فلوسكم مارحتش هدر.. كلام مهم من الرئيس السيسي عن صندوق تحيا مصر والبنية التحتية

الرئيس قال اية عن صندوق تحيا مصر ودوره..فلوس المواطنين المتبرعين في الصندوق بتروح فين..الدولة صرفت كام على البنية التحتية..اجابات واضحة من الرئيس السيسي في أهم وأبرز الملفات

في مؤتمر حكاية وطن، اللي بيرصد مجهود الدولة خلال السنين اللي فاتت.. الرئيس السيسي قال كلام مهم جدا عن مشاريع الدولة واللي تم تنفيذه

حديث الرئيس كان صريح وواضح.. ومش محتاج تأويل كتير.. والنهاردة اتكلم في اليوم التالت لمؤتمر حكاية وطن عن أبرز الملفات اللي بيتسأل عنها المواطنين باستمرار.

طبعا أغلبنا تابع مجهود صندوق تحيا مصر اللي بيقدم للمواطنين خدمات مختلفة في محافظات مصر.. ودا صندوق  ذو طبيعة خاصة له شخصية اعتبارية وبيتمتع بالاستقلال المالي والإداري وبيتبع رئيس مجلس الوزراء ويتمتع بصفة خاصة برعاية رئيس الجمهورية وعنايته.

وتم تأسيس الصندوق بموجب قرار رئيس الجمهورية رقم 139 لسنة 2014 وقرار رئيس الجمهورية رقم 84 لسنة 2015. وتم الإعلان عنه ضمن مبادرة الرئيس عبد الفتاح السيسي لدعم اقتصاد مصر والتغلب على الظروف الاقتصادية الصعبة اللي مرت ببها مصر، لدعم العدالة الاجتماعية.

وخلال السنين اللي فاتت.. آلاف من المواطنين أغنياء وفقراء قدموا تبرعات مختلفة لصندوق تحيا مصر علشان يتم بعد ذلك توظيف الفلوس دي في دعم الأسر الاكثر احتياجا وتنظيم مئات القوافل في مختلف المحافظات اللي حدث بيها ضرر طارئ.

النهاردة الرئيس عبدالفتاح السيسي، ثمن الجهود اللى بيقوم بيها صندوق تحيا مصر وقال: "إنه بيقدم دورا كبيرا جدا.

وبعث الرئيس السيسي رسالة مهمة جدا مفادها أن فلوس الناس اللي تبرعت للصندوق في أمان وبيتم توظيفها في اماكانها الصحيحة، وقال "إن الأموال اللى بيتم إيداعها في صندوق تحيا مصر بتكون تحت إشراف مباشر منه.

وقال كمان..  أنا عمري ما اتكلمت عن الصندوق ده، وقلت للناس إذا كنتوا عايزين تقدموا حاجة لبلدكم صندوق تحيا مصر يقوم بدور كبير جدا، وبيقوم بدور في أي حاجة نتزنق فيها نقول خدوا من الصندوق مليار أو 2، وبالمناسبة الفلوس الموجودة في الصناديق دي تحت إشراف مباشر مني أنا".

الرئيس عبدالفتاح السيسي، كمان قدم الشكر لوزيرة التضامن الاجتماعى، وقال: "بشكرك يا دكتورة نيفين .. وبقول للناس اللى ما تعرفش .. الدكتورة نيفين شخصية فاضلة جدا في وزارة التضامن وتقوم بدور كبير.. بقلب وبرحمة كبيرة جدا.. بحييها وكل العاملين في الوزارة".

وكمان وجه التقدير والشكر للجمعيات الأهلية اللي  بتقوم بدور كبير قوي في مجتمعنا.. وقال:" اسمحولى بقول ده علشان ما حدش يسئ للجمعيات دي جزء كبير من جهدها مبني على الثقة.. الجمعيات الأهلية أجدر مننا في ممارستهم مع المجتمع".

وبحس انساني خالص الرئيس السيسي وجه بمضاعفة دعم الأيتام.. وقال إن  مصر فيها 1.4 مليون يتيم،  ووزارة التضامن بتدعم 114 ألف يتيم، والآن تدعم 245 ألفا، أي بحوالي 20% من الأيتام من قبل وزارة التضامن.

وفي موضوع تاني وهام جدا وهو مشاريع البنية التحتية الرئيس السيسي أكد أن مصر أنفقت نحو 10 تريليونات جنيه (ما يعادل 323 مليار دولار) على مشاريع البنية التحتية، واللي شملت إنشاء طرق وموانئ وتطوير السكك الحديدية.

و الرئيس السيسي أكد أن الحكومة أنفقت 10 تريليونات جنيه على المشروعات فقط، نظرًا لأن الشركات المصرية هي اللي نفذت تلك المشروعات باستثمارات كانت يمكن أن تكون أكبر لو نفذتها شركات أجنبية، وقال :"لو كانت شركات أجنبية هي من نفذت هذه المشروعات كانت التكلفة ستصل إلى 30 تريليون جنيه".

طبعا مشاريع البنية التحتية هي الوسيلة الأهم لإمداد المشاريع القومية بالمستلزمات.. ودورها مهم جدا في دعم القطاع الصناعي اللي بيحتاج توصيل كافة مستلزماته في أسرع وقت.. دا غير إنها سهلت من حركة المرور بين المحافظات.