أولى بشائر البريكس.. مصر تتحرك خطوة مهمة للأمام

 
من حوالى شهرين وفى العاصمة الجنوب افريقية تم الاعلان عن قبول ملف مصر للانضمام الى تجمع بريكس بداية من يناير 2024 .. وللي ما يعرفش بريكس ده واحد من أهم التكتلات الاقتصادية فى العالم وتقريبا بيسيطر على حوالى 30% من الناتج العالمي وحجم التجارة.. ومن وقت الاعلان عن قبول عضوية مصر وكل الناس بتسأل احنا امتى هنشوف تأثير بريكس على الاقتصاد ؟ وايه الحاجات اللى هنستفادها من الانضمام للتكتل ؟ وهل ممكن مصر تلاقي بديل لصندوق النقد الدولي؟
 

 
فى الساعات الأخيرة وفى العاصمة الصينية بكين بدأت أولى بشائر استفادة مصر من تجمع بريكس..  وخلال زيارته للصين للمشاركة فى فعاليات الدورة التالتة لـمنتدى الحزام والطريق للتعاون الدولي" نيابة عن الرئيس السيسي التقى الدكتور مصطفى مدبولي، رئيس مجلس الوزراء، ديلما روسيف، رئيسة بنك التنمية الجديد التابع لتجمع البريكس، وعدد من مسؤولي البنك. 
وخلال اللقاء أكد رئيس الحكومة ان مصر هتكون عضو نشيط وفعال في بنك التنمية الجديد التابع لتجمع البريكس وأكد أنه بيتم حاليا إعداد خطة واستراتيجية واضحة لتحديد أوجه التعاون مع البريكس وكمان بنك التنمية الجديد  التابع للتحالف.
مدوبولي اتكلم عن تطلعاته لتمويل البنك لمشروعات تنمية قناة السويس فى المنطقة الاقتصادية خصوصا مشروعات الطاقة الجديدة والمتجددة ومنها إنتاج الهيدروجين الأخضر والأمونيا الخضراء وغيرها وقال انه تم بالفعل وضع استراتيجية لإنتاج الهيدروجين الأخضر.
وخلال اللقاء عبرت رئيسة بنك التنمية الجديد عن تطلعها لزيارة مصر ومناقشة المشروعات المقترحة وكمان رؤية بلد عريق بحجم مصر وتاريخها الكبير الممتد عبر الاف السنين.. وقالت أنها بتحترم بشكل كبير أولويات الدول فى تحديد مشروعاتها الوطنية، وان فيه اهتمام كبير بمسألة الطاقة وخاصة الهيدروجين الأخضر.

وكشفن عن خبر مهم وهو أن بنك التنمية الجديد التابع لتحالف بريكس بيعتزم زيارة هيئة قناة السويس والمنطقة الاقتصادية التابعة ليها في شهر يناير الجاي واتكلمت كمان عن أهمية مشروع توسعة قناة السويس اللى بيعتبر  ممر لوجستي رئيسي لبضائع العالم وقالت ان أى مساهمة فى المشروعات بتاعت القناة هيعود بالنفع على الجميع.
وزي ما كلنا عارفين فيه نظام عالمي جديد بيتشكل فى الشهور الأخيرة .. نظام هيقضى على فكرة القطب الأوحد والدولة الوحيدة المهيمنة على اقتصاد العالم.. وهتظهر قوى جديدة نصيبها من الانتاج العالمي وحجم التجارة بيزيد يوم بعد يوم.. ومن حسن الحظ ان مصر هتكون من أكتر الدول اللى هتستفيد من اللى بيحصل بعد الخطوة المهمة اللى خدتها من فترة طويلة وهتبدأ جنى ثمارها فى 2024 .
ويوم 24 أغسطس اللى فات فجر تجمع بريكس مفاجأة من العيار الثقيل وأعلن قبول انضمام 6 دول للتجمع اللى بيضم الصين وروسيا والهند والبرازيل وجنوب افريقيا والدول الجديدة منهم 3 دول عربية هي مصر والسعودية والامرات بالاضافة الى 3 دول تانية هي الأرجنتين واثيوبيا وايران .. مش بس كده بريكس اعلن كمان عن توقيع اتفاقيات بين الدول الاعضاء للتعامل بالعملات المحلية فى المعاملات التجارية بالاضافة لحاجة مهمة بيتم دراسة كل تفاصيلها حاليا وهي استحداث عملة عالمية بديلة للدولار فى اطار خطوات تصعيدية من بريكس هدفها التخلى عن العملة الأمريكية فى المعاملات التجارية وكمان فى حجم الاحتياطيس النقدي من العملات فى البنوك المركزية حول العالم. 
والخطوات الجديدة دي عاملة رعب للأمريكان اللى عارفين كويس اوى ان نجاح بريكس فى مخططه بيهدد عرش الدولار اللى من خلاله امريكا مسيطرة على العالم وبتلاعب كل الدول وتحديدا من اول العمل بنظام البترودولار اللى رط بين سعر النفط عالميا وبين العملة الأمريكية وبناء عليه كان بيتم تسعير سعر برميل النفط أو اى سلعة عالمية تانية بالعملة الأمريكية. 
ولحسن حظ مصر ان اللى بيحصل بيصب فى مصلحتنا خصوصا انها بداية من يناير 2024  هتصبح رسميا عضو فى بريكس وهتدخل فى اتفاقيات مبادلة العملات المحلية وهتقد تستفيد منها فى شراء البرتول بالعملات المحلية بعيدا عن الدولار وده هيخفف الضغط على الاحتياطي النقدي من العملة الأجنبية وهيقلل سعر المواد البترولية اللى هيتم استيرادها لأن الدفع هيكون بعملات سعرها اقل بكتير من الدولار