رسالة للجندي المجهول و حتى لاتضيع التريليونات.. السيسي يكشف مصير مشروعات النقل

إيه الرسالة اللي الرئيس السيسي وجهها للناس والحكومة النهاردة، وايه كان يقصد الرئيس بفكرة إدارة المشروعات اللي الدولة نفذتها ولسه بتنفذها ورسالته لرئيس وزراء مصر
 

النهاردة الرئيس السيسي شهد فعاليات جلسة المشروعات القومية والبنية التحتية بمؤتمر حكاية وطن.. والحقيقة اللي اتعرض نهاردة يخلي كل مصري يفتخر بحجم الاعجاز اللي تم على مدار 10 سنين على مدار الساعة وخاصة في البنية التحتية واللي أذهلت العالم إنها تتم في وقت قياسي طرق وكباري ومحاور ووسائل نقل حديث وزكي وشبكات قطارات ومترو ومونوريل وقطارات كهربائية سريعة بتطوي مصر كلها في ساعات واللي اتعمل في مجال الطرق والنقل الحقيقة يدرس في كل بلاد العالم اللي عاوزة تعمل بنية تحتية في وقت قياسي.
الرئيس عبدالفتاح السيسي، زي عادته مسبش تفصيلة إلا وتكلم فيها وفي كلمته منسيس بطل المرحلة والجندي المعلوم الدكتور مصطفي مدبولي مايستروا التنمية واللي كان لابينام ليل ولا نهار عشان يخلص كل التكليفات الرئاسية اللي كانت بتضغط الوقت والمشروع اللي بياخد 5 سنين كان مدبولي مطالب يعمله في سنة وعشان كده الرئيس وجه له شكر خاص النهاردة.
الرئيس السيسي اتكلم عن فكر إدارة وتشغيل مرافق الدولة بشكل اقتصادي يسمح إنه تتطور وتغطي الصيانة وتكاليف التشغيل وتجيب مكسب، ومفيش مستثمر هيشغل أي مشروع نقل جماعي مثلا من غير ما يكون فيه ألية تشغيل واضحة وتسعير يغطي التكاليف وإلا هيشتغل بخسارة ونرجع نلف في نفس الدايرة ونشتكي من تدنى الخدمات والتشغيل ونخسر مليارات ادفعت في إنشاء مشروعات النقل.

وقال الرئيس إن التشغيل الاقتصادي في قطاع النقل نقطة محل نقاش وخوف من المسؤولين والحكومة، وعلشان تفضل المشروعات جميلة وعصرية يبقى التشغل لازم يكون اقتصادي وغير كده يبقى بنضحك على بعض، والكلام بينطبق على كل مشروعات النقل بانواعها والمواني الرئيس عاوز يقول إن عدم تشغيله بالشكل الأمثل يعتبر إهدار للمال العام اللي اتصرف على المشروعات دي وكام سنة تبقى خرابة.

الرئيس عبدالفتاح السيسي، ضرب مثال في كلمته خلال مؤتمر حكاية وطن بين الرؤية والإنجاز، وقال  إنه في 2023 أصبح ميناء إسكندرية بعد افتتاح محطة تحيا مصر من أكتر الموانئ كفاءة في المنطقة.

الحقيقة الرئيس عبد الفتاح السيسي حط إيده على جرح كبير في إدارة المشروعات والاقتصاد عموما وعلى حاجة مهمة جدا العالم كله بيستعين بيها وهي المشغل الذكي أو المشغل المتخصص يعني أجيب كيان أو شركة متخصصة تدير المترو ومقابل الادارة دي هيديني خدمة مميزة وانتظام مواعيد ونظافة وهو هيتولى التشغيل والصيانة وهنا بتفضل اشكالية التسعير بين الحكومة والمستثمرـ، زي ما حصل كده بالظبط مع الشركة الفرنسية اللي كانت مشغلة الخط الأول للمترو وكان ساعتها معدل النظافة في القمة والمواعيد وخدمات راقية ودا المطلوب في كل المشروعات القومية اللي بتعملها الدولة عشان تحافظ عليها ومش شرطة المشغل يبقي أجنبي أهم حاجة يبقى فاهم وعارف.