متحطش ولاتسيب فلوسك في البنك..هو إيه اللي بيحصل بالظبط
زي عادتها في تشويه الحقائق والترصد لأي قرار وتسخيره في نشر الاكاذيب انتشرت على صفحات الاخوان دعوات مشبوهة لسحب الفلوس من البنوك وعدم ايداع فلوس جديدة والحملات دي انتشرت بشكل كبير بعد تمويلها بالمال على وسائل التواصل الاجتماعي .. ياترى ايه اللي حصل في البنوك اليومين اللي فاتوا وإيه سر القرارات الأخيرة وليه الإخوان وأهل الشر بيحرضوا الناس متحطش فلوس في البنوك المصرية
في اليومين اللي عدوا صدرت تعليمات من البنك المركزي المصري للبنوك بوقف استخدام بطاقات الخصم المباشر المرتبطة بحساباتهم خارج مصر، طيب ليه البنك المركزي خد القرار.. أولا أي قرار بيصدر من المركزي بيكون هدفه حماية الامن القومي للبلاد بجانب حماية مصالح عملاء البنوك وحماية فلوسهم لما يلاقي إن فيه خلل أو ظاهرة غريبة بتعرض النظام المالي المصرفي للخطر ومتنسوش إن مصر في أزمة أو بالتحديد في حرب اقتصادية في أكتر من جبهة مع الصندوق وتجار العملة والبنك الدولي ووكالات التصنيف والتقارير المشبوهة والحملات الاعلامية المغرضة وفيه تحركات كتير مشبوهة بتقودها جماعة الإخوان لتخريب الاقتصاد.
فكل الحكاية إن البنك المركزي لاحظ إن البطاقات دي بتستغل في غير غرضها وإنها بتسحب فلوس للمتاجرة في الأسواق السودا واستنزاف النقد الأجنبي لأن التعامل على البطاقات دي بيكون بالدولار واللي بيحصل إن العميل بيحط فلوسه هما ويطلع بره يسحبها ويتاجر بيها في السوق السودا والبنك المركزي لاحظ سحب أموال بمبالغ ضخمة فقرر يتدخل عشان يوقف المخالفات واستغلال البطاقات.
وعلى فكرة دا حصل في سنة 2016 بعد تعرض النظام المصرفي لضغوط نقص العملة واستنزاف النقد الأجنبي وانتشار عمل السوق السوداء لتجارة العملة وتم إلغاء العمل بالقرارات الاحترازية في البنوك بعد ضبط سوق الصرف في الشهور والسنوات التالية لتحرير سعر الصرف في نوفمبر 2016 يعني الموضوع بيكون مؤقت.
خبراء بنوك أكدوا إن سوء استخدام العملاء لمعاملات السحب النقدي خارج مصر باستخدام بطاقات الدبت التي اكتشفتها البنوك هو السبب في حظر التعاملات خارج مصر، وإنه العملاء يقدروا يستخدموا بطاقات الكريدت خارج مصر بدل من بطاقات الخصم المباشر وفق الحدود المتاحة من كل بنك... وعشان كده متصدقش اي دعوات تحريض لسحب الفلوس من البنوك أو بتحرض على عدم ايداع أموال في البنوك المصرية لأن كل القرارات بتصب في النهاية في صالح العميل والبلد وكل البنوك المركزية بتاخد اجراءات احترازية أو استثنائية مؤقتة لضبط ايقاع السوق.
