قبل ما تقول.. صلاح رفض فلوس السعودية... أعرف الأول ثروته قد اية
عنده شركات استثمار عقاري في إنجلترا وأوروبا ومرتبه الأعلى في تاريخ النادي
وكمان مرتبط بعقود رعاية مع أبرز شركات الدعاية في العالم
رفض 225 مليون جنيه إسترليني من السعودية علشان يحقق حلمه،إنه المصري محمد صلاااااااح
فصول محمد صلاح مع الكورة والشهرة والفلوس.. مابتنتهيش.
من قرية على أطراف محافظة الغربية لـ واحد من أفضل لاعبي العالم.. ودا بيعكس أنه إنسان مجتهد ومكافح وعنده حلم عايز يحققه
إصرار محمد صلاح وموهبته.. خلته في وقت قياسي ملء السمع والبصر.. وبقت كل الأندية تتخانق عليه
بس الغريب أن صلاح بيرفض فلوس اكتر من اللي بياخدها في ناديه اللي بيلعبله
أغلب العروض اللي بتتقدمله كانت زيادة 3 أو 4 مليون جنيه استرليني مثلًا
لكن تخيل بقى إن صلاح اتعرض على ناديه من اتحاد جدة السعودي مبلغ قدره 225 مليون جنيه إسترليني .. يعني حوالي 280 مليون دولار أميركي.
عارف المبلغ دا بالجنيه المصري قد اية.. احنا بنتكلم في 8 مليار و663 مليون و200 ألف جنيه.
دا كدا لوحده.. وتقدر تضيف عليهم نصيب صلاح من الصفقة.. واللي كانت هاتتجاوز ال 2.5 مليار جنيه
بس يا ترى .. هل صلاح ساب الفلوس دي كلها على الفاضي
أكييييد الإجابة هي لأ
يعني عندك مثلا صحيفة “ليفربول وورلد” ودي من أقرب الصحف لنادي صلاح "ليفربول"، واللي كشفت عن رصيد محمد صلاح نجم منتخب مصر ونادي ليفربول الإنجليزي في واحد من البنوك البريطانية.
والصحيفة قالت إن رصيد محمد صلاح في أحد البنوك يقدر بنحو 20 مليون و182 ألف جنيه إسترليني، على فكرة دا حساب واحد.. لكن أبو صلاح ربنا يزيده عنده حسابات تانية كتير.
وصلاح تقدر تقول كدا إنه بيتقاضى من نادي ليفربول الإنجليزي مبلغ 350 ألف جنيه إسترليني، ودا الراتب الأكبر في تاريخ النادي.
بس مش دا الرصيد اللي قصدنا نركز عليه
الرقم الأهم.. هو اللي كشفت عنه صحيفة “ميرور” البريطانية.. واللي نشرت تقرير من سنتين، وقالت إنها تقدر بنحو 75 مليون جنيه إسترليني، وهو آخر تقدير لثروة اللاعب المصري.
يعني تقدر تقول كدا إن ثروة محمد صلاح.. بتبلغ 2 مليار و 925 مليون جنيه.. بس الإحصائية دي من سنتين.
وصلاح عقليته ذكيه جدًا في مسألة التصرف في أمواله.. ودا لأنه بيستثمر فلوسه دايمًا في كبريات الشركات العالمية المتخصصة في الاستثمار العقاري.
وكمان مرتبط بعقود رعاية، مع شركات “أديداس” و”بيبسي” و”فودافون” و”أوبر” و”أوبو” وغيرها.
بس الملايين دي.. صلاح مابيخدهاش من فراغ .. دا نتاج مجهود وموهبة فذة..
أوعى حد ينسى إن صلاح هو أحد أفضل نجوم الدوري الإنجليزي الممتاز ودا أفضل دوري في العالم.
أوعى حد ينسى إن صلاح سجل 187 هدف مع ليفربول ودا من وقت انضمامه للفريق في 2017.
ربنا يبارك لـ صلاح ويوفقه
