لوبي شرس ومندوب سامي وجماعة ملهاش ملة.. مصر والملف الخطر داخل غرف تحكم العالم
بعد الحرب العالمية التانية بدأت حركات التحرر في الدول تشتعل وظهرت الثورات الشعبية والعسكرية ضد الاستعمار وكانت مصر في مقدمة الدول اللي اتحررت وووقفت مع كل دول العالم عشان تنال استقلالها وفعلا حصلت معظم الدول على الاستقلال الشكلي لكن الاستعمار مخرجش فعليا وساب رجالته وعملائه ومسمار جحا في مفاصل الدول اللي كان محتلها وفضلت الجزائر تحت رحمة فرنسا واسبانيا فضلت بتحرك الخيوط في المغرب وليبيا مقدرتش تتخلص من كل مظاهر المحتل الايطالي والانجليز حاولوا يخلوا مصر ولاية مع الهند حتى بعد الجلاء.
مع مرور السنين دول كتير قدرت تعود لهويتها وتبني تجربتها واقتصادها لكن فضل الفكر الاستعماري وعقيدة التحكم في الدول من بعيد وبأدوات جديدة والمستعمر السابق اللي اغتنى من ثروات الدول الفقيرة لسه بيعيش بنفس عقلية التآمر واخضاع الشعوب والحكومات وكل عصر بأدواته وزمان كان بالاحتلال المباشر وبعدها بواسطة العملاء والخونة وأجهزة الاستخبارات عشان تفضل البلاد دي سوق كبيرة ليهم وممنوع تتقدم ولا تصنع ولا تبتكر ويكون عندها بحث علمي ولا تنهض اقتصاديا وعلميا وسياسيا.
وبمرور الوقت مبقاتش الدول الاستعمارية بس اللي بتحاول تركع باقي العالم وتمنعها تعيش في رخاء زيادة عن اللزوم ودخلت معاها كيانات وأجهزة وعائلات بتحكم في الاقتصاد العالمي وبتسيطر على الأسواق المالية والبنوك والبورصات وبقي الموضوع لوبي مشترك بيتحكم في مصائر الدول والأخطر إن اللوبي دا اللي بتحكمه توجهات سياسية ومصالح في كل مناطق العالم وخاصة الشرق الأوسط واللي مصر في القلب منه.
مش مطلوب إن مصر تكبر وتزدهر وتبقي دولة قوية وخطر على مصالح اللوبي العالمي الجديد.. ليه مصر بالذات مش مطلوب إنها تبقى قوية اقتصاديا وغنية .. ببساطة لأن مصر مش أي دولة.. هي من النوع الدول العظمي في ذاتها وشخصيتها السياسية والتاريخية لأنها بلد قامت على امبراطورية ضخمة هي الأولى في الكون وعندها أصالة وقوة دفع أساسية وقوة تأثير مخيفة على اللي حواليها ومصر لما كانت 25 مليون كانت مرجعية لكل دول المنطقة في كل المجالات التعليم والثقافة والموضة والفن والأدب والطرب والمرجع الديني الأهم وكان رئيسها بيشيل وزراء ورؤساء حكومات بمجرد خطبة في الإذاعة.. الخوف من التأثير المصري إنه يرجع وتبقي قوة عالمية وساعتها هتعيد تشكيل المنطقة ودا طبعا هيكون خطر داهم على مصالح اللوبي في المنطقة.
جايز كلامنا دا يكون غريب شوية لكن هو دا اللي بيحصل العالم مش ماشي كده وخلاص ومفيهوش حاجة صدفة وطول عمر الغرب وأمريكا كدول صناعية بتدور على مصالحها وبتحاول تفرض إرادتها على الدول اللي عندها النفط والغاز والمعابر وبأشكال مختلفة وبسياسة العصا والجزرة سواءعن طريق التحالفات زي التحالف القديم بين السعودية وامريكا بخصوص النفط وضمان وصوله للأسواق العالمية أو بالعقوبات زي ماحصل مع إيران.
