رهان السيسي اللي هيقضي على أزمة الدولار؟.. بشاير الولاية الجديدة

 
يا ترى الرئيس السيسي بيراهن على ايه في ولايته الجديدة؟ وازاى بيفكر في حل أزمة الدولار اللى منغصة حياة المصريين ؟ وايه الأدوات اللى بيمتلكها للتعامل مع الأزمة الاقتصادية الطاحنة اللى بتمر بيها مصر في اخر سنتين؟ وهل هينفذ وعده ويخلي أزمة نقص العملة تاريخ زي ما قال قبل كده ؟ وامتى الناس في مصر هتبدأ تحس بتحسن الأحوال المعيشية؟ وهل هيتم إقرار زيادات جديدة في أسعار الخدمات الأساسية المهمة زي الكهربا والميا وكمان البنزين والسولار؟ 
 
خلاص الهيئة الوطنية للانتخابات حسمت الجدل اللى كان داير في مصر بقالوا فترة حوالية موعد انتخابات الرئاسة الجديدة وأعلنت الجدول الزمنى لانتخابات 2024 وبحد أقصى على يوم 16 يناير الجاي هنكون انتهينا من الانتخابات واتعلن اسم الفائز بماراثون الانتخابات الرئاسية ولحد دلوقتى الرئيس السيسي هو الأوفر حظا للفوز بالانتخابات لأسباب كتيرة أولها ان لحد دلوقتى كل الأسماء اللى ظهرت وأبدت نيتها في الترشح معندهاش اى رصيد تستند عليه ولا ليها ظهير جماهيري بيدعمها ولا قوى سياسية تقف وراها تقدر تخليها تطون مجرد ند للسيسي... وتانى حاجة الرئيس السيسي بيدخل الانتخبات الجديدة وهو محمل بكم كبير جدا من الإنجازات اللى حصلت في ال 10 سنين اللى تولى فيهم الحكم
حد هيقول إنجازات ايه بس والاسعار بقت النار والعيشة بقت صعبة ؟
هقولك معاك حق فعلا العيشة صعبة والاسعار مش طبيعية بس هل السيسي هو المسئول عن الكلام ده؟ .. اى منصف عارف ان الأزمة اللى مصر بتعيشها أزمة مستوردة من الخارج يعنى أسبابها مالهاش علاقة بالسياسة الاقتصادية لمصر وكمان مش مصر بس اللى بتعانى منها ده فيه دول صناعية كبرى شعوبها بتشتكي من فاتورة المعيشة ومن غلاء أسعار السلع الأساسية وارتفاع غير مسبوق في تكلفة الخدمات وده بيؤكد الكلام اللى كنا لسه بنقولوا من شوية ان الأزمة جاية من بره بسبب تداعيات الحرب الروسية الأوكرانية وما نتج عنها من نقص حاد في سلاسل الامداد وارتفاع كبير جدا في أسعار الطاقة والحبوب 
طيب يا سيدي عرفنا ان السيسي مش هو المسئول عن الأزمة.. بس هو اكيد مسئول عن إيجاد حلول وتخفيف العبء عن الناس ؟ 
كلام صح 100 % والرئيس السيسي عارف ده كويس وبيحاول يخفف العبء من على كاهل الناس ولو لاحظت الرئيس في اخر سنيتن زود مرتبات الموظفين وأصحاب المعاشات 4 مرات بجانب العلاوات والمنح الاستثنائية اللى بيصرفها للناس 
مش بس كده الرئيس في اطار حرصه على الوقوف م الناس في الأزمة دي أدى تعليمات أكتر من مرة بتأجيل الزيادات في أسعار شرائح الكهربا والمياه وكمان رافض يحرر سعر الصرف بشكل كامل ورافض يرفع الدعم عن المواد البترولية وكل دي حاجات لو حصلت حرفيا كانت هتحول حياة المصريين لجحيم 
ومفيش أمل حياة الناس تتحسن وسعر الدولار ينزل ويرجع لمستويات طبيعية غير الجنان اللى بيحصل في السوق السودا؟ 
ده واحد من أهم لاملفات اللى الرئيس السيسي بيشتغل عليها بنفسه في الفترة الأخيرة وباذن الله هيكون أو بشاير الولاية الجديدة للسيسي وضع حلول جذرية لأزمة نقص العملة اللى مخلية سعر الدولار في السوق السودا يسجل مستويات قياسية كبيرة جدا وفيه حاجات بتحصل دلوقتى هيكون ليها تأثير إيجابي جدا على سوق الصرف 
يعنى مش كلام وخلاص والأسعار هتنزل فعلا؟ 
لا مش كلام وخلاص وعشان قلبك يكون مطمن بص يا سيدى الدولة من خلال البنك المركزي شغالة على مشروع كبير وضخم هو مؤشر الجنيه وده مشروع هيحرر العملة المصرية من هيمنة ونفوذ الدولار وهيخلى سعر الجنيه في مصر ما يتحددش بناء على الدولار بس ولكن من خلال سلة تانية من العمللات والمعادن زي اليورو والاسترليني واليوان والروبل والدهب 
مش بس كده الحكومة بنتفذ برنامج طروحات هيتم من خلاله بيع عدد من الأصول غير المستغلة لصناديق استثمار أجنبية وعربية ودي هتدخل مبالغ ضخمة جدا من العملة الأجنبية وهتزود المعروض من الدولار وده هيساهم في تهدئة السوق وكمان في هبوط سعر الدولار في السوق السودا ومعاه هتنزل معظم الأسعار  

طب ونتايج الكلام ده هتبان امتى؟ 
بنسبة كبيرة هنبدأ نشوف نتايج على الأرض مع نهاية الربع الأول من 2024 يعنى على شهر ابريل الجاى ان شاء الله وفيه متغير مهم جدا هيبدأ من اول السنة الجديدة وهو انضمام مصر لتحالف بريكس وتوقيع عدد من اتفاقيات مبادلة العملات مع دول التحالف وده هيخلى مصر تستورد كتير من احتياجاتها وتدفع بالعملات المحلية وده هيخفف الضعط على النقد الأجنبي بصورة كبيرة جدا