السيسي سايب البلد بتخرب وبيزور القرى والنجوع.. الرئيس بيعمل كده ليه؟

الرئيس سايب البلد بتخرب والاقتصاد بينهار وكل شوية بيروح يزور قرية أو نجع!!! السيسي بيدور عاوز ياخد لقطة ويبان منحاز للغلابة بس هو بيلمع نفسه عشان انتخابات الرئاسة الجاي!! يا عم ده جارر الحكومة وراه في الصعيد واخر البلاد وسايب الدنيا تضرب تقلب ولا على باله!! أصلا المشروعات اللى بيفتتحها دي كلها مشروعات فنكوش ومالهاش لازمة!! .. يا عم بدل ما هو مهتم اوى بزيارة الأقاليم يركز في الاقتصاد اللى بينهار والدولار اللي كل يوم سعره بيزيد!!.

لو حضرتك بتشوف قنوات الاخوان او بتتكعبل في فيديوهات اللجان الاليكترونية بتاعتهم على منصات التواصل الاجتماعي فاكيد شوفت تعليقات من نوعية الكلام اللى قولناه في بداية الفيديو ده .. ومحاولات تقليل من الزيارات اللى بيقوم بيها فخامة الرئيس عبدالفتاح السيسي لأهالينا في كل ربوع مصر.. واكيد حسيت بمحاولات التشويه البائسة اللى بيعملوها لزيارات الرئيس للقرى في مختلف محافظات مصر.. بس يا ترى هل كلامهم ده صحيح ؟ وهل زيارات الرئيس للقرى والنجوع مش مهمة ؟
بص يا سيدي الرئيس السيسي من اول يوم ليه في الحكم كان حريص انه يكون على تواصل دائم مع الناس اللي محدش كان بيهتم بيها ولا يوصلها قبل كده وعشان كده سن سنة حسنة وهي انه بيزور من فترة للتانية قرى مصر وبيفتتح مشروعات مهمة ضمن برنامج حياة كريمة وبيقابل الناس وش لوش وبيستمع لمشاكلهم وأحلامهم وبيحاول يحط حلول جذرية للأزمات اللى بيعانوا منها .. ولا بيعتمد في ده على تقارير معلبة ولا كله تمام يا افندم 
وطول ال 10 سنين اللى فاتت الرئيس زار عشرات القرى وافتتح مئات المشروعات اللى حرفيا غيرت حياة الناس في الريف .. مشروعات مهمة منها توصيل مياه لقرى محرومة وصرف صحي والغاز الطبيعي وصل لأهلنا في القرى والنجوع وشكل المدارس والمستشفيات اتغير تماما وبقا فيه خدمات في بعض القرى زيها زي الموجودة في المدن ويمكن أحسن 
وأطلق الرئيس السيسي، مبادرة حياة كريمة لتحسين مستوى الحياة للفئات المجتمعية الأكثر احتياجا على مستوى مصر عشان تساهم في الارتقاء بمستوى الخدمات اليومية المقدمة للمواطنين وخصوصا في القرى .. والرئيس بيشرف بنفسه على المبادرة دي وبيتابع تفاصيل التطوير اللى بيحصل في القرى والنجوع ولما بتخلص المشروعات بيروح يفتتحها بنفسه مش بيطلق تصريحات وردية وخلاص لا بينفذ على الأرض ويرد على الحملات الممنهجة بانجازات هي اللى بتتكلم عن نفسها. 
وبيركز السيسي بشكل خاص على قرى الصعيد اللى كانت منسية طوال عقود طويلة وبتشمل المبادرة الرئاسية علاج للمرضى وتحسين جودة تعليم الصغار وشراء أجهزة تعويضية لذوي الإعاقة، وإنارة الأعمدة، ورصف الطرق، وإعادة بناء المنازل، وإنشاء المستشفيات

يعنى السيسي مش بيدور على لقطة عشان الانتخابات زي ما بيقول الاخوان؟ 
السيسي مش محتاج ياخد لقطات.. واحد حط روحه على ايديه ووقف في وش الاخوان وغامر بحياته عشان ينقذ مصر مش هيدور على لقطات واخر حاجة ممكن يفكر فيها هي الانتخابات الى فوزه بيها شبه مضمون لأن أولا الإنجازات اللى حققها محدش يقدر يعمل زيها في الوقت الصغير ده وثانيا لأن لحد دلوقتي مفيش منافس يقدر يقف قدامه 
طب والدولار اللى كل شوية يزيد والاقتصاد اللى حاله ما يسرش حد ؟ 
فعلا الاقتصاد المصري مش في افضل حالاته ومصر بتاعنى اقتصاديا وأزمة الدولار خانقة لكن مين قال الن الرئيس مش شغال على المفات دي.. هو مين اللى فكر في خطة الانضمام لبريكس ومين اللى عمل جهود مكثفة لاقناع دول التجمع بضم مصر ومين اللى شغال على ملف مهم وهو توطين الصناعة لتقليل فاتورة الاستيراد والاعتماد على المنتج المحلي ومين اللى شغال على حلم ال 100 مليار دولار صادرات واللى لما يتحقق هيعمل توازن كبير بين صادرات مصر وواردتها وهيغطي العجز في الميزان التجاري ومين اللى واقف بقوة في وجه صندوق النقد ورافض يعمل اى تخفيض في سعر الجنيه من جديد

من الآخر الزيارات اللى بيعملها الرئيس للقرى فيها خير كتير لأهلنا وممكن الرئيس يتهاجم بأى حاجة تانية لكن الملف ده تحديدا الرئيس عامل فيه شغل هايل ومحترم وبيغير حياة الناس للأفضل.. فعشان كده اوعا تصدق كلام الاخوان ولجانهم وانزل اى قرية بنفسك وانت تعرف الفرق بين دلوقتى وبين الأوضاع من 10 سنين