مافيا أجنبية تسيطر على السوق السوداء للدولار.. وحصري لبانكير أخبار سارة عن التعويم وقرار صندوق النقد

متابعينا الكرام على كل منصات بانكير أهلا وسهلا بكم ولايف جديد على رأس الساعة، وملخص لأهم الأحداث والتحليلات والمعلومات اللي قدمتها وحدة الأبحاث والتقارير في بانكير النهاردة الثلاثاء 24 أكتوبر 2023 لمشاهديه الكرام على كل منصات سوشيال ميديا.
 

النهاردة وحدة تقارير وأبحاث بانكير قدمت تقارير مهمة وقراءة في اكتر من حدث على الساحة المصرية وفي المنطقة واللي بتعيش أيام حرجة بسبب أحداث فلسطين
 

وكان من بين التقارير الهامة اللي عرضتها منصات بانكير  وكان بيتعلق بأزمة الدولار واللي بيحصل في السوق السوداء للعملة الأميركية واللي الأوضاع فيها خدت منحني خطير بعد سيطرة لاعبين جدد على السوق الموازية وجمع الدولارات باي تمن حتى ولو كان بالخسارة لأن هدف المافيا الدولية مش المكسب لكن ليها هدف تاني وهو خنق الحكومة المصرية بحبل شح الدولار عشان ماتلاقيش تستورد والاسعار ترفع بشكل جنوني والايحاء إن الأمور بتتجه للانهيار .

ولو مشينا ورا منحني توحش السوق السوداء للدولار هنلاقيها تضخمت بعد دخول حيتان الدهب للعبة والمضاربة بالعملة وتهريب الدهب وحبسه عشان الأسعار في الصاغة ترفع بشكل هستيري وفي نفس الوقت الدولار يختفي ويتباع باعلى سعر ممكن وبكده المكسب يبقى مضاعف ووصل الأمر إلي تهريب الدولار والذهب للخارج عشان تعطيش السوق ودا اللي اكتشفه من فترة البنك المركزي المصري وخد إجراءات سريعة عشان يكافح المخالفات اللي بتحصل في سوق العملة والدهب وعمل مبادرات زي دخول الدهب من غير جمارك عشان يوزن السوق ومبادرات تانية كتير لجذب دولار السوق الموازي للبنوك الرسمية.
لكن في الفترة الأخيرة لاحظ البنك المركزي ام سعر الدولار في السوق السوداء ليرفع بشكل غير طبيعي وضد المألوف لأن محصلش حاجة تستدعي سعره يرفع وخاصة إن الأزمة حدتها خفت كتير  ومفيش تعويم وفيه زيادة في إيرادات الدولة وكمان الشركات والمستوردين معندهمش أزمة يبقي الس فين.. بعد عمليات بحث كتير شاركت فيها أجهزة معنية اتضح أن السوق السوداء للدولار دلوقتي في ايدين مافيا أجنبية جاية تسيطر علي سوق الصرف في السوق الموازية وبتشتري الدولار باعلي سعر وكل شوية تعلي على الأسعار ودا كله عشان تلم كل الدولاؤ اللي في السوق وتضغط على الحكومة والرئيس لأسباب ملهاش علاقة بالاقتصاد لكن ليها علاقة بالأمن القومي المصري وتحركات الرئيس الأخيرة في أزمة فلسطين والمطلوب إشعال أزمة داخلية كبيرة تخلي الرىيس يركز فيها ويسيب اللي بيحصل في غزة.
 

التقرير التالي على منصات بانكير كان بخصوص  معلومات حصري. لبانكير وهي مهمة جداً وخاصة بملف صندوق النقد الدولي وقراراته الجاية بخصوص التعامل مع الحكومة المصرية
أخبار حلوة حصري..  ايه اللي هيقوله صندوق النقد اليومين الجايين عن مصر

وكلنا عارفين قصة مصر وصندوق النقد الدولي واللي بقت حديث المدينة وكل المصريين عارفين إن الصندوق كان مصمم على التعويم أو تحرير سعر الجنيه المصري ويبقي حر طليق قدام كل العملات التانية وعرض وطلب وملهوش دعوة إن الوضع يسمح بتعويم ولا لأ وايه اللي ممكن يحصل لو الحكومة حررت الجنيه ومكانش الوقت مناسب ومن هنا وقفت تقريبا المفاوضات لما الرئيس السيسي طلع وقال مفيش تعويم غير في الوقت المناسب ويكون في ظروف ماتأثرش على المواطنين لأن دي أمن قومي.

المهم من ساعة تصريح الرئيس ودخل الاتفاق مع الصندوق مرحلة حرجة وحاسمة لأن وضح طبعا إن الحكومة مش هتكسر كلام الرئيس والصندوق لقي نفسه في ورطة حقيقية وقدامه حل من اتنين يا إما يصرف باقي القرض وينسى موضوع التعويم دلوقتي وبكده اهم شروطه مش هتتنفذ يا إما يلغي اتفاقية القرض من الأساس ومعاه هيلغي إشرافه على برنامج الإصلاح الاقتصادي.. وطبعا الحل الاخير وهو وقف التعاون مع مصر والغاء القرض هيبقى كارثة للصندوق وسمعته دوليا  وهخسر أهم تاني عميل أو زبون في العالم ودي هتبقي ضربة في مقتل لسياسة الصندوق وفشل إدارته، دا غير إن مصر دلوقتي بعد دخولها البريكس بقى عندها بديل احسن للاقتراض من بنك المجموعة.
المهم بعد فترة الصندوق اختار الحل الذكي واللي فيه مصلحته  وعشان كده الصندوق وحسب المعلومات اللي وصلت بانكير قرر يكمل التعاون مع مصر ويكمل اتفاقية القرض ويستأنف صرف الشريحتين في المراجعة الجاية على طول والجديد إنه مفيش تعويم والصندوق سلم لوجهة نظر الحكومة المصرية وهيصرف القرض من غير شرط تحرير سعر الصرف الجنيه..
،

