هي أمريكا قلقانة فعلًا من تكتل بريكس الاقتصادي ولا لأ؟

هل تكتل الصين والهند وروسيا ومصر والإمارات والسعودية وإيران وجنوب أفريقيا وغيرهم من الدول يقلق أمريكا؟؟

اية اللي يقدر يعمله تكتل بريكس على الدولار الأمريكي؟؟

السؤال اللي مفروض نقوله بصراحة ووضوح.. هو لية في تكتل اقتصادي جديد اسمه بريكس؟؟

الإجابة عن السؤال دا.. هاتلاقيها في أغلب إجابات الدول أعضاء التكتل.. وهو أن الدول العظمى في بريكس زي الصين وروسيا والهند مش راضيين عن النظام العالمى اللي بتسيطر عليه أمريكا..  وكمان عايزين يحسنوا من مكانتهم العالمية.. وخلينا نقول إن المجموعة دي بقت بتشكل تحدي لواشنطن.

والكلام دا أكدت عليه أهم جريدة أمريكية.. وهي «النيويورك تايمز» واللي قالت بوضوح إن توسع بريكس وضمها لعدد من الدول الكبرى في آسيا وأفريقيا بيشكل تحدي كبير لأمريكا خصوصا أن قبضتها على الهيمنة العالمية بتضعف.

الصحيفة الأمريكية ترصد ثلاثة مجالات رئيسية لتحدى بريكس للولايات المتحدة وهى المعايير العالمية والمنافسات الجيوسياسية والتعاون الإقليمى.

وهنا بقى يجي دورنا في التحليل.. ونسأل نفسنا.. لية أمريكا الهيمنة العالمية عندها هاتضعف.

هانقولك.. أن أمريكا  دايما بتستغل الانقسامات بين الدول.. علشان تحقق أهدافها الخاصة خصوصا فى منطقة الشرق الأوسط، وهى بتميل لكدا علشان تفرض سيطرتها ودا اللي حصل مثلًا في العراق وأفغانستان وأهي فارضة سيطرتها في منطقة الشرق الأوسط.

طيب لما يطلع لـ أمريكا دلوقتي تكتل اقتصادي قوي بين دوله وبين أمريكا عداوة.. أو خلينا نقول مشاكل كبيرة.. وقتها أمريكا تقلق ولا لأ.

كمان لازم تاخد بالك.. أن اااه في دول في بريكس على علاقة كويسة مع أمريكا وبينهم تبادل تجاري زي الصين والهند وحتى روسيا.. لكن برضوا الدول دي بتفضل أنها تعيش في عالم ماتكونش فيه أمريكا هي القوة المهيمنة.

الجزء اللي يستحق الإشارة له.. هو انضمام إيران لـ بريكس.. لأن دا بيقويها.. وطبعا كلنا عارفين أن أمريكا فارضة على إيران عقوبات اقتصادية من زمان ودا أثر عليها بشكل نسبي.

لكن لم انضمت إيران لـ بريكس بقى عندها أصدقاء أقوياء فى المجموعة.. وبالتالي تقدر تتتجاهل عقوبات أمريكا عليها.

ضروري تعرف بقى أنه بعد توسع بريكس فى يناير 2024.. ودا  بضم مصر والإمارات والسعودية وإيران والأرجنتين وإثيوبيا.. فحصة التكتل فى الناتج المحلى الإجمالى العالمى هتزيد من ٣٢٪ إلى ٤٥٪ .. ودا نسبة بتتجاوز حصة مجموعة السبع الكبرى اللي بتمثل ٣٠٪ من الناتج العالمى.

كمان مسألة انضمام السعودية والإمارات وإيران ودول دول بترولية بامتياز.. دا هايمثل مصدر قلق لأمريكا.. بعد انضمامهم لـ بريكس .. لأن دا معناه إنهاء سيطرة أمريكا على أسعار النفط.

يعني الملخص هو أن بالرغم من ضخامة وقوة الاقتصاد الأمريكي.. إلا أن تكتل بريكس هايأثر على هيمنة أمريكا وتمددها الواسع.