أمر يحدث لأول مرة.. إيه اللى هيحصل فى مصر الأيام الجاية؟

من ساعات أعلن الجهاز المركزي للتعبئة العامة والإحصاء، ارتفاع التضخم السنوي لأسعار المستهلكين في المدن المصرية إلى 37.4% في شهر أغسطس اللى فات مقارنة بـ 36.5% في يوليو.. وعلى أساس شهري، ارتفعت الأسعار في أغسطس 1.6%، انخفاضا من 1.9 في يوليو.. ودي بتعتبر من أعلى الزيادات اللى بيسجلها مؤشر التضخم فى السنين الأخيرة .. فيا ترى ايه اسباب ارتفاع معدلات التضخم بالشكل الكبير ده ؟ وازاى ده هينعكس على حياة الناس وعلى مستوى المعيشة؟ وايه اللي هيحصل فى مصر الأيام الجاية؟ وايه علاقة ارتفاع التضخم باجتماع لجنة السياسة النقدية فى البنك المرزي والمقرر تعقد اجتماعها خلال أيام قليلة؟ والأهم ايه الفرق بين تقرير جهاز الاحصاء وتقرير البنك المركزي عن التضخم.
 
فيه تقريرين مهمين جدا عن معدلات التضخم بيصدروا بشكل دوري وبناء عليهم بيتحدد مسار السياسة النقدية الأول تقرير بيعمله الجهاز المركزي للتعبئة العامة والاحصاء واحتساب معدل التضخم من خلاله بيتم عبر مسح ميداني بيقوم به 200 باحث بيستقوا معلوماتهم من قرابة 11 ألف مواطن ثابتين وموزعين على 141 منطقة ثابتة متنوعة بين الحضر والريف في جميع أنحاء مصر. 
والباحثين دول بيرصدوا أسعار حوالى 1200 سلعة وخدمة، والرصد بيتم 3 مرات شهرياً للسلع سريعة التغير زي الخضار والفواكه، أما أسعار الخدمات فبيتم رصدها مرة واحدة شهرياً، أما أسعار الأجهزة الكهربائية والسلع المعمرة فبيتم رصدها على فترات أطول.
والخدمات المركزية المقدمة من خلال الحكومة زي  تراخيص المرور وشهادات الميلاد بيتم تجميعها من الجهات الرسمية بمحافظة القاهرة بس لأنها ثابتة فى كل المحافظات ومفيهاش تغيير ولا اختلاف

ده بالنسبة لتقرير الاحصاء .. طب وتقرير البنك المركزي؟ 
البنك المركزي بيعمل على احتساب التضخم لسبب واضح جدا وهو تحديد سياسته بالنسبة لرفع أو تثبيت أو خفض معدل سعر الفائدة بغرض تحقيق الهدف الأساسي وهو السيطرة على الطلب
وبيعتمد البنك المركزي على تقرير التضخم الصادر عن جهاز التعبئة العامة والإحصاء ولكن بيحذف منه عنصرين أساسيين هم السلع سريعة التغير في الأسعار والمتحكم فيها عوامل تانية  بخلاف الطلب زي الخضار والفواكه، وبيستبعد كمان أسعار الوقود والكهرباء والغاز لأن أسعارها مش بيتحكم فيها الطلب من جانب المستهلكين ولكن بتتغير بقرارات إدارية.. وبيركز "البنك المركزي في حساب التضخم على التغيير اللي بتعملوا زيادة أو قلة الطلب على أسعار السلع والخدمات".
وعادة أرقام البنك المركزي للتضخم بتكون أكبر من أرقام جهاز التعبئة العامة والإحصاء لأن البنك المركزي بيعيد احتساب أوزان السلع وفق حجم الطلب عليها بعيد عن المتغيرات التانية اللى بتكون في تقرير جهاز الإحصاء.
حد ممكن يسأل هو ايه التضخم أصلا؟ 
بص يا سيدي بعيد عن تعريفات الاقتصاد المكلكعة فالتضخم ببساطة ان المروض من السلع يقل والطلب عليها يزيد فالسلع أسعارها تزيد وقيمة الفلوس تقل يعنى مثلا لو من 5 سنين كان ممكن ب 5 الاف تشتري شاشة 50 بوصة نفس ال 5 النهاردة ما يجيبوش شاشة 43 بوصة في حين ان الشاشة الى 50 بوصة سعرها عدا ال 10 الاف جنيه 
طب امتى التضخم بيحصل ؟
التضخم بيحصل من حاجتين اساسيتين الأولى تضخم داخلى ناتج عنزيادة الطلب زي ما وضحنا فى المثال اللى فات والتانى تضخم حارجي بيحصل نتيجة أزمات عالمية بتعمل فجوة تمويلية فى موازنات الدول فيحصل نقص فى العملة فالاسعار المستوردة سعرها يقفز قفزات جنونية وده اللى حصل بالظبط من بعد الحرب الروسية الاوكرانية وتداعياتها  الصعبة على العالم.

طب عرفنا التضخم واسبابه.. يا ترى ايه اللى بيحصل بعد ارتفاع التضخم؟ 
حاجات كتيرة جدا بتحصل بسبب التضخم وأهمها الارتفاع الكبير فى اسعار السلع والخدمات وكمان السولة بتزيد لكن السلع بتقل فلفلوس بتفقد قيمتها وبتضطر البنوك المركزية الى رفع اسعار الفايدة بهدف لم السيولة من السوق لتقليل حجم الطلب على السلع وكمان توفير اوعية ادخارية تحافظ للناس على مدخراتهم وهنا بييجي دور البنك المركزي وصناع السياسة النقدية اللى بيحاولوا يشوفوا حلول لكبح جماح التضخم والنزول باسعار السلع 
حد هيسال ويقول ما البنك المركزي بيرفع الفايدة كل شوية والتضخم مستمر فى الارتفاع والاسعار كمان بتزيد؟
ده حقيقي بس خد بالك ان التضخم المرة ديمستورد من الخارج واسبابه مش داخلية وعشان كده الحلول التقليدية لسه لحد دلوقتى ما جبتش معاه نتيجة واضحة.. وعشان كده متوقع بعد اعلان الاحصاء ارتفاع التضخم ان الايام الجاية سلع كتير اسعارها هتزيد وخصوصا السلع الغذائية والاجهزة الكهربائية وكل السلع المستوردة من الخارج