مصر بتفرح.. الرئيس السيسي بعلن ترشحه لانتخابات الرئاسة

الرئيس السيسي للمصريين: اجعلوا الانتخابات الرئاسية بداية لحياة سياسية مفعمة بالحيوية
 

أخيرا وبعد طول تساؤل عن سر الإعلان الرسمي.. الرئيس السيسي أثلج قلوب المصريين من شوية وأعلن عن الترشح رسميا في الانتخابات الرئاسة المقبلة.

وقال الرئيس عبدالفتاح السيسي، في حديثه للمصريين في ختام فعاليات مؤتمر حكاية وطن: لقد واجهت معكم وبكم كل التضحيات والأزمات والتحديات، ونحن بصدد استحقاق انتخابي فإنني كما تعاهدت معكم منذ سنوات عشر مضت لا أبادر الا باستدعاء المصريين الذين ادعوهم بدعوة صادقة أن يجعلوا هذه الانتخابات بداية حقيقية لحياة سياسية مفعمة بالحيوية تشهد تعددية وتنوعا واختلاف دون تجاوز أو تجريح.
ومع اعلان الرئيس السيسي ترشحه للانتخابات الجاية بنحب نفكركم في البدايات وإنه ازاي الرئيس الوحيد اللي الشعب نزل بالملايين عشان يفوضه في مصيره حتى قبل ما يبقى رئيس لانهم شافوه السند والمنقذ وسط عواصف الفوضى والعنف والتآمر وقدر الفريق أول عبد الفتاح السيسي وزير الدفاع وقتها إنه ينشل مصر من جحيم الإخوان بوقوفه خلف إرادة المصريين اللي نزلو الشوارع ساعتها عشان يخلصوا بلدهم.

ولما جت انتخاابات الرئاسة بعد الفترة الانتقالية خبراء السياسة في العالم وصفوا السيسي وقتها بإنه المرشح الضرورة والوحيد اللي هيقدر ينقذ البلد من السقوط الاقتصادي والانهيار الأمني بحكم خبرته وعمله السابق اللي خلاه على علم بمؤامرات كتير كانت بتدبر في الغرف المظلمة وهو الوحيد اللي كان عارف أبعاد المخطط كله بتاع المنطقة.

بعد 10 سنين المصريين عرفوا إن رهانهم على الرئيس السيسي كان على حق وإن الرجل اللي العناية الالهية تبعته في وقت مناسب يبقى مؤيد بتوفيق ربنا ودعم الشعب.

لو قلنا ليه الناس عاوزة السيسي وقتنا مش هيكفي لكن نظرة واحدة على البلد في 2011 و2012 و2013 وحالها دلوقتي هنعرف الفرق من غير أي شرح.. لأنه الحقيقة مفيش مقارنة أساسا بين فوضى وموت وخراب ودم وحرق وبين بناء وتعمير وخضراء ومتاحف وجناين ومصانع ومستشفيات وحياة كريمة، عمر اللي بيهدم بيكون عند ربنا زي اللي بيني ويعمر.

والتجربة ثبتت إن الرئيس السيسي زعيم بقلب أسد مش بيخاف من أي حاجة وثقته في نفسه والمصريين ملهاش حدود وفي عز الخوف والفوضى والنار في الشارع كان عامل الأمان الوحيد عند المصريين وكانوا بيطمنوا لما بيشوفوه في شاشات التلفزيون في سنين العنف الكبيسة وربنا مايرجعها أيام.

10 سنين نقل فيهم السيسي مصر من خانة الدولة المنهارة اللى بنيتها التحتية في أضعف حالة لدولة قوية المشروعات فيها في كل شبر فى مصر.. وناس كتير كانت بتستغرب ازاى السيسي كل يوم تقريبا بيفتتح مشروع أو بيحط حجر أساس لمشروع جديد.. لكن الرئيس كان واضح ومشي فى تحقيق حلمه بتأسيس الجمهورية الجديدة.

وفى ظل قيادة الرئيس السيسى اتمكنت الدولة المصرية خلال ال 10 سنين اللى فاتت، من تأسيس اقتصاد قوى يتمتع بالمرونة والتنوع استنادا إلى برنامج إصلاح شامل من أجل صنع مستقبل أفضل لمصر والمصريين.
ومن أول يوم للسيسي فى الحكم سعى لتثبيت أركان الدولة وإعادة بناء مؤسساتها الوطنية وإحداث نهضة تنموية كبرى من خلال إطلاق إستراتيجية التنمية المستدامة مصر 2030 اللى بتنقسم إلى 12 محورا رئيسي بتشمل التعليم والابتكار والمعرفة والبحث العلمي والعدالة الاجتماعية والشفافية.. وكمان كفاءة المؤسسات الحكومية والتنمية الاقتصادية والتنمية العمرانية والطاقة والثقافة والبيئة والسياسة الداخلية والأمن القومي والسياسة الخارجية والصحة.