500 مليون دولار في شهرين.. ليه الحكومة بتستلف وعندها كنز ثمين
إزاي مصر قدرت تحول الصحرا لمناجم دولارات، وإزاي تقدر تستغنى عن القروض والسلف من ثروات ملهاش أخر والارقام بتقول إيه عن بيزنس الأرض اللي البنية الأساسية خلت أسعارها تضرب في السما والمستثمرين يتسابقوا عليها.
الاقتصاد هو فن صناعة الفرص ودا سبب تقدم دولة عن دولة تانية ظروفهم متشابهة، والحكومة قدرت تناور في ملفات كتير بقطاعات الاقتصاد وتفكر خارج الصندوق ودا رفع القيمة المضافة ليها وفتح فرص انطلاق تانية ودي الفرق بين قيادة وقيادة ومسئول ومسئول زي مثلا ما حصل في قناة السويس واللي قعدت سنين طويلة عبارة عن ممر مائي للسفن لكن في عهد الرئييس السيسي خلاها محور اقتصادي عالمي وضاف ليها قناة جديدة وعمل حوليها مواني ومناطق لو جستية والنتيجة الايراداات تضاعفت ولسه بتزيد غير المشروعات اللي حوليها ووصل إجمالي التعاقدات اللي وقعتها اقتصادية قنا السويس في العام المالي اللي فات،3.57 مليار دولار من خلال 60 مشروع، منها 53 مشروعا بالمناطق الاقتصادية، بـ 2.23 مليار دولار، و7 مشروعات بالموانئ البحرية التابعة لها بقيمة 1.34 مليار دولار ونفس الفكر اطبق في مشروعات تانية كتير.
ومن بين أفكار حكومات الرئيس السيسي لاكتشاف فرص جديدة وواعدة كانت شق الطرق وتوصيل المرافق بمناطق طول عمرها صحراء وبعيدة عن التنمية وإقامة مشروعات ضحمة بيها بهدف إحياء أسعار الارض حوليها زي ما حصل بالظبط في مشروع العاصمة الادارية الجديدة واللي كانت صحرا محدش يسمع عنها حاجة لكن دلوقتي المتر فيها بمبالغ ضخمة، وقيمة الارض بس قفزت من صفر لمليارات الدولارات والمشروع صرف على نفسه وحقق أرباح ضخمة والدولة استفادت دولارات ومجتمعات جديدة هتزيد تلقائيا.
الجديد بقى إن مصر في الفترة الاخيرة تلقت طلبات لتخصيص أراضٍ لمشاريع عقارية بقيمة نص مليار دولار خلال شهري أغسطس وسبتمبر 2023، ودا اللي كشفه وليد عباس، نائب رئيس هيئة المجتمعات العمرانية المصرية على هامش مؤتمر "سيتي سكيب" بالقاهرة وكمان تضاعف الإقبال على طلبات الأراضي خلال الشهرين الماضيين ليصل إلى 629 طلبا، بإجمالي مساحة 1089 فدانا.
هيئة المجتمعات العمرانية، التابعة لوزارة الإسكان المصرية، فكرت بردو خارج الصندوق وقررت السماح للشركات التي بتضم شريك أجنبي بالتقدم لشراء أراضٍ بالدولار، بحيث لا تقل نسبة الشريك أو الشركاء الأجانب عن 60% من رأسمال الشركة، كمان عرضت على الشركات شراء أراضٍ في المدن الجديدة بنظام التخصيص المباشر، مقابل الدفع بالدولار.
ونرجع للأرقام الرسمية هنكتشف إن الحكومة خصصت أراضي بحوالي 2.5 مليار دولار خلال أول 7 أشهر من هذا العام من خلال 3584 طلبا، وإن هيئة المجتمعات بتخطط لاستثمار 200 مليار جنيه من 2023 وحتى 2027، وهتطلق منصة إلكترونية جديدة لتسجيل المطورين العقاريين والشركات خلال أكتوبر المقبل.
نفس الفكر اللي بيصنع الفرص طبقته الحكومة في أماكن كتير وكفاية تعمل طريق جديد في قلب الصحراء عشان تبدأ تنمية واستثمار من غير ماتدفع فيه دولار، أو تشق ترعة وتخلق مجتمعات من العدم تصرف على نفسها من تمن الأراضي.
