يداه لا ترتعش.. السيسي صقر المنطقة ورجل الأقدار الصعبة

في حاجتين دايما بتدى الشعب المصري الأمان على مر العصور جيشها الكبير ورئيسها القوي عشان كده مش اي حد يقدر يحكم مصر لأنه مش بيحكم بلد بس لكن بيحكم المنطقة كلها اللي بتبص لمصر على أنها الضهر الكبير في الكوارث والمصايب،  وعشان كده قالوا على السيسي خليفة عبد الناصر في قوته وشجاعته وكاريزمته وكلنا عارفين عبد الناصر يعني ايه للمصريين والعرب ودول العالم النامي، عشان كده الشعب عمره ما اختار غلط غير مرة واحدة وكان مدفوع بالعواطف وذهنه كان مشوش وهي سنة الإخوان الكبيسة وعشان كده اطاحوا بالاخوان ونزلوا يطالبوا الفريق أول عبد الفتاح السيسي إنه يترشح للرئاسة ودي كانت أول مرة الشعب يطالب شخصية بالنزول للترشح عشان عرفوه واختاروه وكلفوه برئاسة مصر في وقت كانت الدولة بتنهار حرفيا وكان رهانهم صحيح وقدر السيسي يرجع لمصر هيبتها وقوتها ويعيد بناء اقتصادها من الصفر تقريبا وعلى أساس صح.. ليه المصريين متمسكين بالسيسي ورافضين أي بديل
 

في بداية حكمه وجد السيسي إن البلد ضائعة في ملفات كتير أهمها الأمن وكلنا شفنا الإرهاب الإخواني كان عامل ازاي وملف الاقتصاد ومعيشة الناس وبدأ بطلب تفويض من الشعب لمواجهة الإرهاب المحتمل ونزلت الملايين للشوارع وأدت التفويض للسيسي وبدأت معركة الدولة مع الإرهاب ودفعت الدولة من أرواح شبابها عشان ترجع الأمن وفعلا مصر عرفت الهدوء بعد سنين كلها فوضى ودم ورعب وتفجيرات وتهديدات وانهى مؤامرة الإخوان للعودة عن طريق الثأر وإرهاب المصريين.
بعدها ركز السيسي على الاقتصاد ولقى إن مفيش اقتصاد حقيقي وقوي هيقوم في مصر من غير بنية تحتية في كل شيء بداية من الطرق والمواصلات والطاقة والكهرباء وشفنا اللي حصل من معجزات في ملف البنية التحتية وبعدها اشتغل السيسي على اكتشاف موارد مصر وظهرت حقول الغاز والبترول وتحولت مصر لمركز دولي للطاقة وبعدها ركز على الموانيء واللوجستيات واستغلال موقع مصر الجغرافي لتحويلها لمركز مهم للتجارة الدولية وقبلها عمل مشروع قناة السويس الجديدة واللي غيرت خريطة التجارة في العالم وبعدها اقتحمت الدولة مجال استصلاح الأراضي وبناء المجمعات الصناعية الحديثة وشفنا الطفرة اللي حصلت في كل قطاعات الاقتصاد والمدن الذكية وغيرها من آلاف المشروعات القومية والبطلي كلفت لغاية دلوقتى 10 آلاف مليار جنيه نقلت مصر في حتة تانية وخلاها تقفز في كل المؤشرات الدولية وتحقق أعلى معدل نمو في العالم وتوقعات انها تكون غول اقتصادي في المنطقة والعالم خلال سنين مش كتيرة.

بالتوازي مع التنمية الداخلية مصر اتحركت في الملفات الخارجية بقوة وعززت شراكتها مع كل الدول ولما مصالحها اتعرضت للخطر في ليبيا والسودان حطت خطوط حمراء للمنافسين مقدروش يعدوها بفضل قوة الجيش المصري اللي شهد أكبر عملية تحديث وتطوير وتسليح في عهد السيسي وكأنه كان عارف باللي بيحصل وطلعت شعوب لبنان وسوريا والسودان تقول احنا عاوزين رئيس قوى زي السيسي يعمل معجزات ويقدر يسيطر على اي أوضاع بفضل قوة شخصية وإن أيديهم عمرهما ما ارتعشت ولا تتردد ياخد قرار طالما في صالح شعبه.
موقف مصر من الأوضاع في غزة دلوقتي مشرف وكلمات الرئيس السيسي كانت قوية بتعكس قوة مصر وشفنا عشرات الاتصالات من قادة العالم بالرئيس السيسي لانه رقم مهم جدا في المنطقة قادر على تغيير دفة الأمور بجانب وقوفه بقوة ضد مخططات إبادة وتهجير الفلسطنيين وتعليماته بتحضير مساعدات عاجلة للشعب الفلسطيني من غير اي تردد.
عشان كده واكتر المصريين متمسكين بالرئيس السيسي لأن كل البدايل على الساحة ضعيفة  وماترقاش تبقى رؤساء احياء مش بلد بحجم مصر.