فيه حاجة غلط.. هي الحكومة جابت مليارات الاحتياطي والديون منين؟
إزاي عندنا أزمة دولار وفي نفس الوقت الاحتياطي بتاعنا بيزيد وفي نفس الوقت إزاي مصر سددت مبالغ ضخمة دوين خارجية في وقت بنجري على قرض الصندوق أبو 3 مليار دولار.. هو دا شغل اقتصاد ولا فيه حاجة غلط في المنظومة.
قدرة أي حكومة بتتقاس بمدى أدواتها في إدارة الأزمات ومن غير مبالغة الدولة اتعاملت باحترافية شديدة في كل الأزمات اللي فاتت وفي مقدمتها أزمة الدولار ونقص العملة والحرب على السوق السودا وحاربت ولسه بتحارب في 50 جبهة وكل جبهة فيهم مليانة أزمات ورغم كده قدرت تخقق معجزات من غير صيغة مبالغة وتعالو نتكلم بالأرقام اللي مش بتكدب.
بالمنطق لو عندي أزمة دولار طاحنة الاحتياطي النقدي بتاعي هيقل ويتآكل لغاية ما يختفي تماما، لكن العكس هو اللي حصل في مصر والاحتياطي قفز على مدار شهور طويلة وخلي بالك بنقول زيادة مش ثبات، وأعلن البنك المركزى ارتفاع الاحتياطى النقدى من العملات الأجنبية ليبلغ في أغسطس الماضي 34.928 مليار دولار مقارنة بـ34.878 مليار دولار فى يوليو السابق له بزيادة بلغت 50 مليون دولار وعلى مدار 2023 استمر الاحتياطي في الزيادة، ودا بالنسبة للاحتياطي القندي واللي بيعتبر مسألة حياة أو موت للدولة المصرية لانه هو صمام الأمان ومن غيره البلد تبقى عارية ماليا وممكن متقدرش تستورد في وقت من الأوقات لو مفيش احتياطي او تنهار في حالة أي ازمة عالمية طارئة.
وغير الاحتياطي فيه لغز تاني عملته الحكومة المصرية وهي قدرتها على سداد ديونها بأرقام كبيرة وفي معادها، وحسب البيانات الإيجابية، تمكنت الحكومة المصرية من سداد 25.5 مليار دولار أقساط وفوائد ديون مستحقة عليها خلال النصف الأول من 2023 يعني في 6 شهور، وكمان سددت الدولة التزامات مستحقة عليها بقيمة 52 مليار دولار خلال السنتين من 2021 إلى 2023، يعني مليارات الدولارات خرجت من مصر في صورة أقساط ديون وفي نفس الوقت الاحتياطي بتاعك بيزيد .. طيب إزاي.
شوف حضرتك الموضوع مفهوش لغز ولا حاجة والموضوع مفهوش حاجة غلط.. لأن مصر دولة كبيرة جدا وعندها موارد ضخمة دولارية لكن الأزمة العالمية كانت قوية جدا والتيار كان شديد وعشان كده حصلت أزمة في سوق الصرف، وبفضل قدرة الحكومة والبنك المركزي تحديدا في إدارة سوق النقد قدرت الدولة إنها ترفع الاحتياطي وتسدد الديون لأنها اتصرفت بحكمة وعارفة كل دولار بيروح فين، ولو ركزنا في ملف الاحتياطي النقدي والديون بس هنلاقي إن مصر عملت سابقة عظيمة في إدارة الأزمات الاقتصادية.
