المستفيدون من الحرب في قطاع غزة.. وماذا يحدث للذهب والنفط

اية اللي هايحصل في الذهب "الملاذ الآمن" بسبب الحرب على قطاع غزة؟؟..وهل يتضرر سوق النفط في دولة الاحتلال جراء الحرب على قطاع غزة؟؟

أي دولة بيحصل فيها حرب أن بتقوم بحرب أو بتتعرض لحرب.. فهي بتتأثر بشكل أو بآخر اقتصاديًا.. وبتكون التبعات سلبية للغاية.. ودا نقدر نطبقه على اللي حصل لـ روسيا واللي اتفرض  عليها عقوبات اقتصادية من قبل أمريكا والاتحاد الأوروبي.. وطبعا في المقابل اتأثرت أوكرانيا نتيجة توظيف أغلب مواردها المالية لدعم المجهود الحربي.

والفترة دي.. الاحتلال الاسرائيلي بيشن هجوم مدمر وعاصف ووحشي على قطاع غزة.. والنتائج الاقتصادية عليه هاتكون كارثية.

بس الحرب مابتأثرش بس على الدولة المحاربة أو الدولة اللي بتدافع عن نفسها.. دي بتضر الكل.. وعلى رأسهم المستثمرين
خلينا بس في الأول.. نقول لحضرتك أن بنك "هبوعليم" ودا يعتبر أحد أهم بنوك دولة الاحتلال، قدر كلفة الخسائر الاقتصادية اللي هاتتعرض لها اسرائيل بـ 27 مليار شيكل بسبب مواجهتها مع حماس.. وإحنا من موقعنا هذا نتمنى لهم المزيد من الخسارة بصراحة.

بخلاف اللي هايحصل في دولة الاحتلال.. لازم تعرف أن تداعيات الحرب هاتطول قطاعات كتير ودا بدأ يظهر في سوق النقط مثلاً و الذهب.

على سبيل المثال.. النفط مثلًا نتيجة للحرب دي ارتفع فيه سعر العقود الخام الآجلة بنسبة 4%.. زي ما قالت بي بي سي في موضوع لها.. والزيادة دي كانت نتيجة مباشرة لمخاوف من أن الوضع في إسرائيل وغزة ممكن يعطل الإنتاج من الشرق الأوسط.

وطبعًا في حالة اتساع رقعة الصراع.. أو تعطل الإنتاج دا ممكن يرفع من كلفة استيراد النفط.. ودا أمر في دول بتستغله كويس اوي.. واللي بتعمله وقتها هو تقليل الإنتاج مع رفع سعر البيع.

يعني تقدر تقول أن الدول المصدرة للنفط.. بتستفيد من الصراعات اللي من شأنها تعطل تصدير النفط.. ودا بيحصل في حالة اتساع رقعة الصراع.

طيب اسرائيل هاتضر في حالة أن الدول العربية مثلًا وقفت من استيرادها للنفط؟

حضرتك لازم تعرف إن اسرائيل بتستورد 220 ألف برميل نفط يومياً.. وفي دول عربية بتمدها بالنفط دا.. لكنها في نفس الوقت عندها بدائل متعددة ودول داعمة بقوة ليها في الملف دا.. وعلى رأسها أمريكا اللي بتدعمها من خلال مد خطوط النقل من البرازيل لأراضيها.

نيجي على أهم عنصر من عناصر الاستثمار.. وهو الدهب

واللي شهد الفترة القصيرة اللي فاتت ارتفاع سريع في الأسعار.. كنتيجة للحرب في الشرق الأوسط.. والسؤال هنا.. لية سعر الزهب زاد بنسبة 6% في الوقت القليل دا.

لازم حضرتك تعرف أن الذهب ملاذ آمن.. والدول والناس بتقبل على شرائه لضبط احتياطاتها خاصة أوقات الأزمات.. وعلشان كدا الناس كان عندها رغبة هائلة في شرائه.. ومع زيادة الطلب ارتفعت اسعاره طبعا.

طبعا دا بيمثل مصدر ربح لعدد من الدول المصدرة للدهب زي الصين واستراليا والصين.. اللي عندهم مخزون هائل منه.

وكذلك التجار اللي عندهم مخزون كبير وبيقدروا يصدورا منه.. وبالتالي استفادوا من ارتفاع الأسعار وتحقيق الأرباح كنتيجة مباشرة برضوا من الحرب.