أسبوع المفاجآت الكبرى.. 5 أحداث هامة هتقلب الموازين
يا ترى ايه الأحداث اللى هتحصل الاسبوع ده ومتوقع تعمل قلبان فى الأسواق؟ وايه المفاجآت اللى مخبيها الفيدرالي؟ وايه موقف الدولار والدهب الأيام الجاية ؟
فيه حالة من حالات الترقب والانتظار بتسود داخل القطاعات المالية فى العالم انتظارا لأكتر من حدث هيحصلوا الاسبوع ده أهمهم صدور مؤشر نفقات الاستهلاك الشخصي الأساسي في الولايات المتحدة يوم الجمعة الجاية بالاضافة الى متابعة مؤشري الدخل والإنفاق الشخصي ودول من أهم المؤشرات اللى بيتحدد عليهم اتجاه السياسة النقدية في أمريكا ومن بعدها فى كل دول العالم تقريبا.
وبتترقب الأسواق الأسبوع ده بيانات هامة من شأنها التأثير على قرارات الفيدرالي الأمريكي والمركزي الأوروبي بشأن السياسات النقدية.
ومن الأحداث المهمة المرتقبة كمان صدور القراءة النهائية للناتج المحلي الإجمالي خلال الربع التانى من 2023 بالإضافة كمان لكلمة رئيس مجلس الاحتياطي الفيدرالي "جيروم باول" اللى هتحدد ملامح سياسة الفيدرالى الفترة الجاية وازاي هيتعامل مع اسعار الفايدة سواء فى الربع التالت من 2023 أو حتى خلال السنة الجاية.
وفي منطقة اليورو هيتابع المستثمرين صدور مؤشر "إيفو" لثقة الأعمال في ألمانيا ومن بعدها بيانات التضخم الأولية اللى هتصدر يوم الخميس الجاي بالإضافة لكلمة من رئيسة البنك المركزي الأوروبي خلال مؤتمر في باريس.
وفي السعودية هيتابع المستثمرين بشغف سهم لومي لتأجير السيارات في أول أيامه بالسوق السعودية واللى قفز لحد دلوقتي بـ 30% ووصل سعره إلى 85.8 ريال سعودي.
والنهاردة هيكون فيه تصريحات مهمة لرئيسة البنك المركزي الأوروبي، كريستين لاجارد. بجانب تصريحات كمان من عضو المركزي الأوروبي، إيزابيل شنابل.
وبكره التلات هيصدر فى الولايات المتحدة مؤشر ثقة المستهلك الأمريكي عن شهر سبتمبر بالاضافة الى تقرير مبيعات المنازل الجديدة الأمريكية في أغسطس.
أما يوم الأربع فهيعقد اجتماع السياسة غير النقدية للبنك المركزي الأوروبي واللى هيحدد مسارات سعر الفايدة خلال الشهور الجاية وهيكون فيه خطاب لأندريا إنيرا عضو البنك المركزي الأوروبي هتكشف فيه ملامح الفترة الجاية .. وفى نفس اليوم هيصدر تقرير طلبات السلع المعمرة في أمريكا ومخزون النفط الأمريكي الخام ودول تقريرين مهمين جدا
ويوم الخميس هيصدر التقرير الشهري الصادر عن البنك المركزي الاوروبي وتقرير طلبات إعانات البطالة الأمريكية بالاضافة الى الكشف عن الناتج الإجمالي المحلي الأمريكي ومؤشر مبيعات المنازل المعلقة في أمريكا والأهم حديث جيروم باول، رئيس الفيدرالي الأمريكي اللى بيتكلم فيه عن أفكار الفيدرالي وازاى هيتعامل مع التضخم واسعار الفايدة
أما يوم الجمعة فهيتم الاعلان عن الناتج الإجمالي المحلي البريطاني وهتلقي رئيسة البنك المركزي الأوروبي، كريستين لاجارد خطاب مهم وفى نفس اليوم هتصدر بيانات التضخم الأولية لمنطقة اليورو وكمان مؤشر أسعار نفقات الاستهلاك الشخصي الأمريكي، وده مقياس التضخم المفضل لدى الفيدرالي الأمريكي.
وكل اللى هيحصل فى الأحداث دي هيكون ليه تاثير كبير على اسعار الدولار والدهب الفترة الجاية وسط توقعات بمزيد من الهبوط فى المعدن النفيس واتجاه لوقف وتيرة رفع الافيدة فى معظم البنوك المركزية حول العالم.
