الحكومة وعدت.. هل الوعد اتنفذ وأسعار السلع الأساسية انخفض؟

يا ترى الحكومة نفذت وعدها وأسعار السلع الأساسية نزل فعلا..اية مصير السبع سلع اللي حكومة أعلنت تخفيض أسعارهم..هل مبادرة تخفيض أسعار السلع جت بنتائج إيجابية؟

خلال الأيام اللي فاتت.. الناس في الأسواق كانت مترقبة وعايزة تتأكد من حقيقة تنفيذ مبادرة انخفاض أسعار السلع الأساسية اللي وعدت الحكومة بخفضها.

طبعا حضراتكم فاكرين وعد الحكومة بخفض أسعار سبع سلع أساسية وهى الفول والعدس والألبان، والمكرونة و السكر والزيت والأرز بنسبة تصل إلي 25٪، ودا لضبط أسعار السوق وتخفيف العبء عن المواطنين.

والحكومة علشان تخفض أسعار السلع دي فهي عملت على زيادة المعروض من السلع ودا مع تشديد الرقابة المستمرة على الأسواق.

و ماينفعش نتأكد إلا من خلال جولة في الأسواق.. ودا اللي عملته بانكير الأيام اللي فاتت.. وبالفعل شهدت أسعار بعض السلع الغذائية في الأسواق، تراجع ملحوظ في أول أيام مبادرة مجلس الوزراء لخفض الأسعار واللي كان أعلن عنها رئيس الحكومة الدكتور مصطفى مدبولي الأسبوع الماضي بالتعاون مع التجار والمصنعين والغرف التجارية.

في أسواق منطقة مصر الجديدة.. شهدت أسعار البيض على سبيل المثال تراجع ملحوظ.. وكمان  سجل سعر كرتونة البيض الأبيض 135 جنيه بدلا من 150 جنيه، وكرتونة البيض البلدي 145 جنيه بدلا من 160 جنيه.

وبالنسبة للأجبان، وصل سعر ربع الكيلو 15 جنيه بدلا من 18 جنيه..

وبالنسبة فهو الآن يبدأ بسعر 22 للكيلو للنوع المكسر فأعلى حسب النوع، أما بالنسبة للسكر فاستقر عند سعر 36 جنيه في بعض المحال بدلا من 40 جنيه، 
وكمان سجل كيلو اللبن الجاموسي 30 جنيه، بينما سعر لتر لبن المراعي وصل ل  36 جنيه بدلا من 38 جنيه.

سمعاك ياللي بتسأل عن الفراخ

وأحنا بنقولك اطمن.. السوق بصراحة شهد تراجع محدود، ودا لأن الدواجن البيضا واللي تعتبر الأكثر مبيعا في مصر.. بلغ سعرها ما بين ٨٠ إلي ٨٥ جنيها للكيلو بدلاً من 90 الأسبوع الماضي، وبلغت سعر الدواجن البلدي ١٢٠ للكيلو.

وفي بعض المحال كدا... طرحت عدد عروض للدواجن بتشمل خفض السعر في حالة تم شراء كمية معينة، وعلى سبيل المثال أحد المحال التجارية في منطقة منشية البكري قدم عرض وهو عبارة عن " 10 كيلو فراخ بيضاء بـ800 جنيه، و3 كيلو بانيه بـ525 و10 كيلو فراخ بلدي بـ1200 جنيه".

وعلى فكرة  أصحاب المحال توقعوا، إن أسعار الدواجن هتشهد تراجع في الأسعار الأيام الجاية، ولكن حتى الآن بيتم عرض  الأسعار وفقا للأسعار اللي حددها أصحاب المزارع للمحال والتجار.

ووفقاً لتصريحات مسؤولين مفروض مبادرة خفض أسعار السلع تكون تحت مراقبة وإشراف جميع الأجهزة التنفيذية والرقابية بالتفتيش على كافة الأسواق، والشوادر، والمعارض، والمنافذ الثابتة، والمتحركة، والمحال التجارية، ودا للتأكد من الالتزام بالأسعار المعتمدة وتوافر السلع والتصدى لأى محاولات احتكارية لأى سلعة من السلع، وخاصة من السلع الأساسية التي أعلن الدكتور مصطفى مدبولى رئيس مجلس الوزراء، عن تخفيض أسعارها.

مفروض أن مبادرة الحكومة دي لخفض أسعار السلع أنها تستمر لمدة 6 أشهر، واللي بتهدف إلى تخفيض أسعار السلع الأساسية والحد من احتكارها.