أسرار اجتماعات الغرف المغلقة مع صندوق النقد.. وسر استقالة الرجل التاني في البنك الإفريقي.. وخطة عودة الجنيه

متابعي بانكير سوف نقدم لكم  ملخص لأهم الأحداث والتحليلات والمعلومات اللي قدمتها وحدة الأبحاث والتقارير في بانكير النهاردة الخميس 21 سبتمبر 2023 لمشاهديه الكرام على كل منصات السوشيال ميديا.

النهاردة منصات بانكير عرضت اكتر من تقرير مصور لأحداث مهمة جدا على الساحة المصرية، كان أولها تقرير عن اقتصاد الحرب في أكتوبر 1973 وبالمناسبة دي بنقول لكل مشاهدينا الكرام كل سنة وحضراتكم طيبين مصر بتحتفل بمرور 50 سنة على أعظم انتصاراتها في العصر الحديث وبتوجه من خلالكم تحية حب وعرفان لكل شهيد ومصاب في حرب تحرير سيناء، وتناول التقرير الصعوبات الاقتصادية الضخمة اللي واجهت مصر للإعداد للمعركة الحاسمة وفي وقت الاقتصاد كان بيعاني بشدة نتيجة حالة الحرب اللي استمرت 6 سنوات بعد حرب 67 واللي كل امكانيات الدولة الاقتصادية لخدمة المجهود الحربي وشاركت فيها كل قطاعات الدولة وسط مساعدة وتفهم من المصريين اللي كانوا مستعدين يجوعوا بس الارض ترجع.

الحقيقة مصر عرفت تسخر اقتصاد الحرب كويس جدا وفي نفس الوقت قدرت تحمي البلد من الانهيار الاقتصادي مع توقف معظم موادر الدولة من قناة السويس والاستثمار والسياحة عشان كده انتصار اكتوبر العظيم مكنش مجرد نصر عسكري أو سياسي ولكن كان انتصار فى مواجهة الظروف المعاكسة وضعف التنمية وتراجع مستوى المعيشة وتعنت وحصار اقتصادى من دول الغرب والولايات المتحدة.. يعنى تقدر تقول وانت مرتاح البال انه كان انتصار للإرادة فى مواجهة الانكسار وللقوة فى مواجهة الضعف وللتحدى فى مواجهة محاولات الخضوع .

ومن بين التقارير المهمة كان ملف حسم مصر لملف المفاوضات مع صندوق النقد الدولي بعد توقف شهور بعد صرف الشريحة الأولى بعد الاتفاق اللي تم بين الحكومة والصندوق في ديسمبر 2022، وسلطنا الضوء على فكرة التعاون مع الصندوق في ظل التخوف الشعبي من التعاون مع الصندوق باعتباره أداة لتخريب اقتصاديات الدول وعلى فكرة مصر هتستفاد إيه من الحصول على ديون تانية، وتأثير الخطوة على السوق الموازية للدولار.

وأكدنا إن مقولة الصندوق بيخرب اقتصاد البلد دا كلام مش صحيح بالمرة لأنه لو كده فعلا وبالعقل مكانش دولة خدت منه قروض وهو نفسه كان فلس وحاله وقف لكن الصندوق زيه زي أي مؤسسة تمويل دولية بتعرض عليه المشاكل اللي عندك وبيعملك برنامج شامل للإصلاح مش فلوس وبس والبرنامج بيشمل خدمات فنية وتسويقية وتمويل ومتابعة وتوصيات لهيئات تانية دولية وأنت من حقك توافق أو ترفض برنامج الصندوق وطالما كحكومة وافقت عليه يبقي انت مقتنع بالبرنامج.
مصر هتستفاد كتير زي ما قلنا قبل كده منها إنه هيحل ازمة العملة الأجنية بفلوس القرض واللي هتفتح المجال تاني للاشتثمارات الأجنبية المباشرة واللي متررددة وكانت مستنية قرار الصندوق ونظرته للاقتصاد المصري ودا لأن تقييم الصندوق مهم جدا لجذب الاستثمارات وكمان للصناديق السيادية الخارجية عشان تيجي تستثمر على واسع عندك بجانب فتح المجال لمؤسسات تمويلية جديدة تيجي تمول وتستثمر عندك، ودا غير نظرة وكالات التصنيف الائتماني الدولية للاقتصاد المصري واللي تقييمها مهم جدا في سوق الاستثمارات بردوا، وبمجرد دخول جزء كبير من الاستثمارات أزمة الدولار هتفك بشكل تلقائي لأن الاتفاق معناه استقرار في أسواق الصرف ودي ضربة قوية للسوق السودا واللي كانت بتعلب على الاشاعات ومنها إن الصندوق رافض يدي قرض لمصر وبالتالي مفيش مؤسسة هترضي تسلف الحكومة ومفيش استثمارات جاية لكن بعد فتح الباب دا معناه خراب مستعجل للسوق الموازية للدولار.
 

وحدة أبحاث وتقارير بانكير قدمت تقرير نوعي عن سطوة الجنيه وازاي العملة المصرية هتكسب معركة العملة الصعبة، وسر ضعف عملة مصر وإزاي الجنيه بريء من الاتهامات اللي الناس فاكرينها.

