خيانة في السوق السوداء.. كنز مصر يقلب موازين الاقتصاد في المنطقة

 
 
متابعينا الكرام على كل منصات بانكير أهلا وسهلا بكم وجولة جديدة يأتيكم  على رأس الساعة، وملخص لأهم الأحداث والتحليلات والمعلومات اللي قدمتها وحدة الأبحاث والتقارير في بانكير النهاردة السبت 22 أكتوبر 2023 لمشاهديه الكرام على كل منصات سوشيال ميديا.

النهاردة وحدة بانكير قدمت عدد كبير من التقارير المصورة على منصات بانكير تتعلق بالشأن الاقتصادي والسياسي وأحداث المنطقة وآخر التطورات على الساحة

من التقارير المهمة النهاردة على منصات بانكير كان بخصوص اخر التطورات في السوق الموازية للدولار وايه التحركات المريبة اللي بتحصل وليه سعر العملة الأمريكية بيرتفع فى الساعات الأخيرة وازاي فيه ناس ومافيا وعصابات بتستغل انشغال الدولة في أمر يتعلق بالأمن القومي في سيناء وبتضارب في العملة

وحدة بانكير رصدت فى الكام ساعة الأخيرة وجود تحركات مريبة جدا بتحصل فى السوق الموازية للعملة وبسبب التحركات دي ارتفع سعر الدولار أمام الجنيه المصري إلى مستويات قياسية جديدة محصلتش قبل كده .. واستغل تجار العملة والمضاربين انشغال كل أجهزة الدولة المصرية بدعم القضية الفلسطينية وواصلوا تلاعبهم لرفع سعر العملة الأمريكية وتحقيق مكاسب كبيرة.. واستغلوا كمان بعض الاجراءات اللى خدتها البنوك بخصوص حدود السحب من البطاقات فى الخارج وشهد سعر الدولار بالسوق السوداء ارتفاعات ملحوظة بالتزامن مع إجراءات جديدة من البنك المركزي المصري بشأن استخدام بطاقات الخصم والائتمان في المعاملات الدولارية.
 

التقرير التالي معانا النهاردة على منصات بانكير مهم ومختلف وبيتعلق بإدارة الأزمة الاقتصادية في مصر وازاي فيه وحدة مخصوص في جهاز استخباراتي معادي كل هدفه إنه يوقع مصر اقتصاديا في الظروف الحالية وبسبب الموقف المصري الصلب من اللي بيحصل في قطاع غزة والوحدة دي تعتبر الكنترول روم واللي بتمسك خيوط محاصرة الاقتصاد المصري وبث الإشاعات والاخبار المضللة والتقارير السلبية والتحليلات اللي بتروج للخراب ودا كله للضغط على صانع القرار عشان يركز داخليا ويشتت انتباهه عن المخطط اللي بيحصل على الحدود

ومن شهور لو ملاحظين فيه خط اعلامي تحريضي على الدولة المصرية زاد لما الانتخابات الرئاسية قربت وانتشرت كتير من الإشاعات عن الاقتصاد بالذات وبعدها زادت التقارير السلبية عن أداء الاقتصاد وبقى الموضوع واخد شكل تحريضي لان لو كل المخاوف اللي قالت عليها التقارير الدولية عن مصر حصلت كان زمانا ميتين من الجوع ورغم إن التقارير دي مبالغ فيها جدا وملهاش علاقة بالأرقام والبيانات والمؤشرات الرسمية في مصر لكن الموضوع أخد مستوى خطير ووصل لمرحلة الإرهاب الاقتصادي وتخويف الناس من بكرة بشكل كبير.

الوحدة دي واللي بانكير بيحتفظ باسمها لدواع أمنية زي ماقلنا ماسكة معظم الخيوط في ايديها وبتتحكم وبتجند شبكة من محللين وخبراء الاقتصاد في العالم وفي البنوك الاستثمارية العالمية ومراكز التحليل الاقتصادي وجهات إعلامية دولية عشان تفبرك أو تضخم في المخاطر اللي بيتعرضلها الاقتصاد المصري 
 

وحدة بانكير عرضت تقرير مهم جدا على منصاتها وهو تقرير مختلف ومفرح في نفس الوقت لانه بيتكلم عن الكنز اللي اكتشفته مصر واللي بيأكد إن مصر دولة عريقة ولسه كنوزها بتظهر .

