ينتصر دائما لهم.. أصحاب المعاشات في عقل الرئيس والأرقام خير دليل

دائما ما ينتصر لهم الرئيس.. ودائما هم في عقله..يدعمهم باستمرار .. ويقدم لهم حقوقهم على أكمل وجه،ماذا فعل الرئيس السيسي لدعم أصحاب المعاشات منذ توليه حكم مصر

بداية من ٢٠١٤ وحتى الآن الرئيس السيسي دايما بيدعم ويساند أصحاب المعاشات.. على كل المستويات وفي جميع النواحي الإنسانية.

علاوات دورية.. والعمل على زيادتها.. ورفع مرتبات وغيرها من القرارات اللي اتخذها الرئيس السيسي لدعم أصحاب المعاشات

أوعى تفتكر أن قرارات النهاردة واللي شملت زيادة الحد الأدنى للأجور زي ما قولنا ل ٤ آلاف جنيه بدل من ٣٥٠٠ جنيه.

وقرار مضاعفة المنحة الاستثنائية، لأصحاب المعاشات والمستفيدين منها، لتصبح "600" جنيه، بدلا من "300" جنيه، بإجمالى "11" مليون مواطن.. مش هو أول قرار اتخذه الرئيس السيسي في الإطار دا.

دا سبقه اكتر من قرار في صالح أصحاب المعاشات تحديدا واللي هانتكلم عنها  دلوقتي .

وخلينا نقول إن في 2015 بلغت قيمة المعاشات 116.8 مليار جنيه، وبعدين بقت 132 مليار و800 مليون جنيه في 2016، وفي 2017 تجاوزت 153.5 مليار جنيه، ووصلت إلى 175 مليار و600 مليون في 2018، وخلال العام المالي  2019-2020 قفزت إلى نحو 204 مليارات جنيه.

من ابرز القرارات اللي اتخذها الرئيس السيسي لدعم أصحاب المعاشات كان في ٢٠١٩.. ودا لما تدخل لسحب  استشكال الحكومة على العلاوات الخاصة لأصحاب المعاشات.

وتفاصيل القرار دا كانت كالتالي.. وهو إن الحكومة كانت قدمت استشكال أمام محكمة الأمور المستعجلة لوقف تنفيذ حكم المحكمة الإدارية العليا في ٢٠١٩ بأحقية أصحاب المعاشات في صرف خمس علاوات.

ودا كان مفاده أن أصحاب المعاشات ماكنش من حقهم يصرفوا العلاوات دي لو كانت المحكمة أقرت بعدم الصرف.

لكن وقتها الرئيس السيسي تدخل ووجه الحكومة بسحب الاستشكال علشان أصحاب المعاشات ياخدوا بعد كدا العلاوات الخمسة.

والقرار دا عكس أن الرئيس السيسي عنده مصالح الوطن والمواطنين فوق كل اعتبار .. وأن محدودى الدخل فى أولوياته .

وبعد كدا أقر مجلس النواب قانون مقدم من الحكومة، لزيادة معاش الأجر المتغير من أجل ضم العلاوات دي..  والخزانة العامة للدولة وقتها تحملت تكلفة بلغت 35 مليار جنيه.

ولو خدنا الإحصائية بالترتيب.. فبداية من أول يناير 2014،  زادت نسب المعاشات بنحو 10% بتكلفة 8.5 مليار جنيه بحد أدنى 50 جنيها.

وبعدين في أول يوليو من نفس العام الريس وجه بإقرار علاوة بنسبة 10% بتكلفة 8 مليارات بدون حد أدنى أو أقصى، على أن المعاش مايقلش عن 450 جنيها.

وفي أول يوليو 2015 تم إقرار علاوة بنسبة 10% بتكلفة 10.7 مليار.

وفي أول يوليو 2016 تم إقرار زيادة بنسبة 10% بتكلفة 13.7 مليار جنيه، وبحد أدنى 125 جنيها وحد أقصى 323 جنيها، وحد أدنى للمعاشات 500 جنيه.

وفي أول يوليو 2017، وصلت الزيادة إلى 15% بتكلفة 21.4 مليار جنيه، وحد أدنى 150جنيها وحد أقصى 551 جنيها.

وكمان في أول يوليو 2018 كانت الزيادة بنسبة 15% بتكلفة 24.2 مليار جنيه، بحد أدنى 150 جنيها وحد أقصى 625.5 جنيه، مع رفع الحد الأدنى للمعاشات إلى 750 جنيهًا.

وفي يوليو 2019 تم إقرار زيادة 15% بتكلفة 28.1 مليار جنيه، وحد أدنى 150 جنيهًا، وأقصى 832.5 جنيه، وزيادة الحد الأدنى للمعاشات إلى 900 جنيه.

ولازم ماتنساش أن الريس وجه بإقرار الزيادة السنوية لأصحاب المعاشات بنسبة 14% اعتبارا من يوليو 2020، ودا علشان يتم إضافة قيمة الزيادة الخاصة بضم العلاوات الخمس على المعاش أولاً، وبعدين تتحسب قيمة العلاوة الدورية بنسبة 14%، بدون حد أدنى وبحد أقصى ٩٨٠ جنيها وبإجمالي تكلفة ٢٥ مليار جنيه.

ولازم ماتنساش إن عدد أصحاب المعاشات والمستحقين خلال عام 2020 كان  10 مليون مستفيد.. والنهاردة وفقا للقرار الرئاسي وصل ل ١١ مليون مستفيد.