أخيرا الأسعار هتنزل . اعرف الاسعار الجديدة لـ7 سلع ضرورية

الفول العدس، ومنتجات الألبان، و الزيت، و السكر، المكرونة، و الدواجن و البيض كلها سلع ضرورية جدا لاي بيت مصري مايقدرش يستغنى عنها ولما اسعارها رفعت الناس تعبت وعشان كده الحكومة قررت تعمل مبادرة لتخفيض أسعار السبع سلع المهمين دول.
الدكتور مصطفي مدبولي، رئيس الوزراء، اعترف إن فيه سلع اسعارها ضربت في السما وقال ان الحكومة اتخذت إجراءات كثيرة للتخفيف على المواطنين، ولتعميق الصناعة المحلية ودعمها.
من بين الإجراءات دي تخفيض السلع الأساسية الي قلنا عليها واللي أسعارها بعضها هتنزل الربع أو 25% وفيه سلع منها هتنزل 15% خلال الأيام الجاية وتقدر تحسب قيمة الانخفاض في السلع من سعرها الحالي وتخصم منه نسبة الانخفاض اللي هي 15%و25%.

رئيس الوزراء قال النهاردة إنه تم العمل مع اتحادات الغرف، من أجل تخفيض أسعار السلع الأساسية وإنه تم الاستماع لـ مشكلات اتحاد الصناعات، و المسئولين عن وفرة السلع، وأن الفترة المقبلة هيكون هناك انخفاض بالأسعار
طبعا ارتفاع أسعار السلع بشكل كبير الفترة اللي فاتت كان سبب معاناة كتير من الأسر المصرية والأسعار أثرت على ظروفهم المعيشية واي تخفيض في الأسعار معناه الناس هتفوق شوية والموظفين هيعرفوا يوفروا من مرتباتهم بعد قرار الرئيس السيسي برفع الحد الأدنى للأجور والزيادات الكبيرة في المرتبات والمعاشات وتكافل وكرامة ودي بداية حقيقية لحل الأزمة الاقتصادية الصعبة اللي ظهرت بسبب الظروف العالمية.
اهم شئ في مبادرة الحكومة لتخفيض الأسعار هو إن التخفيضات حقيقية ومشترك فيها البنك المركزي المصري والوزارات المعنية والمركزي مهمته هيوفر الدولار المستوردين بالاسعار الرسمية عشان يستورودا بأسعار معقولة بدل دولار السوق السوداء الغالي واللي بيخلي المستورد يرفع الاسعار.