وعشان تكونوا معانا في الصورة من كام يوم مصر اكتشفت كنز مهم جدا هينقلها لمصاف الدول الغنية وهيخليها تتفوق على دول الخليج في حجم الثروة اللى هتمتلكها.. والكنز ده لا كان على البال ولا على الخاطر والخبراء اكتشفوه بالصدفة لكن هيكون ليه تأثير إيجابي كبير على اقتصاد مصر الفترة الجاية..

واللي حصل إن علماء الآثار اكتشفوا من كام يوم كنوزا جديدة من مدينة هيراكليون، المدينة المصرية “المفقودة” اللى  غرقت في البحر الأبيض المتوسط من أكتر من 1000 سنة. 
ووفقا المعلومات المتاحة عن الكنز الجديد بتشمل الاكتشافات اللي شارك فى الكشف عنها عالم الآثار البحرية الفرنسي فرانك جوديو مجوهرات ذهبية وأطباق فضية وجهاز صب غريب على شكل بطة وكنوز تانية كتير.

وعشان نعرف إن دي البداية بس في الاكتشاف الكبير واللي لسه هتظهر نحب نقولكم إن مدينة هيراكليون دي كانت لعدة قرون، أكبر ميناء في مصر على البحر الأبيض المتوسط قبل تأسيس الإسكندرية على يد الإسكندر الأكبر عام 331 قبل الميلاد وكان عبارة عن مدينة كاملة مليانة كنوز واللي استمرار الاكتشافات هيظهرها كلها في الفترة الجاية.

من أخطر التقارير اللي عرضتها منصات بانكير النهاردة كلم بخصوص تفاصيل الخطة السرية لتوطين فلسطيني غزة في سيناء والمقابل اللي كانت هتحصل عليه مصر لو وافقت على التوطين.. وزي ما احنا عارفين طبعا إن الأرض المصرية غير قابلة للمساومة وإن مصر بترحب بكل العرب في الظروف العادية وعندنا 9 مليون عربي فارين من حروب لكن الوضع في غزة يختلف تماما والرئيس السيسي قطع الطريق على المؤامرة وقال سينا خط احمر ومفيش حاجة اسمها توطين ومصر قادرة تحمي حدودها.
‏
طبعا كلنا متابعين اللي بيحصل في المنطقة لكن في الكواليس فيه تفاصيل كتيرة جدا بتحاول تخلق وضع جديد في الجغرافيا وتهجير الفلسطينيين ولأن مصر مستهدفة ورفضت أي كلام عن إن سينا وطن بديل للفلسطنيين كان لازم يحصل ضغط كبير على مصر عشان توافق وكانت الخطة استغلال الوضع الاقتصادي الصعب في مصر اليومين دول لأسباب كتيرة   وبدأت الضغوط من وكالات التصنيف والتقارير السلبية لضرب الاستثمار وتخويف رؤس الأموال الأجنبية ونشر صورة كاذبة عن مستقبل الاقتصاد المصري وفي المقابل كانت فيه عروض مغرية لمصر عشان تلين موقفها مدفي مسألة التهجير .. واللي كشف تفاصيلها إعلام الدولة العبرية نفسه.

وبثت القناة السابعة بالتلفزيون الإسرائيلي تقرير في الساعات الأخيرة حولين الوضع في غزة وقالت إن فيه معركة دبلوماسية حامية الوطيس بين إسرائيل ومصر وهي اللي هتقرر مستقبل غزة والحرب في المنطقة  وإن  إسرائيل طالبت بفتح معبر رفح في اتجاه واحد لنزوح الفلسطينيين لسيناء مقابل مزايا اقتصادية كبيرة تتعهد بيها اسرائيل والولايات المتحدة والمؤسسات المالية تدفع لمصر  وكمان الوكالات اياها تصحح التصنيف مقابل توطين جزء من أهل غزة في سيناء. وبكده يبقي عرفنا تفاصيل المخطط الخبيث ودور مؤسسات التمويل والتصنيف واللي بيخدم على السياسة وهي بتشتغل لحساب مين.