طيب هي مصر عندها إيه عشان قوى الغرب واللوبي العالمي يخاف منه... دا سؤال مهم جدا وعشان نفهم امتى التحالف الشرير بدأ يخاف من مصر لازم نرجع 10 سنين لورا لما الجيش المصري أجهض أخطر محاولة لاسقاط البلد في الفوضى وخرج الشعب يصحح المسار وطالب بنزول السيسي في الانتخابات وتولي فعلا السيسي مسئولية مصر وبدأت كل حاجة تتغير وتحصل معجزات في كل المجالات والبنوك العالمية رشحت مصر تكون أقوى سابع اقتصاد في العالم ولأول مرة مصر تتخلص من فكر العشوائيات ويبقى عندها رؤية 2030 و2250 ، يعني البلد بقت تدار بشكل علمي وبتنهض وكمان جيشها بقي الأقوى في المنطقة وبين العشرة الكبار في العالم وبني قواعد حديثة وأسلحة متطورة وتدريب ويقدر يغير أي معادلة قوى في المنطقة وهنا بقى بدأ اللوبي يقلق ويقلق جدا جدا لأنه من الاخر خطر على رمزاللوبي في المنطقة وكمان في العالم والمندوب السامي القديم في أوروبا مش عاوز منافس قوي في جنوب المتوسط ومش قوي وبس دا كمان بيتحكم في خطوط التجارة الدولية وبقى رقم مهم في الاقتصاد العالمي والتكتلات والتحالفات الاقتصادية .
وعشان كده عمر شبكات المصالح في الخارج ما هتديك الفرص إنك تبقى كويس ومتقدم وفاكرين لما قلنا هنا في بانكير من فترة إنه مش مطلوب إن مصر تغرق ولاتسبح لكن المطلوب تعوم في مكانها ودا اللي قاله الكاتب السياسي الراحل حسنين هيكل واللي كان عاييش في غرف صنع القرار في الخمسينات والستينات وعارف طبيعة التآمر والأطراف اللي عاوزة مصر تفضل زي ماهي عشان مصالحها.
طيب حد يقولي إزاي اللوبي اللي بنقول عليه دا أو اي قوة عالمية توقف مصر والأسواق مفتوحة للجميع واللي عاوز يشتغل بيشتغل.. لو فكرت كده يبقى مخدتش بالك من كلامنا عن طبيعة اللوبي الخفي وليه مصر مش لازم تقوم.. وهنقولك تاني مصر هي الخطر الوحيد على بيتهم اللي جمبنا وهي اللي تقدر زي ماقلنا تقلب التاريخ والمعادلات العسكرية والاقتصادية والتجارية في المنطقة وأوعي تفتكر إن ممر بايدن دا كان صدفة ولا التقارير اللي بتطلع ليل نهار دي عن سقوط مصر وافلاسها صدفة وأوعي تفتكر إن حملات التشويه صدفة واوعي تفتكر إن اللي بيحصل على الحدود دا صدفة ولا مخطط الوطن البديل في سيناء صدفة، مفيش حاجة صدفة وكل حاجة زي ماقلنا بتدار في غرف مغلقة وكفاية أقولك مثلا إن أمريكا والدول الأوروبية بتعمل خطط ل50 سنة قدام والخطط دي بتتنفذ بالأمر ومفيش حاجة متروكة للظروف.
في الفترة الأخيرة ولأول مرة اللوبي العالمي والتحالفات السرية وأجهزة المخابرات تشتغل بشكل علني عشان تجهض التجربة المصرية وكان الإخوان هما اللي ظاهرين في الصورة واتكلمنا قبل كده عن تحالف التنظيم الارهابي والمخابرات البريطانية واللي بدورها فاتحة قنوات اتصال على مدار الساعة مع اللوبي العالمي للأعداء عشان مصر تتشل اقتصاديا ومتقومش تاني ومتهددش مصالحهم وكل الطرق مباحة والدفع على بياض حتى لو مليارات الدولارات مش مهم لكن الأهم إن المخطط ينجح وشفنا إزاي حجم الهجوم عن الدولة المصرية ورئيسها واقتصادها واستغلال الوضع لتعميق الأزمة ودفع الدولة للانهيار وكفاية تحبس الدولاروتلمه من الأسواق عشان الحكومة متلقيش تسدد ديونها أو تستورد السلع الأساسية أو تلبي طلبات الشركات وعشان الأسعار تولع والناس تخرج تشكي وبعدها يبدأ مخطط الترامادول اللي قال عليه الرءيس السيسي لتخريب البلد وبعد كده ترجع مصر تمد إيديها .
