قطاع جديد واعد يضيف 22 مليار دولار لمصر.. السر في العالم السحري
العالم كله دلوقتي رايح للاقتصاد الرقمي وتكنولوجيا الذكاء الاصطناعي والمتيافيرس والعالم الافتراضي بتوقعات مسشتقبلية بتريليونات الدولارات من الاستثمارات في السنين اللي جاية.. ياترى إيه اللي بيحصل في العالم ونصيب مصر كام في ثورة الاتصالات والميتافيرس والتكنولوجيا الرقمية، وإزاي تقدر مصر تربح مليارات الدولارات في السنة بحكم امكانياتها البشرية وموقعها الفريد.
نظرة واحدة على القيمة السوقية لقطاع الميتافيرس أو تكنولوجيا العالم الافتراضي واللي مبقتش حلم وخيال وبقت واقع واستثمارات حول العالم هتوصل 900 مليار دولار بحلول عام 2030، وهتستمر في التضاعف لأنها تكنولوجيا المستقبل.
وبلغة الأرقام والتوقعات ومراكز الأبحاث الصناعة الجديدة ممكن تضيف أكتر من 80 مليار دولار للناتج المحلي الإجمالي لمنطقة الشرق الأوسط وشمال إفريقيا سنويا بحلول سنة 2035، وبقراءة في توقعات استثمارات تكنولوجيا المعلومات والاتصالات ذات الصلة بالميتافيرس عالميا، تقنيات الميتافيرس هتساهم على أساس سنوي بحلول سنة 2035 ما بين 20.2 و38.1 مليار دولار لاقتصاد السعودية، وما بين 11.6 و22 مليار دولار للاقتصاد المصري، ودا اللي يهمنا لأن الرقم ضخم جدا لكن مصر ممكن تحققه بسهولة جدا في نفس الوقت عشان زي ماقلنا الامكانيات والكوادر البشرية وحجم السوق والتطور التكنولوجي والرقمنة اللي حصل في مصر على مدار السنين اللي فاتت.
وبلغة الأرقام ممكن صناعة الميتافيرس والتحول الرقمي الاقتصادي تضيف ما بين 8.8 و16.6 مليار دولار لاقتصاد الإمارات، وحوالي 2.6 إلى 5 مليارات دولار لاقتصاد المغرب، وما بين 0.9 و1.7 مليار دولار لاقتصاد الأردن، ودا بفعل إن منطقة الشرق الأوسط وشمال إفريقيا بتتميز بالتنوع والتغير السريع، بالاضافة إلى إنها بلاد غنية بالمواد الهيدروكربونية إلى هتضمن تحقيق نمو مستدام من خلال التنويع، وإطلاق خطط تحول طموحة مثل "رؤية 2030" في مصر والسعودية ورؤية الإمارات 2031.
وعشان مصر اللي تهمنا في قصة الاقتصاد الرقمي فنقدر نقول إن مصر عندها مدن زكية ولسه هتعمل مدن زكية تانية ومناطق صناعية قايمة على فكرة الذكاء الاصطناعي والميتافيرس وزيادة الاستثمارات في التكنولوجية الجديدة ومصر حققت 4.9 مليار دولار صادرات رقمية ووقعت اتفاقيات مع 29 شركة عالمية.
وده بيرشح مصر إنها تكون رائدة في قطاع تكنولوجيا العالم الافتراضي واللي هتسيطر على معظم الصناعات والاستثمارات العالمية في المستقبل القريب وهنا لازم نشيد بقرار الرئيس السيسي ومبادرة توطين الرقمنة والميكنة في كل قطاعات الدولة.
ويعتبر قطاع تكنولوجيا المعلومات والاتصالات هو الأسرع نموا في مصر، وحقق معدل نمو 3ر16 في المائة، متجاوزا جميع قطاعات الدولة خلال العام المالي 2021/2022.