وقلنا إنه في عهد الرئيس السيسي ودي شهادة للتاريخ مش مبالغة بدأت مصر تشتغل صح في الاقتصاد وتعدل مساره عن طريق تقليل الاستيراد وزيادة التصدير بأرقام كبيرة وتوطين الصناعة واكتشاف الفرص الواعدة في الاقتصاد الوطني وتنميتها ووضعها على خط التنمية وجلب الدولار زي ما حصل كده في قطاع السياحة وقناة السويس والتطوير اللي حصل فيها والقفزة في إيراداتها من 4 مليار دولار إلى حوالي 10 مليار دولار ومتوقع مضاعفة الرقم وارتفاع فاتورة التصدير للوصول ل100 مليار دولار وتنشيط الاستثمار الأجنبي ودا الملف الأهم في معادلة الدولار والجميع وعشان كده الرىيس السيسي تولى بنفسه رئاسة المجلس الأعلى للاستثمار وقراره بالتخلص من كل البيموقراطية وتضارب القوانين اللي كانت بتطفش المستثمر ودا بجانب التوسع الزراعي والصناعي والتجاري وبناء المواني واللوجستيات واكتشاف الثروات في باطن الأرض زي الغاز والبترول والمعادن ودا كله مكانش هيتم لولا التطوير الشامل في البنية التحتية واللي كانت منهكة وضعيفة.
جانب تاني في خطط الحكومة لإعادة هيبة الجنيه وهي انضمامها لتكتلات قوية زي البريكس والكوميسا وغيرها من الاسوأق الدولية
 

كمان استعرضت منصات بانكير تقرير مصور عن قطاع اقتصادي حديث بدأ يسيطر على تجارة العالم بحجم بيزنس 5  تريليون دولار واللي بيعنبر ثورة التجارة الجديدة حول العالم وهتنهي فكرة محلات البقالة والمنتجات وفكرة انك تنزل تتسوق وتتفرج وتروح الفروع بتاعة المحلات وتلف بالساعات أيا كانت السلعة من الابرة للصاروخ هتيجلك مكان ما انت قاعد في غضون دقايق من دخولك على الابكيشن وطلب السلعة اللي انت عاوزها.

وقلنا إنه في السنين الأخيرة ظهر نوع جديد من متاجر البقالة في أوروبا وأمريكا، بعد اتجاه السلاسل التجارية الكبيرة في العالم لانشاء متاجر اليكترونية، لتوصيل كل أنواع المنتجات الغذائية إلى المستهلك وعرفت باسم المتاجر المظلمة وهو ببساطة عبارة عن متجر بقالة بدون عملاء وبدون رفوف عرض ولا بيع مباشر للجمهور،  لكن مكرس لتلبية عمليات التسليم عبر الإنترنت من البقالة والإمدادات الأخرى.

فكرة المتاجر المظلمة الحقيقة أول ما ظهرت كانت في بريطانيا سنة 2000 تقريبا لما توسعت عمليات الشراء عبر الإنترنت لبعض أشهر أسماء السوبرماركت هناك، و احتاجت لنقاط توزيع وتسليم الطلبات حتى لا يتأخر الطلب على العميل، وقامت المتاجر بتأجير محلات متفرقة وصغيرة ومخازن مركزية وفي شوارع فرعية لدعم عملياتها.

مصرمن ناحيتها مكنتش بعيد عن التطوير في التسويق الشبكي والالكتروني وعرفت الطريق سريعاً للتسوق الالكتروني والمتاجر المظلمة واتفتح اكتر من 10 سلاسل لمتاجر مظلمة وجاءت التجارة الإلكترونية في مصر في المرتبة الثانية من حيث حجم وقيمة هذه التجارة على مستوى دول شمال أفريقيا والشرق الأوسط، وأشارت العديد من التقارير إلى أن حجم التجارة الإلكترونية في مصر قد بلغ في عام 2021 حوالي 5 مليار دولار.

أخر تقرير مصور لينا كان انفراد لبانكير بخصوص  إستقالة الرجل التاني في البنك العربي الافريقي الدولي ، وحسب مصادر خاصة كشفت إن هيثم المعايرجي مساعد العضو المنتدب والرئيس التنفيذي للمجموعة للعمليات والتحول الرقمي بالبنك العربي الأفريقي الدولي تقدم باستقاله من منصبه.

وقالت المصادر إن المعايرجي رحل إلى البنك الأفريقي للاستيراد والتصدير- أفركسيم بنك في منصب نائب المدير التنفيذي للمعاملات التجارية الدولية.

المعايرجي كان يشغل ثالث أهم منصب تنفيذي بالبنك بعد الرئيس التنفيذي والعضو المنتدب ونائبه،  وكان مسئول عن عدة ملفات بالبنك العربي الأفريقي الدولي، منها الشمول المالي، التطوير الرقمي، المشاريع و التحول الرقمي، التجزئه المصرفية، الأمن والسلامة العلاقات الحكومية، الشئون الإدارية، العمليات البنكية والمعاملات البنكيه الدولية.