18 مليار دولار في الطريق لمصر.. بشاير الخير بدأت تهل
فيه حاجات كتير بتحصل في مصر الفترة الأخيرة بتقول ان ممكن يحصل انفراجة كبيرة في أزمة نقص العملة اللى بنعاني منها بقالنا حوالي سنتين واتسببت في ارتفع كبيرر جدا للأسعار في مصر في وقت الضغط بيزيد فيه كل يوم الجنيه.. وخلال الفترة الجاية مصر هيدخلها ان شاء الله حوالى 18 مليار دولار هيعملوا اتعاشة وانفراجة كبيرة في مشكلة شح العملة .. فيا ترى الفلوس دي هتيجي منين ؟ ومصر هتستخدمها في ايه ؟ وهل دخول مبلغ كبير زي ده يخلى الحكومة تعيد النظر في مسالة خفض قيمة الجنيه من جديد؟
من وقت قريب الحكومة أصدرت التقرير الأول لمتابعة تنفيذ وثيقة سياسة ملكية الدولة للأصول واللى كشفت من خلاله انها انها بتسعى لجمع 5 مليار دولار من أكتوبر 2023 الى يونيو 2024 عبر بيع 6 شركات حكومية كبيرة للقطاع الخاص والتخارج منها.
حد هيسأل هل مممكن فعلا الحكومة تقدر تجمع المبلغ الكبير ده في أقل من سنة؟
وعشان تقدر تعرف إجابة السؤال ده بوضوح تعالى نقولك ايه الشركات اللى الحكومة بتنوى تبيعها:
من أهم الشركات اللى هيتم طرحها محطة توليد الطاقة من الرياح بمنطقة جبل الزيت واللى بتعتبر واحدة من اهم مشروعات انتاج الطاقة في مصر، ودي محطة متوقع تجيب مبلغ ضخم وداخل في مفاوضات لشرائها شركات سعودية واماراتية بالإضافة لشركات أجنبية
فيه كمان محطات شركة وطنية اللى بتمتلك عدد ضخم من محطات الوقود في مصر وفى كل المحافظات تقريبا، وهى واحد من أنجح المشروعات في مصر في الفترة الأخيرة وفيه اقبال كبير جدا على شراء أسهمها ومعاها كمان شركة صافي للزيوت واللى بتعتبر واحدة من الشركات اللي بتعول عليها الحكومة لجمع سيولة دولارية كبيرة.. بالإضافة الى محطة توليد الطاقة من الرياح بمنطقة الزعفرانة.
وفى النص الأول من 2024 هتطرح الحكومة محطة سيمنز لتوليد الكهرباء ببني سويف، ومشروع محطات تحلية المياه وهيتم طرح 4 محطات بالمرحلة الأولى في النص الأول من عام 2024 من إجمالي 21 محطة تحلية من المتوقع طرحهم تباعا.
وطبعا متوقع نجاح الحكومة في جمع ال 5 مليار ده لو مكنش أكتر كمان لأن دي مشروعات ناجحة واى مستثمر عربي او اجنبي يتمنى يستحوذ عليها.
ايوه طب دول 5 مليار .. فين بقا باقي ال 18 مليار ؟
هقولك يا سيدي فيه اكتر من شركة عالمية أعلنت ضخ استثمارات جديدة في مصر ومنهم شركة ايني الإيطالية المتخصصة في مجال الاكتشافات البترولية واللى أعلنت انها ومعاها شركاء تانيين هيضخوا استثمارات جديدة في مصر بقيمة 7.7 مليار دولار في إطار حرص الشركة على تعزيز مشروعاتها الناجحة في مصر
وفى الأسابيع الأخيرة زار الرئيس التنفيذي لشركة اينى القاهرة وقابل الرئيس عبدالفتاح السيسي اللى اعرب عن تقديره للجهود اللى بتبذلها الشركة الايطالية في مصر وما تنفذه من أنشطة متعددة وفقاً لأعلى المعايير العالمية.
بس برضوا دول مش 18 مليار زي ما قولت في العنوان؟
استنى بس يا سيدي .. فيه حوالى 1.5 مليار دور هيتم ضخهم من خلال أكبر مستثمر أمريكي في مصر وهي شركة أباتشي المتخصصة في مجال الطاقة واللى أعلنت انها ملتزمة تجاه استثماراتها في مصر وبتتطلع لدعم الحكومة للاستمرار في تنفيذ توسعاتها في السوق المصرية، واستدامة شراكتها الممتدة مع مصر من اكتر من 30 سنة.
مش بس كده فيه كمان حوالى 3 ونص مليار دولار هتضخهم شركة“بريتيش بتروليوم” الشركة النشطة في مجالات البحث والاستكشافات البترولية واللى بتخطط الفترة الجاية لحفر 4 ابار جديدة متوقعة تبدا ضخ انتاجها في نهاية 2024.
ومؤكد ال 18 مليار دي هيكون ليها تأثير قوى على حل أزمة العملة الصعبة اللى بتعاني منها مصر في الفترة الأخيرة.
