اللعب مع الكبار.. ازاي الشرق الأوسط بقى في قبضة السيسي

لما هكبر هرد عليك.. فاكرين كلنا الجملة دي اللي قالها الرئيس السيسي من فترة كبيرة وكانت عن الدول الصغيرة والكبيرة في العالم وإزاي كنا دولة بتعاني بشكل كبير جدا وعشان كده مكناش رقم في معادلات السوق العالمية ولا حتى في المنطقة وكنا دولة شبه دولة منهارة بعد اللي حصل في 2011 والسنتين اللي بعدها .. دولة مفهاش قطاع قايم على رجليه وعايشة على المعونات وكانت رايحة على الانهيار والافلام.. ازاي النهاردة مصر بقت رقم مهم في الاقتصاد الإقليمي وهتبقى رقم أهم في الاقتصاد العالمي.

ممكن حد يغضب عشان بيشوفنا نتكلم عن انجازات وتأثير إقليمي ودولي وتوقعات إننا هتبقى رقم مهم واحنا عندنا أزمة في السكر والبصل يفتكر إننا بنبالغ.. لا حضرتك احنا مش بنبالغ ولا حاجة لكن فيه فرق بين الأزمات العرضية أو الطارئة ومسار الاقتصاد المستدام اللي انت ماشي فيه.. وامريكا كانت الحكومة عندها هتقفل على فكرة من كان يوم وفي بريطانيا نسبة الوفيات بين الناس الفقرا اللي مش لاقيين ياكلوا وبسبب ارتفاع تكلفة المعيشة هناك أرتفع بشكل كبير وطلع تقرير بريطاني رسمي من ساعات بيحذر من دا يعني الأزمات الطارئة في كل دول العالم.. وهل معني الأزمة في بريطانيا أنها دولة ضعيفة أو لو الحكومة قفلت في أمريكا يبقي خلاص هتنهار عشان كده أزمة السكر والبصل والطماطم وحتى أزمة الدولار في مصر مش مقلقة خالص وبتعتبر عادية جدا في عالم الاقتصاد وتقلبات الأسواق ومش مقياس على قوة الدول أو ضعفها.
خلينا في موضوعنا ازاي مصر قدرت تحقق النقلة دي من دولة عايشة على المعونات لدولة متوقع تكون أكبر اقتصاد في المنطقة خلال سنين قليلة وسابع اقوى اقتصاد في العالم سنة 2075 ،.. عشان نفكر صح دائما الموضوع مش موضوع حب وكره ولا عواطف ولا تأييد ولا اعتراض الموضوع كله اقتصاد وشغل ليل نهار وقبلهم خطط واضحة انت عاوز ايه لأن اللي ضبع مصر زمان العشوائية وعدم التخطيط وحتى لما الحاجة كان يتخطط لها مكانتش بتكمل وعشان كده ظهرت الفوضى في كل مناحي الحياة و الناس سكنت في عشش والمصانع اتعملت وسط البيوت وحتى المصانع اللي كانت في الصحراء زحف عليها البشر وبني بيوت عندها والدولة في غيبوبة ونتيجة للعشوائية دي مصر كانت كلها فوضى ونص تشطيب زي ما بنقول وكان لازم حل..

الحل جي على ايد الرئيس السيسي واللي الحقيقة معملش معجزة ولا كأن بينزل عليه وحي يقوله تعمل ايه.. كل الحكايه الراجل اشتغل اقتصاد وتنمية صح عارف المشكلات وبدأ يحلها وفق خطط زمنية ومالية ومعايير لا تسمح بأي خطأ وقرر تخليص مصر من عشوائياتها في كل حاجة وطور الإنسان قبل المكان وهجر المصريين العشش وسكنوا في بيوت آدمية بكافة الخدمات وبالتوازي اشتغلت الدولة على البنية التحتية واللي اتعملت صح المرة دي وبتخطيط سليم وخطط زمنية راعت حالة التخلف اللي كانت عليها شبكات المرافق وضغطت الوزارات الوقت عشان تلحق ونتيجة لسنين عمل جاد مصر بقي عندها احدث شبكات بينة تحتية في المنطقة والعالم في الطرق والمواصلات والمحاور والطاقة والكهرباء والمياه وكل دا كان الأرضية اللي بتفرش عليها الدولة عشان تنطلق يعني كل اللي اتصرف دا عشان يبقي عندك دولة عندها مقومات الحياة واستقبال الاستثمارات وتقدر تصنع فيها وتزرع لأن كل حاجة مرتبطة ببعضها .
مرت الشهور والأيام والسنين ومصر بقت معجزة بين الاسواق الناشئة باعلى معدلات نمو في العالم وانطلاقة بسرعة الصاروخ في البناء والمشروعات وعرفت العاصمة الإدارية والمدن الذكية في كل حتة وظهرت العلمين الجديدة وقبلها قناة السويس الجديدة والموانئ الجديدة ومحطات الطاقة العملاقة وملايين الأفدنة بتدخل الخدمة وبتتزرع بكل المحاصيل وقلاع صناعية ومدن كاملة من المصانع في كل المجالات وخطوط تجارة اخترعتها مصر في سيناء وربطها بمواني مصر وبنت قناة سويس جديدة على قضبان السكك الحديدية وعملت لنفسها رؤية خاصة 2030 كمرحلة أولي وحطت ارقام قدام عينيها ولازم تنفذها زي 100 مليار دولار صادرات و30 مليون سائح و30 مليار لايراددات قناة السويس وغيرها وغيرها.

اللي خلي مصر هتنطلق وتبقى الأقوى والأكبر في الشرق الأوسط التخطيط وتحقيق المخطط وبإمكانيات مصر وقوتها البشرية هتحقق المستحيل ودا طبعا مش هيرضي أطراف كتير وبتحاول تحط الألغام لكن مصر قادرة تعمل اي حاجة.