ونيجي للكلام الاخطر وكشف التقرير طريقة نقل سكان غزة إلى مصر وقال مراسل التلفزيون العبري إنه يجب على إسرائيل استغلال الأزمة الاقتصادية الحادة في مصر لصالح تنظيم المساعدات الدولية لمصر  مقابل استيعاب سكان غزة وخلي بالك من كلمة استغلال واللي جت صراحة على لسان الإعلام الرسمي الإسرائيلي.

التقرير الأخير معانا النهاردة بخصوص قدرة الرئيس السيسي على التعامل مع الملفات الصعبة في المنطقة وسر هدوئه في إدارة أخطر الأزمات وازاي أسلوبه بيدي الطمأنينة للمصريين في الشارع وخاصة في التعامل مع أزمة قطاع غزة واللي بيترتب في الغرف المغلقة..

الرئيس السيسي معروف إنه جاي من خلفية عسكرية مخابراتية ودي في العادة مش بيتولاها اي شخص لأنه لازم في شخصية رجل المخابرات تكون فيها مواصفات خاصة أولها الذكاء والهدوء والقدرة على تقييم الموقف واتخاذ القرار المناسب والعمل تحت أي ضغط وفي أسوأ الظروف.. ودا السر اللي في شخصية السيسي كثير من المعلومات قليل من التصريحات كثير من العمل الحاسم والقرارات الجريئة اللي مش لازم الناس تعرفها كلها.

وفي الأزمة الأخيرة والكلام عن احداث غزة والوضع الملتهب على الحدود الرئيس بيدير الأمور بهدوء شديد وثقة كبيرة وبيعرف امتى يضرب وامتي يتكلم وامتي يخلي الأجهزة تتصرف والحقيقة في الأيام اللي فاتت تصرفات السيسي فكرت المصريين بجرأة عبد الناصر ودهاء السادات في تعامله مع الموقف الخطير وقدر يمسك كل خيوط اللعبة في أيديه من أول أيام الأحداث وقدر يحشد الدعم لفلسطين ويحرج اقوي رئيس في العالم وهو بايدن واللي لما يجي يتكلم مع الرئيس السيسي كان عارف انها بيتعامل مع شخصية صعبة وشخصية مش بتقبل التنازل ولا المساومة على الحقوق العربية وإن فكرة سيناء وطن بديل السيسي حسمها من أول لحظة وقال خط أحمر وقالت بعديه مصادر رفيعة المستوى التصعيد هيقابله تصعيد ودي كانت الرسالة القوية اللي فهمها بايدن.

الرئيس الامريكي كان جاي وفاكر إنه هيتكلم مع السيسي عن إرهاب حماس وحق اسرائيل في الدفاع لقي شخصية مختلفة بتكلمه في دخول المساعدات الإنسانية فورا للقطاع قبل الأمور ماتخرج عن السيطرة وعن وقف المجازر الإسرائيلية وطلع البيت الأبيض وقال إن المحادثات مع السيسي كانت صعبة جدا خاصة في ملف المساعدات وطبعا البيت الأبيض مجابش سيرة سيناء وتهجير الفلسطينيين لأنه عارف الرد هيكون ايه والسيسي حسمه في مكالماته مع بايدن.

أما داخليا فالرئيس السيسي متابع كل الملفات الاقتصادية والاجتماعية ومش سايب تفصيلة إلا وعارف أولها من آخرها ولو تفتكروا من فترة السيسي طلب من الحكومة ووزير التموين زيادة السقف الزمني للسلع الاستراتيجية ومفيش سلعة الاحتياطي بتاعها مايكونش أقل من 6 شهور عشان مايحصلش ضغط على الدولة .