة بدون منازع وثبت إنه زعيم عالمي يقدر يعمل اللي هو عاوزه ومواقفه الأخيرة وقوته وجرأته خلت الشعب المصري كله يقوله يالا وإحنا معاك في أي قرار وفوضوه في كل قرار ياخده بعد أحداث غزة وكل المصريين بيدعوله بالتوفيق وحصلت حالة توحد بين الرئيس والشعب وهي حالة محصلتش من ايام عبد الناصر ودا اللي كان سبب إن البوستات دي تظهر دلوقتي.

كمان نشر البوستات بالشكل دا.. وراه هدف خبيث تاني وهو استمرار حالة رفع الأسعار والمضاربة في السوق ودا بتدعمه مافيا التجار والمضاربين.