مصر تتفاوض على قرض جديد.. حكاية الـ نص مليار دولار اللي هينقذوا الاقتصاد

من فترة كده الحكومة المصرية كانت أعلنت استعدادها لطرح "سندات باندا" بحوالي 500 مليون دولار.. ودي سندات بيطرحها مُصدرين من خارج الصين وبيتم بيعها بالسوق الصينية باليوان بضمان جزئي لمصر من جانب "البنك الأفريقي للتنمية" بشكل يساهم في تمويل المبادرات والمشاريع الخضراء.. ورغم ان الموعد المبدئي لاصدار سندات باندا باليوان الصيني كان المفروض يحصل فى بداية الربع التالت من 2023 الا انه لحد دلوقتي محصلش.. فيا ترى ايه الأسباب ؟ وايه أهمية اصدار سندات باليوان وبيعها فى الصين ؟ وهل ده ممكن يساهم فى حل أزمة نقص العملة؟ وامتى ممكن المشروع ده يخرج للنور؟ 
 
من ساعات وزير المالية الدكتور محمد معيط فجر مفاجأة من العيار التقيل واعلن ان مصر ببتفاوض على قرض جديد من البنك الآسيوي للبنية التحتية عشان يتم استخدامه لإصدار ضمان للسندات باليوان الصيني اللى مصر بتعمل عليها من فترة لكنها متعطلة بسبب نص مليار دولار لازم يتم سدادهم قبل طرح السندات الجديدة ومصر نجحت انها تحصل على ضمان جزيئ لسندات باندا وفى شهر مايو اللى فات أعلنت مجموعة البنك الأفريقي للتنمية الموافقة على ضمان ائتمان جزئي بقيمة 345 مليون دولار لمصر من أجل زيادة الوصول إلى سوق سندات باندا لتمويل المشاريع الخضراء والاجتماعية.
وأكد البنك وقتها أن الضمان الجزئي ده هيسمح لمصر بجمع ما يعادل 500 مليون دولار في سوق سندات باندا المقومة باليوان الصيني
وهيتم استخدام عائدات السندات في مشروعات النقل النظيف والطاقة المتجددة وكفاءة الطاقة والإدارة المستدامة للمياه والصرف الصحي، وكذلك تمويل المشروعات متناهية الصغر والصغيرة والمتوسطة ومبادرات الخدمات الصحية الأساسية
ورغم العقبات الكبيرة اللى بتقف قدام مشروع السندات المقومة باليوان الصيني الا ان وزير المالية أعلن ان مصر بتتفاوض مع مؤسسات تمويل دولية لتأمين تمويل بـ 1.5 مليار دولار هتحصل عليهم مصر خلال شهرين على أقصى تقدير. 
وخلونا نقول لحضراتكم شوية معلومات عن سندات باندا وأهميتها لمصر وفايدة اقتحام سوق سندات دولي كبير زي الصين 
وسندات الباندا هي سندات صادرة عن جهات إصدار أجنبية مقومة باليوان الصيني بيتم طرحها في السوق المحلية للصين وبتسجل جهات إصدار السندات خارج الصين وبتصدر السندات بالعملة الصينية وبيتم تداولها في البورصات.
وفي المتوسط بتتراوح مدة تداول سندات الباندا من سنة إلى 10 سنين وحجم الإصدارات من 1 إلى 4 مليار يوان، لكن مصر بتعتزم طرح سندات منها بقيمة 500 مليون دولار زي ما حصل قبل كده  مع سندات الساموراي اليابانية.
ويمكن استخدام سندات الباندا في تمويل نفقات التشغيل باليوان وغيرها من الأنشطة المتعلقة بارتفاع سيولة السوق الثانوي، لكنها بتتطلب إجراءات معقدة.
طب مين ليه حق اصدار السندات دي؟ 
يمكن إصدار سندات الباندا من قبل الشركات المالية وغير المالية، وكمان من الحكومات وبيتم تسجيل مصدري سندات الباندا في هونج كونج، وبيمارسوا نشاطهم  الرئيسي في الصين

طب وليه مصر رايحة تبيع سندات فى الصين؟ 
اتجهت مصر إلى أسواق السندات الدولية في فبراير اللى فات وباعت صكوك سيادية بقيمة 1.5 مليار دولار لأجل 3 سنوات، و جذب الطرح الدولي طلبات قيمتها 6.1 مليار دولار وتجاوزت نسبة تغطيتها بـ  4 مرات.
و بتهدف الحكومة لتنويع مصادر الديون وعدم الاعتماد على الدولار في ظل الأزمة الاقتصادية الحالية اللي رفعت من تكلفة الاقتراض عالميا