أعداء الدولار يتحدون.. هو دا سيناريو إسقاط ملك العملات

اوعى تبالغ في الاقتصاد.. ولا تشطح بخيالك في النتائج قبل ما تبدأ المعطيات في الظهور.. الاقتصاد.. أرقام وحسابات ودول هي عارفة بتعمل اية.

كلامنا النهاردة عن ازاي أعداء الدولار.. قصدنا دول بريكس تحديدًا عايزة تعمل اية علشان تتخلص أو تتحرر من سيطرة وهيمنة ملك العملات.

ازاي السياسة الخارجية للدول دي ماشية.. علشان يوصلوا لتحالفات قوية زي دي؟؟

اية الخطة اللي ناوية عليها المجموعة دي علشان تتحرر من سيطرة أمريكا؟

يلا بينا نعرف الإجابة

أولًا.. لازم نعرف ونفهم حاجة.. وهو أن مجموعة البريكس أحد أهم أهدافها هو إقامة نظام عالمى جديد أكثر عدلا، خصوصا فى المجال الاقتصادى،

والمجموعة دي شايفة أن النظام العالمى اللى بتقوده الولايات المتحدة ومعها إلى حد كبير الاتحاد الأوروبى، ظالم وجائر ولا يتضمن الحد الأدنى من العدالة والمساواة، وعلشان كدا هما عندهم رغبة في تغيير النظام دا بطريقة سلمية.

طيب السؤال هنا.. ازاي الدول دي هاتعمل كدا

ازاي الدول دي تقدر تسند على بعض وتدعم بعض بعيدًا عن أمريكا.. وعلشان كدا لازم تعرف كذا حاجة

أولًا لازم تعرف أن  الدول أعضاء بريكس موقعين على اتفاقية تجارة تفضيلية في عام ٢٠١٥.. واللي بالفعل دخلت حيز التنفيذ في عام ٢٠١٩.

والاتفاقية دي بتلغي  التعريفات الجمركية على 90٪ من البضائع المتداولة بين دول البريكس.

كمان البريكس عندهم اتفاقية الاستثمار التفضيلي لدول البريكس .. واللي اتوقعت في ٢٠١٧ ودخلت حيز التنفيذ في عام ٢٠٢٠. وبتوفر مُعاملة وطنية للمستثمرين من دول البريكس، وبتتضمن  أحكام بشأن حماية الاستثمار، زي المعاملة العادلة والمنصفة والحق في التعويض عن مصادرة الملكية.

ضيف على كدا أن بنك التنمية الجديد (NDB) بيقدم  قروض لدول البريكس خصوصًا، سواء بالدولار  بفوايد مُخفضة للغاية، وبالعملات المحلية بفوايد أكثر تخفيضًا خصوصًا لو من الصين ال الفوايد عندها على اليوان تقريبًا ببلاش.

إحنا هنا بنتكلم عن تمويل ودعم مشترك بين الدول أعضاء بريكس دون الحاجة لـ أمريكا..

طيب.. لما تكون اتفاقية التجارة التفضيلية الموقعة بين دول أعضاء بريكس بتنص على إلغاء التعريفات الجمركية على 90٪ من البضائع المتداولة بين الدول الأعضاء.. دا هايحفز الدول أنها تزود التبادل التجاري ما بينها بدل اللجوء لدول الغرب وأمريكا.. وبالتالي لو تم اعتماد العملات المحلية في التبادل التجاري هايكون الدولار رقم اتنين كعملة تبادل مش أولى.

ثانيًا.. الدول الأعضاء دي هاتلجأ كحل أول لـ بنك التنمية الجديد (NDB) .. اللي بيقدم  قروض لدول البريكس خصوصًا بأسعار فايدة مخفضة، بدل من مؤسسات النقد الأجنبي الخاضعة بشكل كبير لـ أمريكا.

لازم تعرف أن الصين ودول بريكس عانت كتير اوي من التعامل مع المؤسسات المالية الأمريكية.. وبالتالي بناء كتلة سياسية قوية لمواجهة الولايات المتحدة والتحرر من الدولار أولوية.

لازم تعرف أن أغلب الدول المشاركة في بريكس كلامها هايتنفذ هايتنفذ خاصة في مسألة الدولار.. ودا لأن عملاتها بتنخفض بشكل متسارع أمام الدولار.. فخلاص مابقاش قدامها حل غير أنها تتبادل بالعملات المحلية أو بعملة مشتركة.

لازم تعرف أن روسيا والصين أهم أعضاء بريكس.. التبادل التجاري ما بينهم ممكن يوصل لـ 200 مليار دولار.. ودا هايزود من ضخامة نفوذهم.

أمريكا قوية دا حقيقي.. لكنها بعد سنوات ووفقًا للمؤشرات مش هاتفضل القطب الأوحد في العالم ومتحكمة بيه بالدولار بتاعها.