هبيد الاخوان الأعظم.. خرافات عماد البحيري عن اقتصاد مصر

أحلى حاجة في الاقتصاد انه بيعتمد على لغة الأرقام.. يعنى 1 زائد 1 يساوي 2 ومينفعش يكون 3 ولا 4 وعشان كده اى حد يتكلم في الاقتصاد لازم يكون فاهم ودارس وما يقولش اى كلام والسلام.. ولأن الاخوان ولجانهم الإعلامية ووشوهم الكريهة اللى بتطل على المصريين من منصات خارجية ما يفهمش غير لغة التخوين وما يعرفوش غير ترديد الاشاعات والأكاذيب بيقعوا كل يوم في شر أعمالهم وبيقولوا ويرددوا اشاعات بعيدة عن المنطق.. ومن أكتر الاخوان الهبيدة على شاشات الجماعة عماد البحيري اللى محدش عارف هو بقا مذيع ازاى.. يعنى بعيدا عن المحتوى اللى بيقدمه والخرافات اللى بيرددها كل يوم عن اقتصاد مصر.. مش بيعرف يقول كلمتين مفهومين على بعض.. بس مش دي المواصفات المطلوبة في مذيعين الجماعة.. لأن الاخوان كل اللى يهمهم مين يقدر يشتم مصر أكتر ومين اللى يقدر ينشر الاشاعات عن اقتصادها ويسود الحياة في وش المصريين وعماد البحيرى الحقيقة ما بيتأخرش. 
الغريبة ان المدعو عماد البحيري اللى بيطل كل ليلة على المشاهدين ويقعد يرغى بالساعات في الاقتصاد ويقول كلام يحاسب عليه القانون مالوش علاقة من قريب او بعيد بالاقتصاد ولا يفهم اى حاجة في علوم البيزنس لأنه في الأصل كان مدرس لغة عربية في محافظة بنى سويف قبل ما القدر يعاقبنا بيه وييجي القاهرة ويشتغل في الاعلام .. والغريبة ان مسيرته في الصحافة والاعلام مليئة بالتناقضات وكفاية تعرف ان البحيري اللى بيدافع دفاع مستميت عن الاخوان كان في يوم من الأيام بيقود الحملة الانتخابية لواحد من رموز الحزب الوطنى وهو الدكتور حسام بدراوي.. ووقتها كان مصلحة البحيري مع الحزب الوطنى وكان بيدافع عن سياسات الحزب اللى خرب مصر وبيقنع الناس تنتخب واحد من أبرز قياداته. 
متابعة بسيطة لحلقات عماد البحيرى هتديك صورة كاملة عن أفكاره المشوشة ومعلوماته السطحية عن الاقتصاد كفاية تشوفوا كل يوم وهو بيؤكد ان الدولار سعره في السوق السودا بيزيد وان سعر العملة الامريكية هيعدى ال 50 جنيه وان التعويم جاي جاي رغم ان سعر الدولار في السوق السودا بقاله اكتر من اسبوع بينخفض ويتراجع بشكل ملحوظ وقلت جدا عمليات تنفيذ البيع والشراء على العملة الامريكية.
وفى وقت كل الدنيا كانت بتتكلم عن الفوائد الكبيرة لانضمام مصر لتحالف بريكس خرج هبيد الاخوان الأعظم وقلل من الخطوة دي واعتبرها بلا اى قيمة تذكر لا وكمان قال ان ده هيزعل الامريكان من مصر وان مصر هتخسر حليف استراتيجي مهم مقابل الرهان على تحالف مالوش وزن كبير عالميا. 
عماد البحيري ما اكتفاش بهبداته عن الدولار والجنيه لا ده طلع من كام يوم وقالك ان البلد بتقفل وان خلاص الدولة مش هتقدر توفى بالتزماتها رغم ان مصر ولحد اللحظة اللى بنكلم حضراتكم فيها من اكتر دول العالم التزاما بسداد أقساط وفوائد ديونها ومفيش هيئة او مؤسسة تمويل قالت كلام عكس اللى بنقولوا. 
عماد البحيرى واللى زيه مش هدفهم الصالح العام ولا يفرق معاهم ان مصر تقوم وتقف على رجليها من التانى كل اللى يهمهم ان السبوبة تفضل مستمرة والدولارات اللى بتدخل حساباتهم تعدي ال 6 اصفار .. اما الشعب وحال الناس فدي مش على خريطتهم خالص