مصر تكسب معركة صندوق النقد.. كواليس الساعات الأخيرة
امبارح وزارة المالية أعلنت بشكل رسمي التوصل لاتفاق مع صندوق النقد الدولي لدمج المراجعتين الأولى والتانية لقرض ال 3 مليار دولار وقالت انه هيتم تحديد موعد وصول بعثة الصندوق لمصر قبل نهاية 2023 .. فيا ترى الكلام ده معناه ايه ؟ وهل كده فعلا مفيش تعويم للجنيه الا فى السنة الجديدة؟ وايه كواليس الساعات الاخيرة فى المفاوضات ما بين مصر ومسئولى صندوق النقد؟ وهل قدمت الحكومة تعهدات جديدة للصندوق عن مرونة سعر الصرف وعن تخارج الدولة من الأنشطة الاقتصادية وزياة نسبة القطاع الخاص فى الناتج المحلي؟
امبارح الحكومة المصرية ومن خلال وزارة المالية قالت إنها توصلت لاتفاق مع صندوق النقد الدولي على دمج المراجعتين الأولى والتانية اللى هيعملهم الصندوق لبرنامج الإصلاح الاقتصادي الحكومي وده بعد تأجيل المراجعة الأولى أكتر من مرة وسط تساؤلات حول التقدم اللي أحرزته مصر في الوفاء بشروط الصندوق.
وقالت وزارة المالية في شرح تفصيلي على موقعها الإلكتروني ان الحكومة اتفقت مع مسئولي صندوق النقد الدولي على دمج المراجعتين الأولى والتانية في توقيت واحد من المتوقع تحديده قبل نهاية 2023" واكدت أن المفاوضات مع صندوق النقد الدولي تسير "بشكل مثمر وإيجابي" وفقا لشروط البرنامج المتفق عليه مع الصندوق.
وزي ما احنا عارفين وافق صندوق النقد في ديسمبر اللى فات على قرض قيمته 3 مليار دولار في إطارتسهيل الصندوق الممدد لمصر اللي بتتعرض لضغوط مالية قوية بسبب تداعيات الحرب الروسية الاوكرانية واللى حصل بعد كده فى سلاسل الامداد وفى اسعار السلع الأساسية خصوصا الحبوب والطاقة.
ووفقا للشروط المتفق عليها بين مصر والصندوق بيخضع تقديم الدفعات ضمن البرنامج اللي تبلغ مدته 46 شهر ل 8 مراجعات..وكان من المقرر إجراء المراجعة الأولى في مارس اللى فات لكن ده محصلش وسط تقارير تفيد بعدم رضا الصندوق عن التقدم اللي أحرزته مصر في الوفاء بشروط الاتفاق.
وتعهدت مصر باعتماد سعر صرف مرن عندما توصلت إلى اتفاق القرض مع صندوق النقد الدولي أواخر السنة اللى فاتت وبسبب بعض الاجراءات اللى خدتها الحكومة نجحت فى استقرار سعر الصرف عن 31 جنيه للدولار فى البنوك وشركات الصرافة المعتمدة لكن الصندوق شايف ان ده مش سعر عادل وبيطالب بمزيد من مرونة سعر الصرف
طب بعد الاتفاق على دمج المراجعتين .. هل كده مفيش تعويم للجنيه ؟
أكدلنا لحضراتكم قبل كده كتير ان مفيش تخفيض لقيمة العملة هيحصل حاليا سواء دلوقتى او على المدى القريب والمتوسط وده لأن مصر شايفة ان سعر الجنيه مقيم بأقل من سعره بسبب أزمة نقص العملة الأجنبية وكمان مصر بتراهن على الوقت وعلى جمع سيولة دولارية كبيرة من بيع عدد من اصولها خلال الشهور الجاية والمتوقع جمع ما يقرب من 5 مليار دولار قبل منتصف 2024
طب هل مصر قدمت تنازلات جديدة عشان الصندوق يوافق على دمج المراجعتين ؟
المفاوضات بين مصر والصندوق مستمرة طول الوقت ومصر ما قدمتش اى تنازلات بالعكس الصندوق هو اللى ابدى تفهم واضح لموقف مصر وللظروف الصعبة اللى بيمر بيها الاقتصاد المصري خصوصا وان العالم كله بيعانى من نفس الظروف وفيه دول كبيرة جدا وعندها فجوة تمويلية ومشاكل كبيرة بسبب اللى بيحصل فى سلاسل الامداد العالمية والارتفاع غير المسبوف فى اسعار الحبوب والمواد البترولية
