إيه اللي هيحصل في مصر بعد انتخابات الرئاسة؟.. أيام صعبة للجنيه

 
يا ترى ايه اللي هيحصل في مصر بعد انتخابات الرئاسة الجاية؟ وليه كل التقارير ومعظم الخبراء بيقول ان الجنيه هيعيش أيام صعبة بعدها؟ وهل فعلا مفيش تعويم الا بعد اختيار الرئيس؟ وايه موقف الدولار في السوق السودا؟ وهل ممكن مصر توصل لاتفاقيات مع دول الخليج تنعش السوق وتزود المعروض من العملة الأمريكية؟ ومتوقع سعر الدولار يوصل لكام في البنوك ؟ 
 
مفيش تقرير بيصدر عن أي مؤسسة تمويل دولية أو مركز أبحاث الا وبيأكد ان فيه تخفيض قادم في قيمة الجنيه قدام العملات الأجنبية صحيح فيه اختلاف على نسبة التخفيض لكن فيه شبه اجماع على ان التعويم جاي جاي وان مصر مضطرة تعمل كده عشان تخفف الضغط على الاحتياطي النقدي وكمان تقدر تجذب استثمارات أجنبية جديدة.. وكل لتقارير دي بتؤكد ان التخفيض المرتقب في سعر الجنيه هيحصل بعد الانتخابات الرئاسية اللي هيتعلن جدولها الزمنى يوم الاتنين الجاى وفقا لما أعلنه المدير التنفيذي للهيئة الوطنية للانتخابات
طب ليه المؤسسات بتقول ان التعويم مش هيتم غير بعد الانتخابات الرئاسية؟ 
بص يا سيدى موقف مصر الرسمي لحد دلوقتى رافض اى تخفيض جديد في قيمة العملة المصرية ورئيس الوزراء أكد اكتر من مرة ان الجنيه مقيم بأقل من سعره بكتير بسبب أزمة نقص الدولار وان أول ما الحكومة تنجح في توفير سيولة دولارية الجنيه هيسترد عافيته وهيرجع لمكانته الطبيعية .. والرئيس السيسي بنفسه أتكلم في الموضوع ده وقال ان مصر بتطبق سعر صرف مرن للجنيه لكن لو ده هييجى على حساب حياة الناس فمصر مش هتعمل كده حتى لو ده بيتعارض مع شروط صندوق النقد الدولي.. وده عامل خلاف كبير مع الصندوق اللى لسه لحد دلوقتى معملش المراجعة الولى لقرض ال 3 مليار دولار اللى كان اتفق عليه مع الحكومة المصرية في ديسمبر اللى فات وكان من شروطه اجراء مراجعتين على الأقل في السنة والمراجعة الأولى كان معادها مارس اللى فات ولكن تم تأجيلها لسبتمبر ولحد دلوقتي سبتمبر بيخلص ومفيش أي جديد.. وان كان فيه كلام ان المراجعتين الأولى والتانية هيحصلوا قبل نهاية 2023 
وعشان كل ده معظم المؤسسات رابطة أي تخفيض في قيمة الجنيه لما بعد الانتخابات الرئاسية وشايفين ان مصر بتراهن على الوقت وبتحاول تجمع أكبر سيولة دولارية تستخدمها في حالة التعويم عشان تمنع اى انخفاض كبير في قيمة العملة المصرية قدام العملات الأجنبية التانية. 
طب هل الكلام ده معناه ان مفيش تعويم للجنيه على الأقل خلال ال 3 شهور الباقيين في 2023 ؟ 
بنسبة كبيرة مفيش تخفيض هيحصل في قيمة الجنيه الفترة دى لأن زي ما قولنا مصر شايفة ان مفيش فايدة من تخفيض قيمة عملتها خصوصا وان ده حصل بدل المرة 3 مرات قبل كده ومفيش حاجة حصلت لا الفجوة التمويلية اتسدت ولا سعر الدولار قدام الجنيه انخفض ولا التضخم تراجع وبالتالي في الوقت الحالي مفيس اى فايدة ممكن ترجع على مصر من تخفيض قيمة عملتها
طب متوقع سعر الدولار يوصل لكام بعد انتخابات الرئاسة؟ 
التوقعات بتدور حول نسبة من 15 الى 20 % يعنى المفروض أكبر سعر يوصل ليه الدولار في البنوك وشركات الصرافة المعتمد 37 جنيه ده لو حسبنا على اعلى نسبة انخفاض متوقعة وده لو حصل هيعمل قلق كبير في السواق وأسعار السلع هتزيد بنفس النسبة واكتر وده اللى مخلى الرئيس السيسي متمسك بموقفه ورافض اى خفض في قيمة العملة حتى لو كان ده هيخسرنا التعامل مع صندوق النقد الدولى 
وعاوزين نفكر حضراتكم ان لجنة السياسة النقدية في البنك المركـزي المصري قررت في اجتماعها الأخير  تثبيت سعري عائد الإيداع والإقراض لليلة واحدة، وسعر العملية الرئيسية للبنك المركزي عند مستوى 19.25 %، 20.25 %، و19.75 % على الترتيب. كما تم الإبقاء على سعر الائتمان والخصم عند مستوي 19.75 %.
وفي ديسمبر اللى فات، وافق صندوق النقد الدولي على برنامج مدته 46 شهر لمصر بقيمة 3 مليارات دولار، على أن يخضع البرنامج لمراجعتين سنويا لغاية منتصف سبتمبر 2026، بإجمالي 8 مراجعات.. والمراجعة الأولى؛ واللي هيُصرف على أساسها الشريحة التانية من القرض، كان يُفترض تتم منتصف مارس لكن ده محصلش لحد دلوقتي.. والصندوق شايف ان الحكومة متأخرة في تنفيذ برنامج الطروحات بالإضافة الى عدم اتسام سعر صرف الجنيه بالمرونة اللازمة