خطة حصار مصر بدأت الآن.. إيه اللى بيحصل في الكواليس

من فترة كنا اول ناس قولنا لحضراتكم ان فيه مخطط كبير بيتم التحضير ليه لحصار مصر وعقابها على موقفها الرافض لتهجير الفلسطينين من غزة الى سيناء.. وكشفنا ان المخطط ده بيستهدف الرئيس السيسي شخصيا بسبب موقفه التاريخي من كشف مؤامرات الغرب وافساد المخططات اللى بتحصل فى الكواليس.. والخطط اللى كان بيتم التحصير ليها لتصفية القصية الفلسطينية وتصدير مشكلة أكبر لمصر.. وفى الكام يوم اللى فاتت بدأ بالفعل تنفيذ حطة حصار مصر والخطة بتعتمد بشكل أساسي على الاقتصاد وعلى الجنيه .. فيا ترى ايه اللى بيحصل ؟ وليه الدول الغربية بتستهدف تدمير مصر اقتصاديا وايه الآليات اللى بتعتمد عليها ؟ وليه الحملات الخارجية على الاقتصاد المصري بتستهدف الجنيه تحديدا ؟ وهل الأوضاع مأساوية زي ما بتقول تقارير المؤسسات الدولية؟

لو ملاحظين فى الاسبوع الأخيرة طلع أكتر من تقرير عن الاقتصاد المصري من مؤسسات تمويل دولية كلها شايفة ان الاقتصاد المصري بيعانى وان سعر الجنيه هيشهد انخفاضات تاريخية خلال ايام قليلة .. والتقارير دي كلها ظهرت فى وقت متزامن مع اصرار مصر على رفض تصفية القصية الفلسطينية على حساب مصر من خلال تهجير أهالى قطاع غزة الى سيناء وده المخطط اللى بتشرف على تنفيذه الولايات المتحدة الأمريكية وبيحظى بدعم من معظم العواصم الغربية وفى الاسبوع اللى فات مصر اتعرضت لضغوط غير مسبوقة مرة بالترغيب ومرات بالترهيب للموافقة نقل اهالى غزة الى سيناء.. لكن مصر رفضت كل الضغوط دي وأصرت على موقفها الداعم للقضية الفلسطينية وكلنا شفنا ازاى مصر لأول مرة بتهدد ان اللى بيتم التخطيط ليه ممكن يجرها لحرب مع اسرائيل وشفنا برضوا ازاى مصر رفضت دخول حاملى الجنسية الامريكية من معبر رفح الا فى اطار اتفاق اشمل لادخال المساعدات الانسانية لأهل غزة.

طبعا الموقف المصري معجبش الدول الاستعمارية الكبرى اللى بتقدم دعم غير محدود لدولة الاحتلال الصهيوني وهنا بدأ على طول تنفيذ سيناريو حصار مصر وضربها بالتقارير الاقتصادية اللي بتطلع لأهداف كلنا عارفينها ولو حضرتك صادفت أى تقرير لأى مؤسسة دولية هتلاقيه بيتكلم عن تخفيض قيمة الجنيه وعن احتمالات تخلف مصر عن سداد التزاماتها الخارجية  رغم ان الوضع الاقتصادي لمصر ما وصلش ابدا للمرحلة دي

يعنى احنا وضعنا الاقتصادي فل والمؤسسات دي بتكدب؟

لا يا سيدي.. وضعنا مش فى افضل حالة وتقدر تقول انه وضع صعب فعلا لكن التقارير اللى بتطلع دي مش هدفها اصلاح الوضع الاقتصادي ولا نهضة مصر دي طالعة لغرض معين وهو الضغط على مصر لتمرير المخططات الأمريكية والصهيونية وللأسف التقارير دي بقت بتجيب نتيجة والدولار فى السوق السودا فى اخر يوم بيحصل فيه ارتفاعات غير مسبوقة.. وواصل  ارتفاعاته القوية أمام الجنيه المصري وبيتجه لتحقيق مستويات قياسية جديدة محصلتش قبل كده فى تاريخ مصر  بالتزامن مع ارتفاع الطلب على العملة الأجنبية لأسباب كتيرة.

وطبعا بسبب التقارير دي ومع اقتراب إجراء المراجعتين المؤجلتين بشأن البرنامج التمويلي المتفق عليه مع صندوق النقد الدولي واللي بيُتوقع أن يتزامن معها تخفيض سعر الصرف الرسمي للجنيه، بجانب التوترات الجيوسياسية اللي اشتعلت في المنطقة مع استمرار الحرب في قطاع غزة ناس كتيرة بتحاول  التحوط من انخفاض قيمة العملة عبر شراء الدولار باعتباره ملاذ آمن وعشان كده أول ما تقرير سلبي عن مستقبل العملة المصرية بينشر بيحصل نشاط ملحوظ فى السوق السودا للدولار ومع النشاط ده سعر العملة المريكية بيرتفع.

واتأثر سعر الدولار فى السوق السوداء بارتفاع العقود الآجلة للجنيه فوق مستوى الـ 45 أمام الدولار بجانب تخفيض تصنيف مصر الائتماني من قبل وكالة "ستاندرد آند بورز" اللى أعلنت الجمعة اللى فاتت خفض تصنيف ديون مصر السيادية بالعملة المحلية والعملات الأجنبية طويلة الأجل من درجة B إلى -B مع نظرة مستقبلية مستقرة، وده جه بعد أسبوعين من قرار وكالة موديز بخفض تصنيف ديون مصر السيادية إلى درجة Caa1 بدلا من درجة B3.

"ستاندرد آند بورز" أشارت فى تقريرها  إلى استمرار الضغوط التضخمية على نحو مرتفع، واتوقعت مزيدا من الضعف في سعر صرف الجنيه أمام العملات الأجنبية.. وقالت أن تداعيات أزمة العملة الأجنبية هتتسبب في تباطؤ نمو الناتج المحلي الإجمالي بشكل أكبر في السنة المالية 2024. وحددت نظرتها المستقبلية للبلاد على أنها "مستقرة".

وطبعا  وكالة فيتش متوقع بشكل كبير تسير على نهج موديز وستاندرد آند بورز وتخفض تصنيف مصر هي كمان فى تقريرها اللى هيصدر فى بداية الشهر الجاي.

كل اللى بيحصل ده مش صدفة ولا حاجة مش مترتبة .. لأ دي حملة ممنهجة هدفها ممارسة اكبر ضغط على مصر خصوصا ان من العروض اللى كانت معروضة على مصر لتمرير صفقة نقل الفلسطينين الى غزة كان اسقاط ديون مصر مقابل استضافة اهالى غزة فى سيناء .. وده اللى مصر رفضته رفض قاطع