منصات بانكير عرضت تقرير مهم جدا النهاردة لأن ناس كتير مش فاهمة بيحصل إيه في قطاع الكهرباء وحكاية القطاع اللي هيدخل يستثمر في القطاع دا وهيتولي التوزيع والتحصيل والناس كتير سألت بانكير هل الحكومة هترفع ايديها من ملف الكهرباء وهتسيب المواطنين فريسة لشركات القطاع الخاص..
والحقيقة بانكير شرح بالتفصيل في تقريره على الموضوع دا.. وهو باختصار وزارة الكهرباء قررت تشرك القطاع الخاص في تشغيل القدرات الزائدة في محطات الكهرباء بتاعتها وتخصصله شريحة من المستهلكين يتعامل معاهم بالتوزيع والتحصيل والمستهلكين دول من القطاع الخاص وبعيد عن القطاع المنزلي واللي الحكومة هتفضل مشرفة عليه يعني المواطنين هيتعاملوا زي ماهما مع شركات الدولة بعيد عن القطاع الخاص.

واعلنت الجهات الرسمية أن دي تجربة لمدة سنة وهتخصع بعد كده للتقييم وإن رسوم الكهرباء للمستهلكين اللي هيتعامل معاهم القطاع الخاص هتحددها الحكومة حسب الاستهلاك والمستهلكين دول ممكن يكونوا أصحاب مصانع ومشروعات غيرهم بعيد عن عدادات المواطنين السكنية.
 

التقرير التالي معانا النهاردة على منصات بانكير خاص بموضوع محير شوية وهو محير الحقيقة للناس اللي بره مصر وهو خاص بجدعنة المصريين اللي حيرت العالم وموقفهم  مع السيسي  ووقوفهم جنبه في أصعب الأزمات.

الغريب بقي إن الجهات دي فصلت تدور ورا سر  موقف المصريين وسبب الدعم غير المحدود للرئيس السيسي...
والموضوع مفهوش سر ولا حاجة دي طبيعة المصريين وقوميتهم العربية واحساسهم بالمسؤولية تجاه كل العرب خاصة فلسطين والعالم كله اتفاجئ بجدعنة وشهامة الشعب المصري وازاى نسي الأزمات الاقتصادية وأحواله المعيشية وارتفاع الاسعار بشكل جنونى وقدم كل الدعم لأهالى غزة ولموقف مصر التاريخي المساند للقضية الفلسطينية.

وفى مصر وقت الشدة أهلها بيقفوا مع البلد وممكن يعملوا اى حاجة عشان الازمة تعدي على خير وان شاء الله مصر تعبر كل الايام الصعبة اللى بنعشها ونطمن على اهلنا فى فلسطين ونقدر نحل كل المشاكل والأزمات الاقتصادية اللى مش مصر بس اللى بتعانى منها لكن معظم دول العالم بتشتكي من ارتفاع تكاليف المعيشة ومن اسعار السلع والخدمات.

فى آخر كام سنة فيه دول كبيرة جدا وأجهزة مخابرات مهمة صرفت مليارات الدولارات لنشر الفتنة فى مصر وتهييج الناس على القيادة السياسية ومحاولة الايحاء ان الاوضاع بتبوظ.. ومصر هتفلس.. والناس مش هتلاقي تاكل.. وكل ده لغرض واحد بس ان الناس تقلب على الرئيس السيسي فى محاولة من الامريكان والغرب لابعاد السيسي عن المشهد بعد ما كان سبب رئيسي فى اجهاض مشروع الشرق الأوسط الكبير اللى امريكا كانت بتخطط لتنفيذه بمعاونة جماعات متطرفة فى المنطقة.. وطبعا الأمريكان مش قادرين ينسوا للرئيس السيسي موقفه ده وبيحاولوا كل فترة انهم يحطوا قدامه العراقيل بس الغريبة ان الرئيس السيسي بسبب جدعنة المصريين كل مرة بيوجه ضربة قوية لمخططات الأمريكان.
 

التقرير الأخير معانا النهاردة واللي عرضته منصات بانكير خاص بعملاء البنوك في مصر واخبار حلوة بإتاحة أعلى عائد على. مدخرات الأفراد لمدة سنة وبفايدة 26%

والتفاصيل بتقول إن البنوك العاملة بالسوق المحلية هتبدأ إتاحة أعلى فائدة على مدخرات المواطنين الراغبين في استثمار أموالهم لمدة سنة، ودا من خلال أذون الخزانة بالجنيه.

وسبق وأعلن البنك المركزي المصري عن ارتفاع الفائدة على أذون الخزانة الحكومية لمدة سنة إلى 26.35% كمتوسط عام لأخر طرح جرى تنفيذه الخميس الماضي.

وخلينا نفكركم إن عائد أذون الخزانة بيخضع لضريبة قدرها 20% من إجمالي العائد المحقق، أي أنه في حالة إيداع 100 ألف جنيه، فإن الفايدة عليها هتكون في حدود 26 ألف جنيه، وبعد خصم الضريبة هتكون في حدود 20 ألف و800 جنيه.